छानिए तेक्वान्दो रेफ्री ढकाल
काठमाडौँ — तेक्वान्दोका अन्तर्राष्ट्रिय रेफ्री दीपेन्द्र ढकाल पाकिस्तानको इस्लामाबादमा हुने चिफ अफ आर्मी स्टाफ (सीओएएस) ओपन अन्तर्राष्ट्रिय तेक्वान्दो प्रतियोगिताको निर्णायकमा छनोट भएका छन् । उक्त प्रतियोगिता कात्तिक १८ देखि २३ सम्म हुनेछ । फ्रान्समा कात्तिक २६ देखि २८ सम्म हुने फ्रेन्च इकोपेन विश्व वरीयता खुला तेक्वान्दो प्रतियोगिताको निर्णायकमा पनि उनी छनोट भएका छन् ।
एसियन तेक्वान्दो युनियन र युरोपियन तेक्वान्दो युनियनबाट उक्त प्रतियोगिताका लागि निर्णायकमण्डलमा ढकाललाई छनोट गरिएको जानकारी आएको नेपाली सेनाको शारीरिक तालिम तथा खेलकुद केन्द्रले जनाएको छ । दुई वर्षअघि चीनको वुहानमा सम्पन्न सातौं विश्व सैनिक खेलकुद प्रतियोगितासमेत रेफ्री ढकाल निर्णायकमा रहेका थिए । ढकाल विभागीय टोलीका एक्ला अन्तर्राष्ट्रिय तेक्वान्दो रेफ्री हुन् ।
प्रकाशित : आश्विन २२, २०७८ ०८:२४