वाग्मतीमा खेलकुदलाई न्यून बजेट- खेलकुद - कान्तिपुर समाचार

वाग्मतीमा खेलकुदलाई न्यून बजेट

प्रताप विष्ट

हेटौंडा — वाग्मती प्रदेश सरकारले चालु आर्थिक वर्षका लागि खेलकुद क्षेत्रलाई एक प्रतिशत बजेट पनि विनियोजन गरेको छैन । प्रदेश खेलकुद विकास परिषद्को योजनाअनुसार प्रदेश सरकारले विनियोजन गरेको रकम अत्यन्त न्यून भएको टिप्पणी परिषद्को छ । चालु आवका लागि वाग्मती प्रदेश सरकारले ल्याएको ५७ अर्ब ७२ करोड रुपैयाँको बजेटमा खेलकुदले प्राथमिकता पाउन सकेन । बजेट रकम निर्धारणपछि खेलकुदले ससर्त अनुदानसहित प्रदेशको कुलमा बल्लतल्ल १ प्रतिशत बजेट पाएको छ ।

प्रदेशका १३ वटै जिल्लामा खेलकुद पूर्वाधार विकास, विभिन्न खेलकुदका प्रतियोगिता तथा अन्य कार्यक्रम सञ्चालन गर्न प्रदेश सरकारले आर्थिक वर्षका लागि ससर्त अनुदान २ करोड ६ लाखसहित ५९ करोड ७७ लाख रुपैयाँ बजेट छुट्याएको छ ।

प्रदेशको खेलकुद विकासका लागि उक्त बजेट पर्याप्त नभए पनि सबै क्षेत्रलाई समेट्ने गरी योजना तयार पारिएको प्रदेश खेलकुद विकास परिषद्का सदस्यसचिव सूर्यलाल भण्डारीले बताए । प्रदेश खेलकुद विकास परिषद्ले प्रदेशका १३ जिल्लामा खेलकुदको विकास गर्न तथा प्रदेशमातहतमा विभिन्न खेलकुदका कार्यक्रम सञ्चालन गर्न ९० वटा योजनाहरू तयार पारेको छ । जसमा सबैभन्दा ठूला योजनाको रुपमा वहुवर्षीय योजनाअन्तर्गत् २ वटा योजनाहरूलाई ८/८ करोड रुपैयाँ बजेट छुट्याइएको छ । सानोमा १० लाख रुपैयाँसम्मका योजना छन् । ठूला योजनाको रूपमा बहुवर्षीय कार्यक्रमअन्तर्गत हेटौंडाको गौरीटार रंगशाला र सिन्धुपाल्चोकको चौतारा रंगशाला निर्माणका लागि ८–८ करोड रुपैयाँ बजेट विनियोजन भएको छ ।

यी दुई ठूला योजनासहित ३५ लाखदेखि ८ करोडसम्मको बजेट रहेका १४ वटा बहुवर्षीय योजनाका लागि कुल ४२ करोड ६८ लाख रुपैयाँ बजेट छुट्याइएको छ । त्यसमा मकवानपुरका दुई योजना छन् भने रामेछापमा ३, सिन्धुपाल्चोक, नुवाकोट, सिन्धुली र चितवनमा २–२ तथा धादिङमा एक ठूलो बहुवर्षीय योजना सम्पन्न गर्न बजेट विनियोजन गरिएको भण्डारीले बताए ।

प्रदेशले साढे ४ करोडका खेलकुद कार्यक्रम गर्ने

प्रदेश खेलकुद विकास परिषद् आफैंले खेलकुद कार्यक्रम सञ्चालन गर्न ४ करोड ६६ लाख रुपैयाँ वजेट विनियोजन गरेको छ । खेलकुदका तालिमदेखि लिएर प्रदेश खेलकुद प्रतियोगितासम्म छन् । परिषद्ले प्रदेश खेलकुद प्रतियोगिता गर्न २ करोड रुपैयाँ बजेट विनियोजन गरेको छ । सहिद स्मृति राष्ट्रिय फुटबल लिग र प्रदेश फुटबल लिग प्रतियोगिताका लागि एन्फासँगको साझेदारी कार्यक्रमअन्तर्गत दुवै प्रतियोगिताका लागि ५०–५० लाख बजेट निर्धारण गरिएको छ । साहसिक तथा पर्यटकीय खेलकुद गर्न ३० लाख रुपैयाँ रकम छुट्याइएको छ । प्रदेशस्तरीय राष्ट्रपति रनिङ सिल्ड प्रतियोगिता गर्न २६ लाख रुपैयाँ बजेट तय गरिएको छ ।

अपांगता भएका खेलाडीको प्रदेशस्तरीय पारा खेलकुद गर्न, उनीहरूलाई राष्ट्रिय, अन्तर्राष्ट्रिय प्रतियोगिता तथा तालिममा सहभागिता जनाउन १० लाख रुपैयाँ बजेट निश्चित गरिएको छ । खेलाडी तथा खेलक्षेत्रमा विशेष योगदान दिने व्यक्ति तथा संस्थालाई सम्मान गर्न तथा अल्ट्रा म्याराथन, क्यानोइङ, रक क्लाइम्बिङलगायतका खेलको सम्भाव्यता अध्ययन गर्न १०–१० लाख बजेट छुट्याइएको परिषद्ले जनाएको छ ।

कुन जिल्लालाई कति बजेट ?

