एएफसी वुमेन्स एसियाकप : हङकङविरुद्ध नेपालको बहादुरीपूर्ण बराबरी- खेलकुद - कान्तिपुर समाचार
एएफसी वुमेन्स एसियाकप

एएफसी वुमेन्स एसियाकप : हङकङविरुद्ध नेपालको बहादुरीपूर्ण बराबरी

कान्तिपुर संवाददाता

काठमाडौँ — नेपालले एएफसी वुमेन्स एसियाकप छनोटमा मंगलबार हङकङविरुद्ध बहादुरीपूर्ण गोलरहित बराबरी निकालेको छ । यससँगै नेपालले प्रतियोगितामै पहिलोपल्ट अंक बटुल्न पनि सफल भएको छ । नेपालले सन् ८० र ९०को दशकमा यसै प्रतियोगिताको तीन छनोट संस्करण खेलेको थियो ।

नेपालले हङकङविरुद्ध प्रभावशाली प्रदर्शन गर्दै खेल आफ्नो नियन्त्रणमा राखे पनि गोल भने निकाल्न सकेन । उज्वेकिस्तानको तास्केनमा भएको यस खेलपछि नेपालको छनोट यात्रा सकिएको छ । तीन टिम सम्मिलित छनोटमा नेपाल एक अंकसहित दोस्रो स्थानमा छ ।

फिलिपिन्स भने तीन अंकसहित शीर्ष स्थानमा छ । यसअघि नेपाल आफ्नो पहिलो खेलमा फिलिपिन्ससँग २–१ ले पराजित गरेको थियो । त्यसमा एक गोलको अग्रता लिएर पनि नेपालले अन्त्यतिर दुई गोल खाएपछि हार बेहोर्नु परेको थियो । नेपालले हङकङको सामना गरेको ३२ वर्षयता पहिलो पल्ट हो ।

हङकङविरुद्धका यसअघिका दुई खेलमा हार सामना गरेको नेपालले यसपल्ट भने नतिजामा सुधार ल्याएको छ । सन् १९८६ मा नेपाली महिला टिमले अन्तर्राष्ट्रिय फुटबलमा पहिलो पल्ट खेल्दा पनि हङकङ नै पहिलो प्रतिद्वन्द्वी टिम रहेको थियो । सन् १९८९ मा नेपालले हङकङविरुद्ध दोस्रो पल्ट खेलेको थियो ।

प्रकाशित : आश्विन ५, २०७८ १७:५५
प्रतिक्रिया
पठाउनुहोस्

सरकारले लोकतन्त्रविरोधी व्यवहार देखायो : ओली

कान्तिपुर संवाददाता

काठमाडौँ — एमाले अध्यक्ष केपी शर्मा ओलीले राजनीतिक प्रतिशोधको आधारमा सरकारले लोकतन्त्रविरोधी व्यवहार देखाएको भन्दै त्यस्ता क्रियाकलाप तत्काल बन्द गर्न चेतावनी दिएका छन् । अनेरास्ववियूको कार्यकर्ता भेला तथा शपथ ग्रहणलाई मंगलबार सम्बोधन गर्दै ओलीले कर्मचारी, शिक्षकलाई अपायक ठाउँमा सरुवा गरेर दु:ख दिएको आरोप लगाएका हुन् ।

'सरकारले अहिले हरेक कर्मचारी र हरेक शिक्षक/शिक्षिकालाई सरकारमा भएकाहरुमध्ये कुनै पार्टीको सदस्य हुनु पर्ने नभए अपायक ठाउँमा सरुवा गर्ने र दु:ख दिने काम गरिरहेको छ, यो कस्तो लोकत्नत्र हो ? कस्तो सरकार हो यो ? लोकतन्त्रसँग नमिल्ने व्यवहार ? यस्ता व्यवहार नगर्न सरकारलाई म चेतावनी दिन्छु', ओलीको भनाइ थियो,'सरकारले यस खालका क्रियाकलापहरु बन्द गर्नुपर्छ ।'.

सरकारले अमानवीय र निर्मम काम गरेको भन्दै ओलीले त्यसको भण्डाफोर गर्न समेत कार्यकर्तालाई निर्देशन दिए । 'अहिले साधारण गाउँका शिक्षक/शिक्षिकाहरु स-सना बच्चाबच्ची छ । त्यस्ता शिक्षिकालाई दुर्गममा सारिदिएको छ । कसरी जाने ? दुई घन्टा पर कसरी जाने ? यस प्रकारको अमानवीय, निर्मम व्यवहार । यो त अत्यन्तै दुष्टतापूर्ण काम हो । यस्ता काम अहिलेको सरकारले गरिरहेको छ । यो अत्यन्तै दुखद् कुरा हो । यस्ता कुराहरुको तपाईंहरुले भण्डाफोर गर्नुस्' उनको भनाइ थियो ।

ओलीले सरकार सेटिङमा लागेर केही उद्यमीलाई फाइदा पुग्ने र केहीलाई समाप्त पार्ने खेलमा लागेको समेत आरोप लगाए । ओलीले भने 'यो सरकार विकास निर्माणका आयोजना रद्द गर्नेदेखि लिएर बजेटमा मनोमौजीसँग करका दरहरु सेटिङअन्तर्गत हेरफेर भएको छ । केही उद्यमीहरुलाई फाइदा दिने, केहीलाई समाप्त पारिदिने । अधिकांश उद्योग समाप्त पारिदिने काम भएको छ भन्छन् व्यवसायीहरु । सरकारले बोल्नु पर्‍यो नि ! हो कि होइन ।'

एमालेबाट विभाजित भएर बनेको नेकपा (एकीकृत समाजवादी) दलसँगको विवादमा आफ्ना कार्यकर्तालाई गिरफ्तार गरेर सत्ता पक्षलाई संरक्षण गरेको भन्दै उनले असन्तुष्टि जनाए । 'यो सरकार खुट्टाले टेक्दैन । जिमवालाले झैं हातले टेक्छ । जो माथि हमला भएको छ । उनीहरुलाई गिरफ्तार गरेर थुन्छ । तमासा गर्छ । अरु थप के गर्‍यो थाहा छैन ?,' ओलीले उल्लेख गरे, ' युवा संघको कार्यालयमा केही गुण्डाहरुले हमला गरे । युवाहरुले यो ठीक भएन भनेर गाली गरेपछि उनीहरु त्यहाँबाट भागे । उनीहरुलाई प्रोटेक्सन गरेर युवा संघका युवाहरुलाई गिरफ्तार गर्‍यो । यो कस्तो सरकार हो ?'

प्रकाशित : आश्विन ५, २०७८ १७:५३
पूरा पढ्नुहोस्
प्रतिक्रिया
पठाउनुहोस्
×