एन्फामा मतभेद चर्कंदै, आज आपत्कालीन बैठक- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

एन्फामा मतभेद चर्कंदै, आज आपत्कालीन बैठक

कान्तिपुर संवाददाता

काठमाडौँ — बढ्दो मतभेदबीच अखिल नेपाल फुटबल संघ (एन्फा) कार्यसमितिको शुक्रबार आपत्कालीन बैठक सातदोबाटोस्थित मुख्यालयमा बस्दैछ । बैठकमा मनोनीत पदाधिकारीलाई प्रवेश नदिइने भएको छ ।

दिउँदो ४ बजे बस्ने बैठक नेपाली राष्ट्रिय टिमका प्रमुख प्रशिक्षक अब्दुल्लाह अल्मुताइरीको राजीनामा प्रकरणमा केन्द्रित हुनेछ ।

सामाजिक सञ्जालबाट राजीनामा दिने घोषणा गरेका अल्मुताइरीले आफ्नो काममा एन्फाका वरिष्ठ उपाध्यक्ष पंकज नेम्वाङले अवरोध पुर्‍याउँदै आएको आरोप लगाएका थिए । नेम्वाङले पनि पूरा घटनाक्रममा निष्पक्ष छानबिन हुनु पर्ने माग गर्दै आएका छन् । एन्फाको निर्वाचन केही महिना मात्र बाँकी रहेको बेला उनी वर्तमान अध्यक्ष कर्माछिरिङ शेर्पाका प्रमुख प्रतिद्वन्द्वी रहेका छन् ।

एन्फा स्रोतका अनुसार साफ च्याम्पियनसिपनजिक रहेको स्थितिमा वरिष्ठ उपाध्यक्ष नेम्वाङ र प्रशिक्षक अल्मुताइरीबीच आपसी सहमति गराउने प्रयास पनि भइरहेको छ । तर नेम्वाङ छानबिन गर्नु पर्ने र प्रशिक्षक अल्मुताइरी राजीनामा दिने पक्षमै कायम छन् । छलफलमा साफ च्याम्पियनसिपबारे पनि छलफल हुनेछ ।

यस्तोमा बैठकमा १७ निर्वाचित पदाधिकारीसँगै महासचिव इन्द्रमान तुलाधर र कोषाध्यक्ष रवीन्द्र जोशी मात्र सहभागी हुनेछन् । बैठकमा मनोनीत पदाधिकारीलाई नबोलाउन निर्णयको विरोधमा मनोनीत उपाध्यक्ष शिक्षित पराजुलीले अबदेखि कुनै पनि कार्यसमितिको बैठकमा आफू सहभागी नहुने भन्दै निवेदन दिएका छन् ।

प्रकाशित : श्रावण १५, २०७८ ११:३९
प्रतिक्रिया
पठाउनुहोस्

सापकोटाका दुई बाल कृति सार्वजनिक

कान्तिपुर संवाददाता

काठमाडौँ — कवि एवं बाल साहित्य सर्जक शान्ति सापकोटाका दुई बाल कृति सार्वजनिक भएका छन् । बाल वाङ्मय तथा अनुसन्धान केन्द्रको आयोजनामा भर्चुअल कार्यक्रममार्फत शुक्रबार बाल कथा सङ्ग्रह 'सिमसारको शङ्खे' र बाल कविता सङ्ग्रह 'धरतीकी रानी' विमोचन भएका हुन् ।

कवि रमेशचन्द्र घिमिरेले 'धरतीकी रानी'माथि समीक्षा गर्दै प्रकृति, पारिवारिक परिवेश, ऋतु एवं बालबालिकाका आनीबानीलाई लयात्मक रूपमा प्रस्तुत गरिएको बताए । १८ कविता समेटिएको संग्रहमा रवीन्द्र मानन्धरका चित्रहरू समावेश छन् । ४० पृष्ठको किताबको मूल्य २५० रुपैयाँ तोकिएको छ।

यस्तै, 'सिमसारको शङ्खे'मा पर्यावरणलाई प्राथमिकतामा राखी जीवजन्तु र पक्षीका कथाहरू समेटिएको बाल साहित्य सर्जक नेत्र तामाङले टिप्पणी गरेका थिए । जीवजन्तुबाहेक एक कथामा मानवीय संवेदना प्रस्तुत गरिएको उनले बताए । ५ वटा कथा रहेको संग्रहमा कीर्तिकिशोर जोशीका चित्रहरू समावेश छन् । ३२ पृष्ठको किताबको मूल्य १५० रुपैयाँ तोकिएको छ ।

कार्यक्रमका प्रमुख अतिथि कवि रमेश खकुरेलले सापकोटाको लेखनबारे चर्चा गरेका थिए ।

दुवै पुस्तकलाई विवेक सिर्जनशील प्रकाशनले बजारमा ल्याएको छ ।

प्रकाशित : श्रावण १५, २०७८ १०:४१
पूरा पढ्नुहोस्
प्रतिक्रिया
पठाउनुहोस्
×