कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: १५५

शान्त ओलम्पिक 

तामझामबिना नै टोकियो ओलम्पिक २०२० को उद्घाटन भयो, अब सबैको ध्यान ११ हजारभन्दा बढी खेलाडीमध्ये कसले पदक जित्ने भन्नेमा केन्द्रित हुनेछ
राजु घिसिङ

टोकियो — शक्ति र समृद्धि देखाउने अवसर हो, ओलम्पिक खेलकुद । १२५ वर्ष लामो इतिहासमा ओलम्पिकको उद्घाटन समारोह आयोजक देशले निकै तामझाम गर्दै आएका थिए । तर, ३२ औं संस्करणको उद्घाटन समारोह त्यस्तो भव्य भएन ।

शान्त ओलम्पिक 

टोकियोस्थित ओलम्पिक रंगशालाको समारोहमा न हजारौं कलाकार थिए, न त प्यारापिट भरिने गरी दर्शक नै । विश्वकै शीर्ष नेताहरूको उपस्थिति रहने परम्पराले पनि निरन्तरता पाएन । झन्डै चार घण्टाको समारोहमा प्रविधिको भने उच्चतम प्रयोग गरियो जसका कारण टेलिभिजन र डिजिटल प्लेटफर्मका दर्शकले भने भव्य महसुस गरे ।

प्रत्येक चार वर्षमा आयोजना गरिने ओलम्पिक विश्वयुद्धको समयमा तीन संस्करण स्थगित भएको थियो । त्यसबाहेक ओलम्पिक सार्नुपरेको यसैपालि हो । कोरोना महामारीका कारण ग्रीष्मकालीन ओलम्पिक एक वर्ष ढिलो हुन पुग्यो । महामारीले नै टोकियो ओलम्पिक २०२० लाई सभ्य र शान्त रूप दिएको हो, तामझाममुक्त बनाएको हो । समारोहपूर्व रंगशालाको गेटबाहिर ओलम्पिक आयोजनाको विरोधमा केही स्थानीयले प्रदर्शन नै गरेका थिए । महामारीकै बेला आपत्काल लागू गरेर भएको ओलम्पिकलाई जापानी जनताले रुचाएका छैनन्, धेरै मानिस चुप बसेका छन्, थोरैले विरोध जनाएका छन् ।

आफ्नो संस्कृति विश्वलाई देखाउने अवसरमा पनि जापानले सम्झौता गर्‍यो । उसले आफ्नो सांस्कृतिक झाँकी र कलालाई थोरैमै देखायो । रंगशालालाई लेजर लाइट र आतिसबाजीले रंगीन बनाइयो । तर विगतजस्तै १ लाखभन्दा बढी हुने मानिसको उपस्थिति यसपालि १० हजार ४ सयमा झर्‍यो । यसमा मार्चपासमा सहभागी ६ हजार खेलाडी र पदाधिकारी, ९ सय अतिथि, १५ सय ब्रोडकास्टर र २ हजार पत्रकार थिए । जापानी राजधानीमा कोरोना संक्रमणले लगातार ३४ औं दिन रेकर्ड बनाएकाले पनि ६८ हजार दर्शक क्षमताको रंगशाला खाली भएको हो ।

जापानी वर्णमालाको क्रमअनुसार २०४ देशसहित शरणार्थी टिमका खेलाडी र पदाधिकारीले मार्चपास गरे । लैंगिक समानतालाई जोड दिइएको यो ओलम्पिकमा नेपालको राष्ट्रिय झन्डा पौडी खेलाडी गौरिका सिंह र अलेक्जेन्डर (एलेक्स) शाहले बोके । जुडोकी सोनिया भट्ट र सुटिङकी कल्पना परियार भने शनिबार बिहानै प्रतिस्पर्धा गर्नुपर्ने भएकाले मार्चपासमा सहभागी भएनन् । जुडोका प्रशिक्षक सूर्यनारायण श्रेष्ठ र सुटिङका असिम यादव पनि ओलम्पिक भिलेजमै रहे । राष्ट्रिय खेलकुद परिषद्का सदस्यसचिव रमेशकुमार सिलवाल र सांसद तुलसा थापासहित ६ पदाधिकारी भने मार्चपासमा हात हल्लाइरहेका थिए । यो ओलम्पिकमा नेपालका ५ खेलाडी सहभागी हुँदै छन् । त्यसमध्ये एथलेटिक्सकी सरस्वती चौधरी शनिबारमात्रै काठमाडौंबाट उड्नेछिन् ।

समारोहमा जापानका सम्राट नारुहितो, प्रधानमन्त्री योसिहिदे सुगा, अमेरिकी प्रथम महिला जिल बाइडेन, अन्तर्राष्ट्रिय ओलम्पिक कमिटीका अध्यक्ष थोमस बाखको उपस्थिति रहे पनि विगतजस्तै विश्वकै शीर्ष नेताहरूको लस्कर टोकियोमा भएन । महामारीले सबैको मुखमा मास्क अनिवार्य बनाइदिएको छ भने अँगालो हाल्न र हाई फाइव गर्न प्रतिबन्ध लगाइएको छ ।

सन् १९६४ पछि टोकियोले फेरि ओलम्पिक आयोजना गर्दा ३३ खेलमा ११ हजार बढी खेलाडीले अगस्ट ८ सम्म प्रतिस्पर्धा गर्दै छन् । यसपालि कसले धेरै पदक जित्छ भन्दा पनि महामारीबाट सुरक्षित तरिकाले कसरी प्रतिस्पर्धा गर्ने भन्नेमै ओलम्पिकले ध्यान खिचेको छ । तर पदकको प्रतिस्पर्धा त शनिबारदेखि भइहाल्छ नै ।

ओलम्पिक ज्योति बाल्दै जापानी टेनिस खेलाडी नाओमी ओसाका ।

प्रकाशित : श्रावण ९, २०७८ ०६:४८
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?