छानबिनको जिम्मा मन्त्रालयलाई दिने एन्फाको निर्णय - खेलकुद - कान्तिपुर समाचार
कान्तिपुर वेबसाईट
AdvertisementAdvertisement

छानबिनको जिम्मा मन्त्रालयलाई दिने एन्फाको निर्णय 

हिमेश

काठमाडौं — यो विवादको अन्त्य हो अथवा थप सुरुआत ? नेपाली फुटबलमा सल्केको विवाद र मतभेदपछि उत्पन्न परिस्थितिले खोजेको उत्तर कठिन छ, तर अखिल नेपाल फुटबल संघ (एन्फा) को शुक्रबार मुख्यालय ललितपुरको सातदोबाटोमा बसेको कार्यकारी समितिको बैठक नाटकीय र तनावपूर्ण रह्यो ।

दिउँसो ४ बजे सुरु हुन भनिए पनि केही ढिला सुरु भएको बैठकका क्रममा पत्रकारलाई एन्फा भवनको परिसरमै प्रवेश दिइएको थिएन । अनि एन्फाका उच्च पदाधिकारी अनिच्छुक हुँदै बोल्न करकापले मात्र तयार भए ।

एन्फा प्रवक्ता किरण राईले सुनाएका ४ निर्णय यस प्रकार रहे, त्यसमध्ये पहिले नेपाल सरकारलाई धन्यवाद दिइएको थियो । धन्यवाद किन भन्दा अक्टोबरको पहिलो साता हुने साफ च्याम्पियनसिप नेपालले आयोजना गर्न सरकारले मन्त्रीस्तरीय निर्णयबाट पाँच करोड दिन स्वीकृति दिएको छ । दोस्रो निर्णय थियो, सन् २०२२ को वुमेन्स एसिया कप छनोटमा भाग लिने र यसअगाडि इरानलगायत देशसँग मैत्रीपूर्ण खेलका लागि पत्रकार गर्ने ।

तेस्रो निर्णयअनुसार साफ च्याम्पियनसिपको तयारीका लागि नेपालले बंगलादेश, भारत र सिंगापुरसँग मैत्रीपूर्ण खेल खेल्नका लागि पत्रचार गर्ने । चौथो र सर्वाधिक महत्त्वको निर्णय थियो, राष्ट्रिय टिमका प्रशिक्षक अब्दुल्लाह अल्मुतारीको राजीनामा र यसका लागि उनले वरिष्ठ उपाध्यक्ष पंकज नेम्वाङमाथि लगाएको आरोपबारे छानबिन गर्न नेपाल सरकारको युवा तथा खेलकुद मन्त्रालयलाई अनुरोध गर्ने । यी चारै निर्णय सामान्य रहे पनि बैठक भने चर्को असामान्य रह्यो ।

परिस्थिति आफैमा जटिल थियो । बैठक सकिन अगाडि नै वरिष्ठ उपाध्यक्ष नेम्वाङसँगै दुई उपाध्यक्ष कृष्ण थापा र वीरबहादुर खड्का तथा सदस्य दावा लामा बाहिर निस्के । चारैको अनुहारमा जहाँ आक्रोश थियो, त्यहीं निराशा पनि व्यापक देखिन्थ्यो । प्रवक्ता राई ती चारै जनालाई फकाउन पनि ब्यस्त देखिएन र फेरि बैठकमा सामेल हुन अनुरोध गरिरहेका थिए । तर, उनीहरू फर्केनन् । सबैभन्दा पहिले मिडियासामु खड्का प्रस्तुत भए र उनले दाबी थियो, ‘हामी नेपाली फुटबललाई गतिरोध हुन दिन्नौं ।’

