थप दुई भारतीय क्रिकेटर श्रीलंकामै- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

थप दुई भारतीय क्रिकेटर श्रीलंकामै

एएफपी

कोलम्बो — श्रीलंका भ्रमणमा रहेका भारतका थप दुई क्रिकेटरलाई कोभिड–१९ संक्रमण भएको छ । श्रीलंकासँग समान तीन एक दिवसीय अन्तर्राष्ट्रिय र ट्वान्टी–२० खेलेको भारतीय टोली फर्किन सुरु गरेको समयमा संक्रमणमा रहेका खेलाडी भने कोलम्बोमै रहने अधिकारीहरूले शुक्रबार जनाएका छन् ।

युजभेन्द्र चहाल । फाइल तस्बिर

अलरान्डर कृष्णप्पा गोथम र बलर युजभेन्द्र चहालसँगैं क्रुनाल पाण्डेय आइसोलेसनमा बस्नेछन् । तीन खेलाडीमा कोभिड संक्रमण देखिएको श्रीलंका क्रिकेटका एक अधिकारीले जनाएका छन् । ‘यी तीन खेलाडीकै कोभिड परीक्षणमा नेगेटिभ नआएसम्म श्रीलंकामै रहनेछन्,’ ती अधिकारीले एएफपीसँग भने । भारतीय टोलीका अन्य खेलाडी बिहीबार नै स्वदेश फर्किन सुरु गरेका थिए ।

कोभिड महामारीले यस शृंखलालाई ठूलै प्रभाव पार्‍यो । श्रीलंकाका ब्याटिङ प्रशिक्षक ग्रान्ट फ्लावर र प्रशिक्षण टोलीका अर्का एक सदस्यलाई कोभिड संक्रमण देखिएपछि शृंखला ५ दिनपछि सुरु भएको थियो भने श्रीलंकाली खेलाडीको क्वारेन्टाइन अवधि बढाइएको थियो ।

पाण्डेयलाई कोभिड लागेपछि मंगलबार हुने भनिएको दोस्रो ट्वान्टी–२० अन्तर्राष्ट्रिय एक दिन पछाडि खेलाइएको थियो । त्यसपछि भारतीय टोलीका आठ सदस्य आइसोलेसनमा बसेका थिए । त्यसमा गोवथम र चहालमा कोभिड–१९ को संक्रमण पुष्टि भएको हो ।

श्रीलंकाले बिहीबार भारतलाई तेस्रो तथा अन्तिम ट्वान्टी–२० खेलमा ७ विकेटले पराजित गरी शृंखला २–१ ले जितेको थियो । दोस्रो रोजाइका अधिकांश खेलाडी सम्मिलित भारतले निर्धारित २० ओभरमा ८ विकेट विकेट गुमाइ ८१ रनमात्र बनाउन सक्यो । धनन्जय डी सिल्भाले अविजित २३ रन बनाएपछि श्रीलंकाले १५ ओभरभित्र लक्ष्य पूरा गरेको थियो ।

गत महिना श्रीलंकन खेलाडीले इंग्ल्यान्ड भ्रमणमा अनुशासन तोडेको पाइएको थियो । होटलको ‘सेक्योर बायो बबल’ तोडेको पाइएपछि तीन श्रीलंकन खेलाडीमाथि लामो समयको निलम्बन तयारी भइरहेको छ । उनीहरूलाई भारतविरुद्ध खेलाइएको थिएन । भारतीय टोली जुन २८ मा श्रीलंका आइपुगेको थियो । टोलीलाई कोलम्बोको होटलमा कडा बायोबबलका साथ राखिएको थियो ।

सबै खेलमा कोलम्बोको प्रेमदासा रंगशालामा खेलाइएको थियो । बढ्दो कोभिड–१९ को संक्रमणका कारण दर्शकलाई रंगशालाभित्र जान बन्देज लगाइएको थियो ।

श्रीलंकामा अहिलेसम्म कोभिडबाट ४ हजार ३ सय २३ जनाको मृत्यु भइसकेको तथ्यांक छ । तर स्वास्थकर्मीले यो संख्या धेरै रहेको बताउँदै आएका छन् ।

प्रकाशित : श्रावण १५, २०७८ २१:११
प्रतिक्रिया
पठाउनुहोस्

त्रिविमा तालाबन्दी, क्याम्पसहरु पनि ठप्प

तस्बिर : केशव थापा

काठमाडौँ — त्रिभुवन विश्वविद्यालय एक सातादेखि आंशिक प्राध्यापकको तालाबन्दीले प्रभावित बनेको छ । उपकुलपति, रजिष्ट्रार, रेक्टरसहित सेवा आयोगको कार्यालयमा लगाइएको तालाका कारण लगभग विश्वविद्यालयका शैक्षिक, प्रशासनिक गतिविधि ठप्प छ ।

