श्रीलंकाले जित्यो भारतविरुद्धको ट्वान्टी–ट्वान्टी सिरिज- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

श्रीलंकाले जित्यो भारतविरुद्धको ट्वान्टी–ट्वान्टी सिरिज

एजेन्सी

कोलम्बो — श्रीलंकाले तेस्रो तथा अन्तिम ट्वान्टी–ट्वान्टीमा बिहीबार राति भारतलाई सात विकेटले पराजित गर्दै तीन खेलको सिरिज २–१ ले जितेको छ । श्रीलंकाका लागि वानिन्डु हसरंगाले चार ओभरमा ९ रन मात्र दिएर चार विकेट लिए ।

त्यस प्रदर्शनअगाडि भारत २० ओभरमा आठ विकेट गुमाएर ८१ रन मात्र बनाउन सक्यो । हसरंगा तेस्रो खेलका म्यान अफ द म्याच र म्यान अफ द सिरिज दुवै भए । भारतको ब्याटिङ मात्र होइन, बलिङ र फिल्डिङ दुवै राम्रो रहेन ।

श्रीलंकाले १४.३ ओभरमा तीन विकेट गुमाएर जितका लागि आवश्यक ८२ रन बनायो ।

क्रुनाल पान्ड्या कोभिड १९ संक्रमित भएपछि भारतीय टिमका अधिकांश प्रमुख खेलाडी आइसोलेसनमा छन् । उनीहरू यो खेल खेल्नबाट वञ्चित रहे । भारतले यसअघि वान डे सिरिज जितेको थियो ।

प्रकाशित : श्रावण १५, २०७८ ०७:५२
प्रतिक्रिया
पठाउनुहोस्

भैंसी व्यापारीसँग कोरोना खोप किनेर लगाउँदा पक्राउ

वीरेन्द्र केसी

अर्घाखाँची — सन्धिखर्क नगरपालिका–४ का चोपनारायण श्रेष्ठले भारतीय एक भैंसी व्यापारीसँग किनेर एक साताअघि आफू, श्रीमती, छोरा र छिमेकीसमेत सात जनालाई कोरोनाविरुद्धको खोप लगाए । वाङ्लास्थित सन्देश नेवारी खाजाघरभित्र खोप लगाएको तस्बिर उनले सामाजिक सञ्जाल फेसबुकमा राखे ।

अर्घाखाँचीको सन्धिखर्क नगरपालिका–४ वाङ्लास्थित सन्देश नेवारी खाजाघरमा खोप लगाइँदै । तस्बिर : चोपनारायण श्रेष्ठको फेसबुकबाट

तर यसरी तस्बिर सार्वजनिक भएपछि उनले सास्ती बेहोर्नुपरेको छ । उनले प्रहरीलाई चारपटक बयान नै दिइसकेका छन् । प्रहरी निगरानीमै रहेका उनले फेसबुकबाट खोप लगाएको तस्बिर भने हटाइसकेका छन् ।

प्रहरीले श्रेष्ठसँग खोप कसरी आयो भन्नेबारेमा सोधपुछ गरेको छ । ‘कोरोनाविरुद्धको खोप कहाँबाट ल्याइयो भन्नेबारेमा अनुसन्धान भइरहेको छ,’ प्रहरी नायब उपरीक्षक अम्बरबहादुर थापाले भने, ‘बोलाएका बेला आउने गरी श्रेष्ठलाई निगरानीमा राखेका छौं ।’ प्रहरीका अनुसार श्रेष्ठले नेपाल–भारत सीमाबाट भैंसी व्यापारीले ल्याइदिएको खोप होटलमा ल्याएर लगाएको बताएका छन् ।

‘खोप लगाउन पाइएन । भैंसी खरिद गर्न गाउँमा आउने व्यापारीले सीमातिर खोप पाइन्छ ल्याइदिऊँ भनेर सोधेका थिए । पाइन्छ भने ल्याइदिनूस् भनें, एक महिनापछि खोप ल्याइदिए,’ श्रेष्ठले भनेका छन्, ‘वाङ्लामा मेडिकल चलाउने मेरो मामाको छोरो दीपक श्रेष्ठलाई बोलाएर म, श्रीमती, छोरोसहित छिमेकीले खोप लगायौं ।’ भैंसी व्यापारीलाई आफूले फेरि देखे चिन्ने बताए पनि उनले घर र ठेगाना थाहा नभएको बताए । श्रेष्ठले प्रतिडोज खोप एक हजार रुपैयाँमा किनेको बताए । त्यो खोप एक पटक लगाए पुग्ने भैंसी व्यापारीको भनाइ थियो ।

प्रहरीले उनका छोरालाई पनि बयानका लागि बोलाउने गरेको छ । खोप लगाइदिने दीपक श्रेष्ठ पनि प्रहरी निगरानीमा छन् । उनले आफूले भेरोसेल खोप लगाइदिएको प्रहरीलाई बताएका छन् । खोप लगाउनेहरू २० देखि ५८ वर्षसम्मका छन् ।

‘श्रीमती घरमै छिन्, अरू कोही काठमाडौं गए, कोही काम गर्न विभिन्न ठाउँ गए,’ चोपनारायण श्रेष्ठले भने । प्रहरीले खोप ल्याउने ती व्यापारीलाई हाजिर गराउन भनेको छ । उल्फतमा आइलागेको झमेला टुंग्याउन भैंसी व्यापारी आए भने प्रहरीकहाँ बुझाउने सोचाइमा श्रेष्ठ छन् । प्रमुख जिल्ला अधिकारी विष्णु पौडेलले खोप सरकारी निकायभन्दा गैरकानुनी बाटोबाट ल्याइएकाले अनुसन्धान भइरहेको बताए । ‘कस्तो खोप हो, कहाँबाट ल्याएको हो भन्नेबारे अनुसन्धान भइरहेको छ,’ उनले भने । श्रेष्ठले खोपको खोल जलाएको बयान दिएका छन् ।

सरकारले जिल्ला जनस्वास्थ्य र गाउँका स्वास्थ्यचौकीमार्फत कोरोनाविरुद्धको खोप लगाउँदै आएको छ । जनस्वास्थ्य कार्यालयका सूचना अधिकारी विजय विकले वाङ्लामा उनीहरूलाई सरकारी निकायको अनुमतिबाट खोप नलगाइएको बताए । ‘भ्याक्सिन स्वास्थ्यचौकीमै लगाइन्छ, होटलमा होइन,’ उनले भने ।

प्रकाशित : श्रावण १५, २०७८ ०७:४३
पूरा पढ्नुहोस्
प्रतिक्रिया
पठाउनुहोस्
×