यो एक प्रकारको व्यंग्यात्मक अभिव्यक्ति थियो । उनले पछि त्यसबारे थप प्रस्ट पारे, ‘हामीले प्रशिक्षक अल्मुताइरीलाई कारवारीका लागि माग राखेका थियौं, तर त्यसलाई अध्यक्ष कर्माछिरिङ शेर्पाले अस्वीकार गर्नु भयो । उहाँले कारबाही गरे, अन्तर्राष्ट्रिय सम्बन्ध बिग्रिने बताउनुभयो, किनभने प्रशिक्षक कतारको सहयोगमा आएका हुन् ।’ त्यसपछि वरिष्ठ उपाध्यक्ष नेम्वाङले बोले । उनी थकित देखिन्थे, निराश देखिन्थे । अल्मुताइरीको समर्थनमा सामाजिक सञ्जालमा उनलाई मनपरी गाली गरिएको हुनाले आक्रोशित पनि थिए ।

उनको भनाइ थियो, ‘एन्फा नेपाली फुटबलको सर्वोच्च संस्था हो, यसबाट हामीले जुन अपेक्षा राखेका छौं, त्यो पूरा भएन । प्रशिक्षकले अनुशासन तोडेका छन् र वरिष्ठ उपाध्यक्षमाथि गम्भीर आरोप लगाएका छन् । उनीमाथि कारबाही गर्नु पर्ने थियो । उनले भलै सामाजिक सञ्जालमा राजीनामा थिए, तर औपचारिक रूपमा कतै राजीनामा दिएका छैनन् । उहाँले लगाएका विभिन्न आरोपका कारण मैले नेपाली फुटबलमा लामो समयदेखि गर्दै आएको योगदानको अवमूल्यन भएको छ ।’

उनले नेपाली फुटबलमा पछिल्लो समय विकसित भएका घटनाक्रमप्रति निराशा पनि पोखे र एन्फा आफूले गर्नु पर्ने निर्णय तथा काममा चुकेको पनि आरोप लगाए । बैठककै क्रममा प्रशिक्षक अल्मुताइरीलाई पनि बोल्ने अवसर दिएको थियो र यसक्रममा उनी आफै रिसाएर प्रस्तुत भए । बैठकका सहभागीहरूका अनुसार अल्मुताइरीले आफूलाई असुरक्षाको महसुस भएको र आफ्नो समर्थनमा एन्फा अगाडि नआएको पनि बताएका थिए ।

बैठकबाट चाँडै बाहिर निस्केकाका समूहको भनाइ थियो, प्रशिक्षक यसरी आक्रोशित भएर प्रस्तुत भएकोमै आपत्ति छ । प्रशिक्षक अल्मुताइरी एन्फा परिसरमा प्रवेश गर्दा र बाहिर निस्कँदा सुरक्षा व्यवस्था कडा गरिएको थियो । उनी मिडियासामु प्रस्तुत पनि भएनन्, खाली सामान्य प्रतिक्रियाका क्रममा सबथोक ठीक रहेको संकेतमात्र दिए । अध्यक्ष शेर्पा पनि सकेसम्म मिडियासामु आउन नै चाहेनन् । अन्त्यमा आउन त आए, तर खालि समान्य प्रतिक्रिया मात्र दिए ।

उनको भनाइ थियो, ‘मैले जे जति गर्छुं, यथार्थमा आधारित भएर मात्र गर्नेछु ।’ अब के त ? यसको उत्तर भने कोही पक्षसँग पनि रहेन । खाली भनियो, पुरुष राष्ट्रिय टिमको तयारी र प्रशिक्षण केही रोकिएको थियो, अब त्यो फेरि सुरु हुनेछ । छानबिनका लागि एन्फाले माथिको उच्च तहलाई अनुरोध गरिएको छ । त्यसले अब काम गर्नेछ । वरिष्ठ उपाध्यक्ष नेम्वाङको प्रतिक्रियाले पनि के देखिएको छ भने बैठकले समस्या समाधान गरेको छैन । स्पष्ट, नेपाली फुटबलको नेतृत्वमा मतभेद थियो, अब मनभेद पनि उत्तिकै बढेको छ ।

