१२ खेलाडीलाई शिखर अर्गनाइजेसनले दियो रोजगारी - खेलकुद - कान्तिपुर समाचार
कान्तिपुर वेबसाईट
AdvertisementAdvertisement

१२ खेलाडीलाई शिखर अर्गनाइजेसनले दियो रोजगारी 

कान्तिपुर संवाददाता

काठमाडौँ — व्यावसायिक समूह शिखर अर्गनाइजेसनले बुदोकैदो मार्सल आर्ट्सका खेलाडीलाई आफना उद्योगमा रोजगारी दिएको छ ।

दशरथ रंगशालामा एक विशेष कार्यक्रमबीच संस्थाका अध्यक्ष केदारनाथ शर्माले सात प्रदेशमा रहेका आफ्ना विभिन्न उद्योगहरूमा कामगर्ने गरी १२ खेलाडीहरूलाई नियुक्तिपत्र प्रदान गरेका थिए ।

अध्यक्ष शर्माका अनुसार रोजगारी पाएका खेलाडीहरूले उद्योगहरूमा अनुशासन अधिकृतका रुपमा काम गर्नेछन् । उनीहरूले सम्बन्धित प्रदेशअन्तर्गतका जिल्लामा बुदोकैदो मार्सल आर्ट्सको तालिम सञ्चालन गरेर नयाँ खेलाडी तयार पार्नेछन् ।

‘खेलाडीहरूलाई जीविकामा सहयोग पुगोस् र प्रोत्साहन होस् भनेर नेपालको खेल क्षेत्रको विकासका लागि पनि सहयोग पुगोस भन्ने उद्धेश्यले हामीले खेलाडीहरूलाई रोजगारी दिएका हौं,’ अध्यक्ष शर्माले भने । शिखर अर्गनाइजेसनले २ वर्षभित्र आफ्ना अन्य उद्योग तथा कम्पनीहरूमा २ हजार खेलाडीलाई रोजगारीको अवसर प्रदान गर्ने अध्यक्ष शर्माले बताए ।

व्यावसायिक घरानाबाट खेलाडीहरूलाई रोजगारीको अवसर सिर्जना हुँदा आफूहरु निकै उत्साहित भएको खेलाडी योगेन्द्र बोहोराले बताए । रोजगारी पाएकी खेलाडी शान्ति लामाले शिखर अर्गनाइजेसनले खेलाडीलाई रोजगारी दिएर सह्रानीय काम गरेको बताउँदै खुसी लागेको बताइन् ।

बुदोकैदो मार्सल आर्ट्सका अध्यक्ष काजीमान श्रेष्ठले खेलाडीहरूका लागि यसरी राम्रो सुविधासहित रोजगारीको अवसर सिर्जना हुँदा यसले नेपालमा विकास गरिएको बुदोकैदो मार्सलआर्ट्सलाई विश्वभरि चिनाउन सहयोग पुग्ने बताए । शिखर अर्गनाइजेसनले विभिन्न खाद्य सामग्री उत्पादन तथा बिक्रीवितरण गर्दै आएको छ ।

प्रकाशित : श्रावण १५, २०७८ १३:०८
प्रतिक्रिया
पठाउनुहोस्

लुम्बिनी प्रदेशप्रमुख अमिक शेरचनद्वारा पदभार ग्रहण

अमृता अनमोल

बुटवल — लुम्बिनी प्रदेशका नवनियुक्त प्रदेशप्रमुख अमिक शेरचनले पदभार ग्रहण गरेका छन् । प्रदेशप्रमुखको कार्यालय बुटवलमा शुक्रबार दिउँसो उनले पदभार ग्रहण गरेका हुन् ।

पदभार ग्रहणपछि शेरचनले प्रदेशलाई संवैधानिक तरिकाले अगाडि बढाउने बताए । संविधानलाई आफूअनुकूल व्याख्या गर्ने वा संविधानविपरीत हिँड्ने अवस्था नआओस् भन्ने आमनागरिकको चाहना रहेकाले आफूले त्यसको पालना गर्ने उनले जनाए ।

‘म प्रदेशमा अप्रिय विवाद देख्न नपर्ने अवस्था सिर्जना गर्न चाहन्छु,’ उनले भने, ‘विवाद देखे त्यसलाई सुल्झाउन लाग्नुपर्छ ।’ उनले कसैप्रति असमान दृष्टि नराखी संविधानलाई आत्मसात् गरी आफ्नो कार्यकाल सफलतापूर्वक चलाउन कोसिस गर्ने बताए ।


प्रदेशलाई नमुना बनाउन सबैबाट सहयोग लिने र दलहरूसित पनि छलफल गरेर अघि बढ्ने शेरचनको भनाइ छ ।

प्रदेशप्रमुखको कार्यालयमा शेरचनलाई स्वागत गर्न कार्यालयका कर्मचारी र सुरक्षा निकायका प्रमुख सहभागी भएका थिए । माओवादी केन्द्रका नेता–कार्यकर्ता पनि उल्लेख्य संख्यामा थिए । सरकारका मन्त्री, प्रदेशसभा सदस्य, मन्त्रालयका सचिव भने उपस्थित थिएनन् ।


प्रकाशित : श्रावण १५, २०७८ १२:५२
पूरा पढ्नुहोस्
प्रतिक्रिया
पठाउनुहोस्
×