‘ए’ डिभिजन राष्ट्रिय फुटसल लिग : स्पोर्ट्स क्यासल उपाधि नजिक- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

‘ए’ डिभिजन राष्ट्रिय फुटसल लिग : स्पोर्ट्स क्यासल उपाधि नजिक

राइजिङ क्लबले बिहीबार शंखमूल फुटसलविरूद्ध दोस्रो क्वालिफायरमा खेल्ने
कुशल तिमल्सिना, दीपक परियार

पोखरा — घरेलु टोली स्पोर्ट्स क्यासलले धरानको राइजिङ क्लबमाथि ८–६ गोलको जितसाथ ‘ए’ डिभिजन राष्ट्रिय फुटसल लिगको फाइनल तय गरेको छ । पहिलो क्वालिफायरमा पराजित भए पनि राइजिङले फाइनल पुग्नका लागि काठमाडौंको शंखमूल फुटसलसँग दोस्रो क्वालिफायर खेल्न पाउनेछ । बुधबारै इलिमिनेटर खेलमा शंखमूलले अर्को स्थानीय टोली सविन मेमोरियललाई हराएको थियो ।

राइजिङलाई हराएर फाइनल पुगेपछि स्पोर्ट्स क्यासल टोली । तस्बिर : केशव थापा/कान्तिपुर

पोखरा रंगशालास्थित कभर्डहलमा उल्लेख्य घरेलु दर्शकमाझ क्यासललाई जित निकाल्न निकै कठिन भयो । लिग चरणको अन्तिम खेलमा राइजिङसँग ‘रणनीतिक हार’ भोगेको क्यासल खेलमा अधिकांश समय दबाबमा रह्यो । दोस्रो हाफको अन्तिम दुई मिनेटमा तीन गोल सम्भव हुँदा क्यासल फाइनलमा पुगेको हो ।

फिक्सो पोजिसनबाट खेल्ने बिकु तामाङ र दोर्जे तामाङ चोटग्रस्त भएपछि खेलको अन्त्यतिर राइजिङ लड्खडाएको हो । अग्रता जोगाउन नसक्नुको कारण राइजिङका प्रशिक्षक युवेन्द्र गुरुङले पनि खेलाडीको चोट मुख्य मानेका छन् । दोस्रो क्वालिफायरमा बिहीबार दुई प्रमुख खेलाडीबिना कठिन हुने उनको भनाइ छ ।

‘यो खेल समग्र प्रतियोगिताकै सबैभन्दा उत्कृष्टमध्ये एक भयो । विडम्बना हाम्रा दुई फिक्सो चोटग्रस्त भए । बिकुको चोट गम्भीर छ । फुटसलमा लागेर केही गर्नुपर्छ भनेर आएका खेलाडी यसरी घाइते हुँदा म आफैं भावुक भएँ,’ प्रशिक्षक गुरुङले भने, ‘अधिकांश समय खेल हाम्रो नियन्त्रणमा थियो । खेलाडी घाइते भएपछि हामी मनोवैज्ञानिक रूपमा कमजोर भयौं ।’

प्रशिक्षक गुरुङले स्पोर्ट्स क्यासलका खेलाडीको तीव्र गति र उत्कृष्ट सन्तुलनले उनीहरूलाई रोक्न कठिन भएको बताए ।

स्पोर्ट्स क्यासलका सहायक प्रशिक्षक अर्बिन गुरुङले फाइनल पुग्न निकै नै कठिन भएको स्वीकारे । आफ्ना खेलाडीले जुनसुकै समय खेलमा फर्कन सकिन्छ भन्ने विश्वास कायमै राखेको उनले बताए । ‘यो खेलमा हामीले एक सेकेन्ड पनि आरामको महसुस गर्न पाएनौं । हाम्रो टिम धेरै नै दबाबमा खेल्यो । यति हुँदाहुँदै पनि मैले टिममा विश्वास गरेको थिएँ । उनीहरू कुनै पनि समयमा खेलमा फर्किन्छन् भन्ने लागेको थियो,’ गुरुङले कान्तिपुरसँग भने ।

शुक्रबार हुने फाइनलअघि स्पोर्ट्स क्यासललाई एक दिनको आराम मिल्नेछ । यसबाट खेलाडीले रिकोभरी समय पाउनेछन् । पराजित टोली र इलिमिनेटरमा जित पाएका टोलीलाई भने फाइनलसम्ममा कुनै दिन आराम छैन ।

