पारा ओलम्पिकमा ऐतिहासिक पदक जित्नबाट चुकिन् पलेशा

तेस्रो तथा निर्णायक राउन्ड ५–५ को बराबरी भयो । यसमा पलेशाले तीनपल्ट फाउल गरी विपक्षीलाई अंक सुम्पिएकी थिइन् । खेलमा जम्मा चार फाउल गरेकी उनको त्यही कमजोरी हारको कारण बन्यो । मुखमै आइसकेको पारा ओलम्पिकको ऐतिहासिक पदक गुम्यो ।

कोरोना महामारीका कारण अन्तर्राष्ट्रिय उडान बन्द हुँदा छनोट प्रतियोगिता गुमाए पनि वाइल्ड कार्डमार्फत छनोट भएकी पलेशा गज्जबको आत्मविश्वास लिएर टोकियो गएकी थिइन् । एसियन च्याम्पियनसिपमा कांस्य जितेको तथा आधा दर्जन अन्तर्राष्ट्रिय प्रतियोगिताको अनुभवका आधारमा उनी पदक दाबेदार देखिएकी थिइन् ।

पहिलो खेलमा पराजित भएपछि पलेशा रिपिचेजतर्फ धकेलिएकी थिइन्, जहाँ उनी दुई बाउट जित्दै कांस्यका लागि फाइनल पुगेकी थिइन् ।

प्रशिक्षक दीपक विष्टले उनको प्रदर्शनमा गौरव लागेको प्रतिक्रिया दिए । पहिलो खेलमै हारेपछि निराश खेलाडीलाई आशा जगाएर रिपिचेजका लागि तयार पारेको र त्यसपछि उनको प्रदर्शनबाट आफू नतमस्तक रहेको विष्टको भनाइ छ । ‘समग्रमा पलेशाको प्रदर्शन हामीले आशा गरेभन्दा धेरै माथिल्लो स्तरको रह्यो र त्यसप्रति हामीलाई गर्व छ । धेरै नै अनुभवी चिनियाँ खेलाडीलाई कडा टक्कर दिएकी हुन् । हामीलाई अनुभव र परिपक्वताको अलिकति अभाव भयो,’ विष्टले टोकियोबाट कान्तिपुरसँग भने ।

१८ वर्षीया पलेशाको पहिलो खेलमा बेलायतकी बेथ मुनरोसँग २१–८ स्कोरका आधारमा पराजित भोगेपछि स्वर्ण जित्ने बाटो रोकिएको थियो । हारका बाबजुद उनीसँग रिपिचेजको विकल्प थियो । हार्नेबीच प्रतिस्पर्धा गराएर दुई कांस्यको छिनोफानो गर्ने मार्सल आर्ट्सको नियमलाई रिपिचेज भनिन्छ । रिपिचेजको क्वाटरफाइनलमा अमेरिकी ब्रियान्ना सालिनारालाई १०–० को स्कोरमा हराएकी पलेशाले सेमिफाइनलमा सर्बियाकी मासिजा मिसेभलाई २३–१८ को प्रतिस्पर्धात्मक स्कोरमा पन्छाइन् । पारा ओलम्पिकमा दुई खेल जितेर उनले इतिहास भने कायम गरेकी छन् । पारा ओलम्पिकमा तेक्वान्दो पहिलोपल्ट समावेश गरिएको हो ।

जन्मँदै बायाँ हातको नाडीदेखि तलको भाग नभएकी पलेशाले २०१९ मा भियतनाममा भएको पाँचौं एसियाली पारा तेक्वान्दो च्याम्पियनसिपमा कांस्य जितेकी थिइन् ।

सुरुआती खेलमा पलेशालाई हराएकी ब्रिटिस खेलाडी मुनरोले रजत पदक जितेकी छन् । उनी फाइनलमा विश्व वरीयतामा शीर्ष स्थानमा रहेकी डेनिस लिसा जेसिङसँग ३२–१४ को स्कोरमा पराजित भइन् ।