मुख्य प्रशिक्षक जिम्मेवारीलाई तीन वर्षसम्म निरन्तरता दिन अल्मुताइरी तयार- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

मुख्य प्रशिक्षक जिम्मेवारीलाई तीन वर्षसम्म निरन्तरता दिन अल्मुताइरी तयार

कान्तिपुर संवाददाता

काठमाडौँ — अब्दुल्लाह अल्मुताइरीले नेपाली राष्ट्रिय फुटबल टोलीको मुख्य प्रशिक्षक जिम्मेवारीलाई तीन वर्षसम्म निरन्तता दिन तयार भएको बताएका छन् । बुधबार सामाजिक सञ्जाल फेसबुकमा स्ट्याटस लेख्दै अल्मुताइरीले अखिल नेपाल फुटबल संघ (एन्फा)का अध्यक्ष कर्माछिरिङ शेर्पा र कतार फुटबल एसोसिएसनका अधिकारीहरुसँग छलफलपछि नयाँ सम्झौतामा हस्ताक्षर गर्न तयार बताएका छन् ।

'कर्मा छिरिङ शेर्पा र कतार फुटबल एसोसिएसनका अधिकारीहरुसँगको बैठकपछि अखिल नेपाल फुटबल संघसँग नेपालको जिम्मेवारीलाई तीन वर्ष निरन्तरता दिन नयाँ सम्झौता गर्ने मैले निर्णय गरेको छु र कतार फुटबल एसोसिएसनलाई समर्थन तथा नेपाल फर्किनका लागि गरेको सबै विषयका लागि धन्यावाद छ', अल्मुताइरीले फेसबुकमा लेखेका छन् ।

'नयाँ मिसनको सफलताको कामना गर्न चाहन्छु ... आगामी २ वर्षका लागि लक्ष्य र योजनाहरु आगामी केही दिनमै प्रकाशित गर्ने छु', उनले लेखेका छन्, 'तपाईंहरुसँग मेरो प्रतिबद्धता भनेको नेपालको भविष्य राम्रो हुने छ तर त्यसका लागि समय चाहिन्छ ।'

माल्दिभ्समा भएको साफ च्याम्पियनसिपमा नेपाल उपविजेता बनेको थियो । तर प्रतियोगिता सकिएपछि अल्मुताइरी नेपाल फर्किएका थिएनन् ।

नेपाली फुटबलले अहिलेसम्म जति पनि प्रशिक्षक पाएका छन् त्यसमा पढाइका हिसाबमा अल्मुताइरी अब्बल प्रशिक्षक नै हुन् । उनीसँग एएफसीको प्रो लाइसेन्स छ । यो ‘ए’ लाइसेन्स भन्दामाथिको हो । कतारी फुटबल संघको सहयोगमा उनी नेपालमा आएका हुन् । कुवेती प्रशिक्षकको सबैभन्दा राम्रो गुन भनेकै आफ्नो टिम र आफ्ना खेलाडी भनेपछि ज्यानै फाल्नु हो । खेलाडीसँग कुरा गर्ने हो भने उनीहरू अल्मुताइरीको प्रशंसा नै गर्छन् । उनी गत चैत एक वर्षका लागि नेपाली राष्ट्रिय पुरुष फुटबल टिमका मुख्य प्रशिक्षकमा नियुक्त भएका थिए ।

प्रकाशित : कार्तिक १०, २०७८ १९:१४
प्रतिक्रिया
पठाउनुहोस्

कांग्रेस निर्वाचन समिति छलफल : २७ कात्तिकमा बाँकी वडा अधिवेशन

कान्तिपुर संवाददाता

काठमाडौँ — कांग्रेसको केन्द्रीय निर्वाचन समितिले १४ औँ महाधिवेशनको कार्यतालिका बनाउने विषयमा छलफल थालेको छ । समितिको बुधबारको बैठकले प्रस्तावित कार्यतालिका तयार गरेको छ । त्यसलाई बिहीबार पुनः बैठक बसेर अन्तिम रुप दिने तयारी रहेको समितिका एक सदस्यले बताए ।

‘हामीले सभापतिज्यूको निर्देशनबमोजिम कार्यतालिका तोकेर महाधिवेशनको प्रक्रियालाई अघि बढाउने गरी तयारी गर्‍यौँ । प्रस्तावित कार्यतालिका तयार भइसक्यो । बिहीबार त्यसलाई अन्तिम रुप दिएर सार्वजनिक गर्छौ,’ ती सदस्यले भने ।

निर्वाचन समितिले २७ कात्तिकमा बाँकी रहेका वडा अधिवेशन गर्ने कार्यतालिका बनाएको छ । ‘कात्तिक मसान्तदेखि सुरु गर्ने र मंसिर मसान्तमा केन्द्रीय महाधिवेशन गर्ने गरी कार्यतालिका आउँछ, मंसिरभित्रै केन्द्रीय महाधिवेशन नसकिए पनि मंसिर मसान्तमा सुरु हुन्छ,’ ती सदस्यले भने ।

सभापति एवम् प्रधानमन्त्री शेरबहादुर देउवाले मंगलबार शीर्ष नेताहरुसँग छलफलपछि मंसिरभित्रै केन्द्रीय महाधिवेशन सम्पन्न गर्ने गरी कार्यतालिका बनाएर प्रक्रिया अघि बढाउन निर्देशन दिएका थिए । त्यहीअनुसार निर्वाचन समितिले बुधबारै छलफल गरेर तयारी अघि बढाएको हो ।

कांग्रेसले १३ जिल्लामा जिल्ला तहसम्मकै अधिवेशन गरिसकेको छ भने ५१ जिल्लामा स्थानीय तहसम्मको अधिवेशन भइसकेको छ । बाँकीमध्ये १३ जिल्लामा वडा अधिवेशन भएको छैन । रौतहट र रसुवाको क्रियाशील सदस्यताको टुंगो लागेको छैन । निर्वाचन समितिका ती सदस्यका अनुसार २७ कात्तिकमा ती १३ जिल्लामा वडा अधिवेशन हुनेछ । त्यसपछि त्यहीअनुसारको कार्यतालिका बिहीबार साँझ निर्वाचन समितिले सार्वजनिक गर्नेछ ।

कांग्रेसले यसअघि मंसिर ९–१३ मा केन्द्रीय महाधिवेशन गर्ने गरी कार्यतालिका ल्याएर १८ भदौदेखि अधिवेशनको प्रक्रिया थालेको थियो । तर, क्रियाशील सदस्यताको टुंगो लगाउन नसकेपछि अधिवेशन रोकिएको हो ।

प्रकाशित : कार्तिक १०, २०७८ १८:५१
पूरा पढ्नुहोस्
प्रतिक्रिया
पठाउनुहोस्
×