क्यासलका किशोर गुरुङले चौथो र विजय गुरुङले छैटौं मिनेटमा गोल गरेपछि टोली सुरुमै दोहोरो अग्रता लिन सफल भयो । तर नवौं मिनेटमा हेमन्त थापामगर, १२ औं मिनेटमा मिलन राई र एक मिनेटपछि सुदीप गुरुङले गोल फर्काएसँगै पहिलो हाफमा राइजिङले ३–२ को अगाडि रह्यो ।

दोस्रो हाफको तेस्रो मिनेटमै हेमन्तले गोल गरेपछि राइजिङले अग्रता अझै बढायो । त्यसयता क्यासलका किशोर र सुमित श्रेष्ठले एक मिनेटभित्र दुई गोल गरेपछि खेल ४–४ को अवस्थामा पुग्यो । ३१ औं मिनेटमा मिलन राई र ३२ औं मिनेटमा सुदीप गुरुङले गोल गरेपछि राइजिङले पुनः दुई गोलले अग्रता बनायो । ३४ औं मिनेटमा सुमितले अग्रता छोट्याए पनि क्यासल हार नजिक पुगिसकेको थियो ।

जिततर्फ उन्मुख खेलको ३७ औं मिनेटमा आफ्नै टोलीका गोलरक्षक केशर लिम्बुसँग जुध्दा बिकु घाइते भए । उनको अनुपस्थितिमा क्यासलले अन्तिम दुई मिनेटमा ३ गोल फर्कायो । अन्तिम मिनेटमा गोल गरेका किशोर गुरुङ र सुमित श्रेष्ठले ह्याट्रिक पूरा गरे ।

शंखमूलले लियो बदला

इलिमिनेटर खेलमा सविन मेमोरियलमाथि ३–२ गोलको जित निकाल्दै शंखमूल फुटसल हब फाइनल यात्रामा एक कदम अघि बढेको छ । टोलीले राइजिङसँग बिहीबार खेल्नेछ । लिग चरणको अन्तिम खेलमा शंखमूलले सविन मेमोरियलसँग बेहोरेको हारको बदला लिएको छ ।

शंखमूलका प्रशिक्षक प्रकाश परियारले अघिल्लो खेलबाट विपक्षीको शैली बुझ्दा यो खेलमा सजिलो भएको बताए । ‘बलियो टिमसँग खेल्दा सहज त पक्कै हुँदैन । तर हामीले हिजोमात्र उनीहरूसँग खेलेका हुनाले रणनीतिक तयारीमा समय पायौं । यो जित त्यसैको उपज हो,’ प्रशिक्षक परियारले भने ।

लगातारको खेलका कारण खेलाडीको रिकोभरी समय नपुग्नु शंखमूलको समस्या हो । फाइनलसम्मको यात्रामा शंखमूलले चार दिन लगातार खेल्नुपर्नेछ । अन्तिम लिगमा भोगेको हारको बदला बुधबार लिएको शंखमूलले बिहीबारै राइजिङ र त्यो खेल जितेमा शुक्रबार क्यासलसँग फाइनल खेर्ल्नुपर्नेछ ।

‘लगातारको खेलतालिकाबीच यत्तिको खेल्न सकेकामा मेरा खेलाडीप्रति गर्व गर्छु,’ उनले थपे, ‘खेलाडीलाई रिकोभरी पुगिरहेको छैन । यद्यपि हामी फाइनलमा शतप्रतिशत प्रयास गर्नेछौं ।’

११ औं मिनेटमा जेनिश प्रजापतिले गोल गरेपछि शंखमूलले पहिलो हाफमा अग्रता बनाएको थियो । कृजल खड्काले २४ औं मिनेटमा २–० को अवस्थामा पुर्‍याए । सविनका सरोज गुरुङले २७ औं मिनेटमा एक गोल फर्काए पनि कृजलले ३० औं मिनेटमा व्यक्तिगत दोस्रो गोल गर्दा शंखमूल ३–१ को स्थितिमा पुग्यो । खेल सकिन ५ मिनेट बाँकी छँदा मनोज गुरुङले सविनका लागि दोस्रो गोल गरे पनि त्यसयता गोल हुन नसक्दा शंखमूल विजयी भयो । शंखमूलका गोलरक्षक अनिश श्रेष्ठ म्यान अफ द म्याच चुनिए ।

‘लगातारको खेलका कारण मैले नयाँ खेलाडीलाई अवसर दिएको थिएँ । नयाँ खेलाडीबीच सन्तुलन नहुँदा हामीले हार्नुपर्‍यो,’ सविन मेमोरियलका प्रशिक्षक राजेन्द्र तामाङले भने, ‘हामीले गोलका केही अवसर पनि उपयोग गर्न सकेनौं ।’