खेलकुदको पूर्वाधार निर्माण तथा खेलकुद प्रतियोगिताका लागि प्रदेश सरकारको खेलकुद बजेटबाट मकवानपुरले १० करोड ४२ लाख र चितवनले ६ करोड ७३ लाख बजेट प्राप्त गर्दा प्रदेशमा सबैभन्दा बढी बजेट सिन्धुपाल्चोकलाई १३ करोड ५० लाख बजेट विनियोजन गरिएको छ । रामेछापलाई ७ करोड ६ लाख, सिन्धुलीलाई ५ करोड ८९ लाख, नुवाकोटलाई साढे ४ करोड, धादिङलाई ३ करोड ३० लाख, काठमाडौंलाई एक करोड ११ लाख, काभ्रेलाई ४६ लाख, ललितपुरलाई ४४ लाख तथा भक्तपुर, दोलखा, र रसुवालाई ३९–३९ लाख रुपैयाँ विनियोजन गरिएको परिषदले जनाएको छ ।

प्रकाशित : आश्विन १०, २०७८ ०८:१८
प्रतिक्रिया
पठाउनुहोस्

मोती शोभाका लघु उपन्यास सार्वजनिक

कान्तिपुर संवाददाता

काठमाडौँ — लामो समय सरकारी सेवामा बिताएकी मोती शोभा श्रेष्ठले चार लघु उपन्यास सार्वजनिक गरेकी छन् । महिला पात्रमा केन्द्रित श्रेष्ठका ‘प्रकृति’, ‘सम्झनाको डायरी’, ‘सत्य र आमा’ र ‘आँसु’ लघु उपन्यासहरू पूर्वप्रधानमन्त्री तथा साहित्यकार लोकेन्द्रबहादुर चन्द, कवि तथा गीतकार कालीप्रसाद रिजाल, साहित्यकार तथा पूर्वअर्थमन्त्री शंकर कोइराला, साहित्यकार तथा चलचित्र निर्देशक यादव खरेललगायतले शनिबार राजधानीमा लोकार्पण गरेका हुन् ।

उपन्यासमा पितृसत्तात्मक नेपाली समाजमा सामान्य परिवार, महिलाको जीवन हेर्ने, बुझ्ने र महसुस गर्ने तरिका तथा तिनका भोगाइहरू समेटिएको श्रेष्ठले बताइन् । ‘मैले पहिलो लकडाउनको तीन/चार महिनामा नै यी उपन्यासहरू तयार पारें,’ श्रेष्ठले भनिन् ।

‘प्रकृति’ मा श्रेष्ठले नेवारी समाजका रीतिरिवाज, आर्थिक अवस्था र युवापिँढी विदेशिन बाध्य हुनुका कारणहरू समेटेकी छन् । ‘सम्झनाको डायरी’ मा मानिसमा साहस, हिम्मत भएमा समाज र राज्यका लागि योगदान गर्न सक्ने र समयको सही सदुपयोगले जीवन सुखमय हुन्छ भन्ने भाव समेटिएको छ । ‘सत्य र आमा’ कृतिमा भने उनले बालश्रम शोषणबारे उल्लेख गरिएको छ । ‘भोको पेट र टुक्रिएको हृदयले जीवनमा महत्त्वपूर्ण पाठ सिकाउने कुरालाई मनन गरी यो उपन्यास लेखेकी छु,’ उनले लेखेकी छन् । चौथो कृति ‘आँसु’ मा उनले नेपालको ग्रामीण परिवेशमा जन्मीहुर्की, सानै उमेरमा विवाह गरेर संघर्षरत एक महिलाको कथालाई समेटेकी छन् ।

काठमाडौंको मरुटोलमा जन्मिएकी श्रेष्ठ श्रम तथा यातायात व्यवस्था मन्त्रालयमा सहसचिव, वाणिज्य विभागमा निर्देशक, जनसंख्या तथा वातावरण तथा उद्योग मन्त्रालयमा उपसचिवको जिम्मेवारी सम्हालेकी थिइन् । श्रेष्ठले यसअघि ‘नेपालमा घरेलु उद्योगका विकास’ नामक पुस्तक प्रकाशित गरेकी थिइन् ।

प्रकाशित : आश्विन १०, २०७८ ०८:११
पूरा पढ्नुहोस्
प्रतिक्रिया
पठाउनुहोस्
×