प्रकाशित : श्रावण १५, २०७८ २१:२६
प्रतिक्रिया
पठाउनुहोस्

थप दुई भारतीय क्रिकेटर श्रीलंकामै

एएफपी

कोलम्बो — श्रीलंका भ्रमणमा रहेका भारतका थप दुई क्रिकेटरलाई कोभिड–१९ संक्रमण भएको छ । श्रीलंकासँग समान तीन एक दिवसीय अन्तर्राष्ट्रिय र ट्वान्टी–२० खेलेको भारतीय टोली फर्किन सुरु गरेको समयमा संक्रमणमा रहेका खेलाडी भने कोलम्बोमै रहने अधिकारीहरूले शुक्रबार जनाएका छन् ।

युजभेन्द्र चहाल । फाइल तस्बिर

अलरान्डर कृष्णप्पा गोथम र बलर युजभेन्द्र चहालसँगैं क्रुनाल पाण्डेय आइसोलेसनमा बस्नेछन् । तीन खेलाडीमा कोभिड संक्रमण देखिएको श्रीलंका क्रिकेटका एक अधिकारीले जनाएका छन् । ‘यी तीन खेलाडीकै कोभिड परीक्षणमा नेगेटिभ नआएसम्म श्रीलंकामै रहनेछन्,’ ती अधिकारीले एएफपीसँग भने । भारतीय टोलीका अन्य खेलाडी बिहीबार नै स्वदेश फर्किन सुरु गरेका थिए ।

कोभिड महामारीले यस शृंखलालाई ठूलै प्रभाव पार्‍यो । श्रीलंकाका ब्याटिङ प्रशिक्षक ग्रान्ट फ्लावर र प्रशिक्षण टोलीका अर्का एक सदस्यलाई कोभिड संक्रमण देखिएपछि शृंखला ५ दिनपछि सुरु भएको थियो भने श्रीलंकाली खेलाडीको क्वारेन्टाइन अवधि बढाइएको थियो ।

पाण्डेयलाई कोभिड लागेपछि मंगलबार हुने भनिएको दोस्रो ट्वान्टी–२० अन्तर्राष्ट्रिय एक दिन पछाडि खेलाइएको थियो । त्यसपछि भारतीय टोलीका आठ सदस्य आइसोलेसनमा बसेका थिए । त्यसमा गोवथम र चहालमा कोभिड–१९ को संक्रमण पुष्टि भएको हो ।

श्रीलंकाले बिहीबार भारतलाई तेस्रो तथा अन्तिम ट्वान्टी–२० खेलमा ७ विकेटले पराजित गरी शृंखला २–१ ले जितेको थियो । दोस्रो रोजाइका अधिकांश खेलाडी सम्मिलित भारतले निर्धारित २० ओभरमा ८ विकेट विकेट गुमाइ ८१ रनमात्र बनाउन सक्यो । धनन्जय डी सिल्भाले अविजित २३ रन बनाएपछि श्रीलंकाले १५ ओभरभित्र लक्ष्य पूरा गरेको थियो ।

गत महिना श्रीलंकन खेलाडीले इंग्ल्यान्ड भ्रमणमा अनुशासन तोडेको पाइएको थियो । होटलको ‘सेक्योर बायो बबल’ तोडेको पाइएपछि तीन श्रीलंकन खेलाडीमाथि लामो समयको निलम्बन तयारी भइरहेको छ । उनीहरूलाई भारतविरुद्ध खेलाइएको थिएन । भारतीय टोली जुन २८ मा श्रीलंका आइपुगेको थियो । टोलीलाई कोलम्बोको होटलमा कडा बायोबबलका साथ राखिएको थियो ।

सबै खेलमा कोलम्बोको प्रेमदासा रंगशालामा खेलाइएको थियो । बढ्दो कोभिड–१९ को संक्रमणका कारण दर्शकलाई रंगशालाभित्र जान बन्देज लगाइएको थियो ।

श्रीलंकामा अहिलेसम्म कोभिडबाट ४ हजार ३ सय २३ जनाको मृत्यु भइसकेको तथ्यांक छ । तर स्वास्थकर्मीले यो संख्या धेरै रहेको बताउँदै आएका छन् ।

प्रकाशित : श्रावण १५, २०७८ २१:११
पूरा पढ्नुहोस्
प्रतिक्रिया
पठाउनुहोस्
×