प्रकाशित : आश्विन २१, २०७८ ०७:५३
प्रतिक्रिया
पठाउनुहोस्

ईपीएल : चितवन पहिलोपल्ट फाइनलमा

कान्तिपुर संवाददाता

काठमाडौँ — देव्रेहाते स्पिनरद्वय सागर ढकाल र साहब आलमको सानदार बलिङमा चितवन टाइगर्स बुधबार बजाज पल्सर एभरेस्ट प्रिमियर लिग (ईपीएल) क्रिकेटको फाइनल पुगेको छ । चितवनले पोखरा राइनोजलाई क्वालिफायरमा ९ विकेटले सजिलै पराजित गरी पहिलोपल्ट ईपीएलको फाइनल पुगेको हो ।

पोखराको विकेट लिएपछि चितवनका सागर ढकाल (जम्प) को सेलेब्रेसन । तस्बिर : हेमन्त श्रेष्ठ/कान्तिपुर

सागर र साहबले ४–४ विकेट लिएपछि टस हारेर ब्याटिङ निम्तो पाएको पोखरा १५ ओभर खेल्दै ६६ रनमै अलआउट भयो । अफगानिस्तानका ओपनर मोहम्मद साहजादले २६ बलमै ४८ रन बनाएपछि चितवनले ७.५ ओभरमै लक्ष्य पार गर्‍यो ।

पोखरालाई ईपीएल इतिहासमै सबैभन्दा कम स्कोरमा समेट्दै चितवनले फाइनल तय गरेको हो । सन् २०१७ को पहिलो सिजनमा राउन्ड रोबिनबाटै बाहिरिएको चितवन २०१८ को पछिल्लो सिजन प्लेअफसम्म पुगेको थियो । चितवनको फाइनल प्रवेशलाई कप्तान सोमपाल कामीले अविश्वसनीय रूपमा लिए ।

‘जब हामीले यसपालि यात्रा सुरु गरेका थियौं, कसैले सोचेका थिएनन् चितवन टाइगर्स फाइनल पुग्छ भनेर । हाम्रो टिममा राष्ट्रिय टोलीबाट नियमित खेलिरहेका खेलाडी छैनन्, सबै जुनियर खेलाडी छन् । तर, मलाई आफ्नो खेलाडीमाथि एकदमै विश्वास थियो,’ सोमपालले भने, ‘मैले टिम मालिकलाई पनि भनेको थिएँ, यसपालि हामी फाइनल खेल्छौं भनेर । मैले वाचा गरेको छु, जस्तो योजना बनाएको छु, त्यो कार्यान्वयन भयो भने शतप्रतिशत रूपमा हामीले उपाधि पनि जित्छौं ।’

पोखरामाथि चितवनको यो लगातार तेस्रो जित हो । राउन्ड रोबिन लिगमा पनि पोखरालाई १२३–७ को स्कोरमा रोक्दै चितवनले ९ विकेटकै जित हात पारेको थियो । सन् २०१८ को सिजनमा पोखरा र विराटनगर वारियर्सबीचको खेलमा दुवै टोलीले समान ८४ रन बनाएपछि खेल ‘टाइ’ भएको थियो । ईपीएलको न्युन स्कोर यसअघि यही थियो । चितवनले सबैभन्दा कम बल खेल्दै विजय लक्ष्य पूरा गरेको कीर्तिमान पनि बनाएको हो ।


रिचर्ड लेभी र सुनील धमलाले ५ ओभरमा ३३ रन जोड्दै पोखरालाई योग्य सुरुआत दिलाए पनि त्यसपछिको १० ओभरमा ३३ रन बनाउँदा १० विकेट गुमायो । १२ बल खेली २ चौका र १ छक्का प्रहार गर्दै १९ रन बनाएका लेभीलाई कप्तान सोमपालले बोल्ड गरेपछि चितवनले नियमित विकेट लिएको थियो ।

‘स्कोर के छ भनेर हामी स्कोरबोर्डमा केन्द्रित थिएनौं । आज पूरा फरक विकेट थियो, हिजो पानी परेकाले विकेट गिलो थियो । टस जित्नु निकै राम्रो भयो, किनभने यो निकै महत्त्वपूर्ण थियो । पेस बलरले निकै राम्रो बलिङ गरेका हुन्,’ सोमपालले भने, ‘स्पिनरले आज आश्चर्यजनक प्रदर्शन गरे । यसमा कुनै शंका छैन । विकेटमा टर्न पनि भइरहेको थियो ।’

