‘ए’ डिभिजन राष्ट्रिय फुटसल लिग : शंखमूल र फुटसल फाइभको रोमाञ्चक बराबरी
काठमाडौँ — ‘ए’ डिभिजन राष्ट्रिय फुटसल लिगको आफ्नो पहिलो खेलमा उपाधि दाबेदार शंखमूलले धरानको फुटसल फाइभसँग ३–३ गोलको बराबरीमा रोकिएको छ ।
पोखरा रंगशालास्थित कभर्डहलमा आइतबारको दोस्रो खेल शंखमूलले २–० को अग्रता बनाएर पनि बराबरीमा चित्त बुझाउनुपर्यो ।
शंखमूलका लागि सुशान श्रेष्ठले तेस्रो मिनेटमै गोल गरेका थिए ११ औं मिनेटमा कृजल खड्काले गोल गरेपछि उसले अग्रता दोब्बर बनायो । पहिलो हाफको अन्तिम मिनेटमा फुटसल फाइभका प्रवेश जोशीले एक गोल फर्काएका थिए ।
दोस्रो हाफमा शंखमूलले एक गोलमात्र थप्न सक्यो । फुटसल फाइभका विजय श्रेष्ठले ३० औं मिनेटमा गोल गरी खेल बराबरीमा ल्याए ।
त्यसको दुई मिनेटपछि शंखमूलले पेनाल्टी पायो । गोलरक्षक धिरज तामाङले आफ्नो बक्सबाट बाहिर निस्केर हातले बल छोएपछि रेफ्रीले उनलाई रातो कार्ड देखाउँदै शंखमूललाई पेनाल्टीको अवसर दिएका थिए । त्यस पेनाल्टीमा गोल हुन नसके पनि त्यसको एक मिनेटपछि दोस्रो हाफमा ६ फल गरेका कारण पाएको पेनाल्टीमा शंखमूलका लक्ष्मण थापामगरले गोल गरे ।
३४ औं मिनेटमा सरोज तामाङले गोल गरेपछि फुटसल फाइभले खेल बराबरीमा ल्यायो । त्यसयता गोल हुन सकेन ।
