ब्राजिल टाइब्रेकरमा मेक्सिकोलाई पन्छाउँदै फाइनलमा
टोकियो — डिफेन्डिङ च्याम्पियन ब्राजिल टोकियो ओलम्पिक २०२० मा मंगलबार पेनाल्टी सुटआउटमा मेक्सिकोलाई पन्छाउँदै पुरुष फुटबलको फाइनलमा प्रवेश गरेको छ ।
इबाराकी कासिमा रंगशालामा भएको सेमिफाइनलमा एक घन्टा २० मिनेट (अतिरिक्त समयको ३० मिनेटसहित) को प्रतिस्पर्धा गोलरहित सकिएपछि भएको टाइब्रेकरमा ४–१ को जित निकाल्दै ब्राजिल ओलम्पिक स्वर्णपदक रक्षाको नजिक पुगेको हो ।
ब्राजिली गोलकिपर सान्तोसले मेक्सिकोको पहिलो प्रहारमै एडुआर्डो अगुइरेलाई असफल पारिदिए । त्यसमा सान्तोसले उत्कृष्ट बचाउ गरे । त्यसपछि जोहान भास्क्वेजको प्रहारमा बल पोष्टमा लागेपछि ब्राजिललाई फाइनल प्रवेश गर्न गाह्रो भएन ।
बर्सिलोनाका पूर्वफुलब्याक ड्यानी आलभेस, ग्याब्रियल मार्टिनेली, ब्रुनो गुइमेरस र रेइनरले पेनाल्टी सुटआउटमा सटिक प्रहार गरेपछि ब्राजिल लगातार तेस्रोपल्ट ओलम्पिक फुटबलको फाइनलमा पुग्यो ।
निर्धारित समयमै ब्राजिल जितनजिक पुगेको थियो । तर, इंग्लिस प्रिमियर लिग क्लब एभर्टनका फरवार्ड रिचार्लीसनले ८२ औं मिनेटरमा गरेको हेडरमा गोलपोष्ट बाधक बनेको थियो । त्यसैले खेल टाइब्रेकरसम्म लम्बियो ।
लन्डन ओलम्पिक २०१२ मा स्वर्णको प्रतिस्पर्धामा मेक्सिकोले ब्राजिललाई २–१ ले हराएको थियो । घरेलु भूमिमा भएको रियो ओलम्पिक २०१६ मा भने ब्राजिल टाइब्रेकरमा जर्मनीलाई पराजित गर्दै पहिलोपल्ट ओलम्पिक च्याम्पियन भएको थियो ।
नेयमार प्रेरित त्यो सफलतालाई आलभेसको नेतृत्वमा ब्राजिलले टोकियोमा रक्षा गर्ने अपेक्षा गरिएको छ । ब्राजिलले योकोहामा रंगशालामा शनिबार हुने फाइनलमा दोस्रो सेमिफाइनल (जापानविरुद्ध स्पेन) को विजेतासँग प्रतिस्पर्धा गर्नेछ ।
प्रकाशित : श्रावण १९, २०७८ १९:१०