त्रिभुवन विश्वविद्यालयको रेक्टर कार्यलयमा गरिएको तालाबन्दी । तस्बिर : केशव थापा

यी निकायमा लगाइएको तालाले करिब २ दर्जन कार्यालयका कामकाज रोकिएको हो । आंशिक प्राध्यापकहरु नै आन्दोलनमा सहभागी भएकाले ६० भन्दा बढि आंगिक क्याम्पसको अनलाइन पठनपाठन पनि असर पुगेको छ । त्रिविको पाठ्यक्रम विकास केन्द्रले समकक्षताको प्रमाणपत्र वितरण गर्न नपाउँदा सेवा लिन आउने विद्यार्थीहरु रित्तो हात फर्कन बाध्य बनेका छन् । केन्द्रमा दैनिक ३० विद्यार्थी सेवा लिन आउँछन् ।

पुल्चोक इन्जिनियरिङ क्याम्पस

गत शुक्रबारदेखि आंशिक प्राध्यापकले करार हुनुपर्ने माग राख्दै त्रिविका महत्वपूर्ण निकायहरुमा ताला लगाएका हुन् । एकसातासम्म वार्ता र छलफलको प्रयास पनि हुन नसकेको आंशिक प्राध्यापकहरुले बताए । उपकुलपति कार्यालय अन्तर्गतको कार्यकारी, प्राज्ञिक परिषद, अन्तरराष्ट्रिय सम्बन्धन केन्द्र, योजना निर्देशनालय, कानुनी सल्लाहकारको कार्यालय, रेक्टर कार्यालय मातहतको अनुगमन निर्देशनालय, अनुसन्धान केन्द्र, समन्वय महाशाखा ठप्प बनेको छ ।

त्रिभुवन विश्वविद्यालयको रेक्टर कार्यलय

रजिष्ट्रार कार्यालयको मूलगेटमै तालाबन्दी भएका कारण त्यस परिसरमा रहेका विज्ञान प्रविधि अध्ययन संस्थान र वन विज्ञान अध्ययन संस्थान डिन कार्यालयका दैनिक कामकाज पनि अवरुद्ध बनेको छ । आर्थिक, सामान्य प्रशासन लगायत महाशाखाका काम पनि हुन सकेको छैन । पदाधिकारी लगायत कर्मचारी कार्यालय आउने हाजिर गरेर फर्कने र बस्ने गरेका छन् ।

त्रिभुवन विश्वविद्यालयको रेक्टर कार्यलयको मूल गेटमा साउन १२ गते लगाइएको अनिश्चितकालीन तालाबन्दी ।

त्रिवि सेवा आयोग कार्यालयमा समेत तालाबन्दी गरेका कारण प्राध्यापक, कर्मचारी छनोटको काममा समेत असर पुगेको छ । त्यस्तै त्रिवि अन्तर्गतको पुल्चोकस्थित इन्जिनियरिङ अध्ययन संस्थानमा सत्तारुढ दल निकट विद्यार्थी संगठनको तालाबन्दी छ । इन्जिनियरिङमा नेपाल विद्यार्थी संघ र चाबहिलस्थित पशुपति बहुमुखी क्याम्पसमा अखिल क्रान्तिकारीको तालाबन्दीले गतिविधि ठप्प बनेको क्याम्पसहरुले जनाए ।

अखिल (क्रान्तिकारी) पशुपति बहुमुखी क्याम्पस इकाइ कमिटीले विभिन्न माग राखी क्याम्पस प्रमुखको कार्यकक्षमा साउन ५ गते गरेको तालाबन्दी ।

त्रिविका आंगिक क्याम्पसहरुमा करिब दुई हजारको संख्यामा आंशिक प्राध्यापकहरु कार्यरत छन् । प्राध्यापक नै आन्दोलित बनेका कारण उनीहरुले पठनपाठन गराउने कक्षा चल्न सकेको छैन ।

पशुपति क्याम्पस

२०७४ तत्कालीन शेरबहादुर देउवा नेतृत्वको सरकारले त्रिविमा कार्यरत एक हजार चार सय २० आंशिक प्राध्यापकलाई करार गर्ने निर्णय गरेको थियो । सरकारले गरेको निर्णय पनि त्रिविले कार्यान्वयन नगरेको भन्दै पुन: देउवा प्रधानमन्त्री नियुक्ति भएसँगै आन्दोलनका कार्यक्रम थालिएको हो ।

नेविसंघ पुल्चोक इन्जिनियरिङ क्याम्पस कमिटीले आफ्ना मागलाई बेवास्ता गरेको भन्दै क्याम्पसको डिनको कार्यकक्षमा ०७७ चैत ३१ गते गरेको तालाबन्दी ।

प्रकाशित : श्रावण १५, २०७८ २१:०४
पूरा पढ्नुहोस्
प्रतिक्रिया
पठाउनुहोस्
×