नासिर, अनुसिया र उपास्ती छनोट

नेपाल पौडी संघले आइतबार सातदोबाटोस्थित २५ मिटरको पौडी पोखरीमा आयोजना गरेको छनोट प्रतियोगितामा नासिर २०० मिटर फ्रिस्टायलमा १ मिनेट ५७.८५ सेकेन्डको राष्ट्रिय कीर्तिमान कायम गर्दै ५९९ फिना अंकसाथ विश्व च्याम्पियनसिपलाई छनोट भएका हुन् । यसअघि २५ मिटर दूरीमा ओलम्पियन एलेक्स शाहको नाममा २ मिनेट ००.०४ सेकेन्डको कीर्तिमान रहेको थियो । शाहले उक्त कीर्तिमान दुई वर्षअघि भएको १३ औं दक्षिण एसियाली खेलकुदमा कायम गरेका थिए ।

दुई पुरुष र दुई महिलाका लागि भएको छनोट प्रतियोगितामा ओलम्पियन शाह पनि छनोट भएका छन् । ओलम्पिकमा सहभागी दुई खेलाडी एलेक्स शाह र गौरिका उच्च शिक्षा अध्ययनका लागि विदेशमा रहेकाले उनीहरूको निरन्तर प्रशिक्षण र प्रतियोगितामा सहभागिता जनाइरहेको र फिना अंकको निकट समयलाई कायम राखेको आधारलाई मापदण्ड बनाई विश्व च्याम्पियनसिपमा छनोट गर्ने निर्णय भएको संघले जनाएको छ । तर गौरिका भने उच्च शिक्षा अध्ययनका क्रममा रहेका कारणले यसपालि भाग लिन नसक्ने जनाइएको छ ।

महिलातर्फ दुई खेलाडीमा अनुसिया तण्डुकार र उपास्ती महर्जन विश्व च्याम्पियनसिपलाई छनोट भएका छन् । अनुसियाले १०० मिटर फ्रिस्टायलमा १ मिनट २.६० सेकेन्डसाथ ५१७ फिना अंक तथा उपास्तीले ५० मिटर ब्रेस्टस्ट्रोकमा ३६.२६ सेकेन्डसाथ ४८९ फिना अंकका साथ छनोट हुन सफल भएका हुन् ।

सोही छनोटमा पुरुष १०० मिटर बटरफ्लाईमा अनुभव सुब्बाले पनि राष्ट्रिय कीर्तिमान कायम गरे । उनले उक्त दूरी ५९.१० सेकेन्डमा पुरा गरेका थिए । यसअघि उक्त दूरीको कीर्तिमान सैयद हम्जा शाहको नाममा १ मिनेट ००.२५ सेकेन्डको थियो । शाहले उक्त कीर्तिमान आठौं राष्ट्रिय खेलकुदमा बनाएका थिए ।