सागरले सुनीललाई १८ रनमा बोल्ड गरे । सुनीलले ३१ बल खेल्दा २ चौका प्रहार गरे । साहबले एकै ओभरमा साहन अराचिगे (३) र कप्तान विनोद भण्डारीलाई आउट गरी चितवनलाई महत्त्वपूर्ण सफलता दिलाए । विनोद पहिलो बलको सामना गर्दा एलबीडब्लू आउट भए ।

सागरले असेला गुणरत्नेलाई १ रनमा बोल्ड गरे भने विवेक यादवलाई २ रनमा एलबीडब्लू आउट गरे । उनले विक्रम सोबलाई पनि ३ रनमा पेभेलियन फर्काए । करिम जन्नतले लोकेश बम (५) लाई आउट गरे भने साहबले अन्तिम २ विकेट लिई पोखराको इनिङ्स टुंग्याए । नन्दन यादव आफूले सामना गरेको पहिलो बलमै साहबबाट कट एन्ड बोल्ड भए । सुसन भारीले १४ बल खेल्दा २ चौका प्रहार गरी १२ रन बनाए । उनी आउट हुने अन्तिम खेलाडी थिए । सागरले ४ ओभरमा १४ रन खर्चे । प्लेयर अफ द म्याच साहबले ४ ओभरमा १० रनमात्र खर्चे ।

साहजादले ७ चौका र २ छक्का प्रहार गरे । बाउन्ड्रीमा विजयी रन प्रहार गर्ने प्रयासमा उनी आउट हुन पुगे । प्रतियोगितामा पहिलो खेल खेलिरहेका हासिम अन्सारीले उनलाई राम्रो साथ दिए । उनले २० बल खेल्दा १ चौका र १ छक्कासहित अविजित १४ रन बनाए । जन्नतले आफ्नो पहिलो बलमै विजयी चौका प्रहार गरे ।

पोखरा र भैरहवाको प्रतिस्पर्धा

पोखरा र भैरहवा ग्लाडियटर्सबीच बिहीबार हुने खेलेको विजेताले चितवनसँग उपाधिका लागि खेल्नेछ । भैरहवाले बुधबारै भएको इलिमिनेटरमा काठमाडौं किंग्स इलेभेनलाई १६ रनले हरायो । १ सय ८९ रनको लक्ष्य पाएको काठमाडौं किंग्सले ८ विकेट गुमाई १ सय ७२ रनमात्र बनाउन सक्यो ।


असान प्रियञ्जनले ४८ बलमा ६८ रन बनाए पनि काठमाडौं किंग्सलाई जित दिलाउन सकेनन् । उनले ५ चौका र ४ छक्का प्रहार गरे । राजु रिजाल १०, रायन बर्ल शून्य, अमित श्रेष्ठ १९, जनक प्रकाश १४ बलमा २८, अमरसिंह राउटेला ५, कप्तान सन्दीप लामिछाने ६ र दिनेश अधिकारी ८ बलमा १५ रनमा आउट भए । भैरहवाका धम्मिका प्रसाद, आरिफ शेख र कुशल मल्लले २–२ र दुर्गेश गुप्ताले १ विकेट लिए ।

यसअघि टस जितेर ब्याटिङ रोजेको भैरहवाले निर्धारित २० ओभरमा ७ विकेट गुमाउँदै १ सय ८८ रन बनाएको थियो । कीर्तिपुरस्थित त्रिवि क्रिकेट मैदानमा कप्तान शरद भेषावकरले आक्रामक ब्याटिङ गर्दै २० बलमा ४९ रन बनाएर भैरहवालाई बलियो स्थितिमा उभ्याए । उनले ७ चौका र ३ छक्का प्रहार गरे ।

तमिम इकवाल ९ रनै आउट भएपछि अर्का ओपनर प्रदीप ऐरीले २७ बलमा ६ चौका र १ छक्का प्रहार गर्दै ३९ र उपुल थाराङ्गाले ५ चौका प्रहार गर्दै ३३ बलमा ३५ रन जोडे । कुशल मल्लले २० बलमा चार छक्कासहित ३२ रन बनाएर मध्यक्रममा शरदलाई राम्रो साथ दिए । आरिफ ८ बलमा १ चौका र १ छक्कासहित १५, रोहित पौडेल १ रन र दुर्गेश शून्यमा आउट भए ।


काठमाडौंका प्रियञ्जन र सन्दीपले २–२ विकेट लिए । प्रियन्जनले ३ ओभरमा १७ र सन्दीपले ४ ओभरमा ३६ रन खर्चे । शेर मल्ल, जितेन्द्र मुखिया र जनक प्रकाशले १–१ विकेट लिए ।

प्रकाशित : आश्विन २१, २०७८ ०७:४८
पूरा पढ्नुहोस्
प्रतिक्रिया
पठाउनुहोस्
×