छनोटका लागि त्रिकोणात्मक भिडन्त- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

छनोटका लागि त्रिकोणात्मक भिडन्त

कान्तिपुर संवाददाता

काठमाडौँ — आईसीसी महिला ट्वान्टी–२० विश्वकप एसिया छनोटमा अन्तिम चरणको खेल बाँकी रहँदा ग्लोबल क्वालिफायरमा पुग्ने स्थानका लागि तीन टोलीबीच प्रतिस्पर्धा हुने भएको छ ।

शुक्रबार चौथो चरणको खेलमा नेपालले मलेसियालाई ६ विकेट, यूएईले कुवेतलाई ७ विकेट र हङकङले भुटानलाई २० रनले पराजित गरेपछि अन्तिम चरणमा तीन टोलीबीच प्रतिस्पर्धा हुने देखिएको छ । ४ खेलबाट यूएईको ८ अंक छ । नेपाल र हङकङसँग ६–६ अंक छ ।

अन्तिम खेल नेपालले घरेलु टोली यूएईसँग खेल्नुपर्नेछ । हङकङले पुछारको टोली कुवेतसँग खेल्नेछ । यो खेलमा नेपाल पराजित भए यूएई ग्लोबल क्वालिफायरमा पुग्नेछ । तर, नेपाल र हङकङले आ–आफ्नो खेल जितेको अवस्थामा तीन टोलीको समान ८ अंक हुनेछ । त्यसपछि नतिजा नेट रनरेटका आधारमा हुनेछ । अहिलेसम्म नेपाल नेट रेनरेटमा यूएईभन्दा पछाडि छ । चार चरणको खेल नतिजाका आधारमा नेपालले यूएईलाई पराजित गर्न सकेमा ग्लोबल क्वालिफायर प्रवेशको सम्भावना प्रबल छ ।

महिला ट्वान्टी–२० विश्वकपकै एसिया क्वालिफायरको अघिल्लो संस्करणमा दुई टोली ग्लोबल क्वालिफायरमा पुग्ने व्यवस्था थियो । थाइल्यान्ड र यूएईले नेपाललाई पराजित गरी दोस्रो चरणमा प्रवेश गरेका थिए । यसपल्ट पनि घरेलु टोलीलाई पराजित गर्नु नेपालका लागि कठिन हुनेछ ।

शुक्रबार मलेसियाविरुद्ध ९३ रनको लक्ष्य नेपालले १८.२ ओभरमा ४ विकेट गुमाएर भेट्टायो । प्रशिक्षक जगत टमाटाले हरेक खेलमा नेपालको ओपनिङ ब्याटरको परीक्षण गरिरहेका छन् । मलेसियाविरुद्ध सीता रानामगर र इन्दु बर्माले नेपालको ओपनिङ सम्हालेका थिए । इन्दु ४ रनमै आउट भइन् । तर, सीताले कप्तान रुबिना क्षेत्रीसँग दोस्रो विकेटका लागि ४८ रनको साझेदारी गरिन् । सीताले ३८ बलमा ३ चौकासहित ३० तथा रुबिनाले २९ बलमा २० रनको योगदान गरेका थिए । कविता कुँवरले १० रन जोड्दा सरिता मगर १५ रनमा नटआउट रहिन् । नेपालले १३ अतिरिक्त रन पाएको थियो ।

दुबईस्थित आईसीसी एकेडेमी ओभलमा टस हारेर पहिले ब्याटिङ गरेको मलेसियाले एल्सा हन्टरको ३९ रन मद्दतमा ७ विकेट गुमाएर ९२ रनको योगफल खडा गरेको थियो । इलसाले ४८ बलमा ४ चौका प्रहार गरिन् । उनीबाहेक युसरिना याकोप (१२) र मास इलिसा (१४) ले मात्र दोहोरो अंकको स्कोर गर्न सके । बलिङमा सवनम राईले २ विकेट लिइन् । कविता कुँवर, सीता र रुबिनाले १–१ विकेट लिए । अलराउन्ड प्रदर्शन गरेकी सीता प्लेयर अफ द म्याच चुनिइन् ।

प्रकाशित : मंसिर ११, २०७८ ०७:५४
प्रतिक्रिया
पठाउनुहोस्

थ्रीस्टारविरुद्ध सातदोबाटो हाबी

कान्तिपुर संवाददाता

काठमाडौँ — सहिद स्मारक ‘ए’ डिभिजन लिग फुटबलमा संकटा क्लबले शुक्रबार उत्कृष्ट पुनरागमन जित रचेको छ । यससँगै सुरुआती अंकतालिकाको शीर्षस्थान कब्जा गरेको छ । दशरथ रंगशालामा भएको खेलमा संकटाले एक गोलले पछाडि रहेको स्थिति उल्टाएर फ्रेन्ड्स क्लबलाई २–१ ले हरायो ।

शुक्रबारकै अर्को खेलमा लिगको नवप्रवेशी सातदोबाटो क्लबले तीनपल्टको लिग विजेता थ्रीस्टारलाई १–० ले स्तब्ध पार्‍यो । यो नतिजापछि संकटा र सातदोबाटोको समान ४ अंक भएको छ । संकटा गोलअन्तरले अगाडि रहेको हो । संकटाको जितमा फोडे फोफानाले खेल सकिन तीन मिनेट अगाडि निर्णायक गोल गरे । यसअघि फ्रेन्ड्सले प्रकाश बुढाथोकीको गोलमा ४२ औं मिनेटमा अग्रता लिएको थियो । दोस्रो हाफको ५७ औं मिनेटमा नीरज बस्नेतले बराबरी गोल फर्काए ।

सातदोबाटोको जितमा भने सुदीप गुरुङले २९ औं मिनेटमा विजयी गोल गरेका थिए । हारले थ्रीस्टार ३ अंकमै सीमित रह्यो । फ्रेन्ड्स भने १ अंकमै सीमित छ ।

फ्रेन्ड्सले लिगको तेस्रो खेलमा २ सय २२ मिनेटपछि पहिलो गोल गरे पनि त्यो आफूअनुकूल नतिजाका लागि पर्याप्त रहेन । यस्तै हारसँगै थ्रीस्टारको लगातार ५ खेलको यात्रामा पूर्णविराम लागेको छ । लिगको पछिल्लो संस्करणका चार खेलसहित यसपल्ट पहिलो खेल जितेको थ्रीस्टार छैटौं खेलमा आएर पराजित रह्यो ।

प्रकाशित : मंसिर ११, २०७८ ०७:५१
पूरा पढ्नुहोस्
प्रतिक्रिया
पठाउनुहोस्
×