वेस्ट इन्डिजमाथि अस्ट्रेलिया ठूलो अन्तरले विजयी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

वेस्ट इन्डिजमाथि अस्ट्रेलिया ठूलो अन्तरले विजयी

एजेन्सी

ब्रिजटाउन — अस्ट्रेलियाले वेस्ट इन्डिजविरुद्धको तीन एकदिवसीय शृंखलामा बुधबार विजयी सुरुवात गरेको छ । पाहुना टिमले डकवर्थ लेविस नियमअन्तर्गत १ सय ३३ रनको ठूलो अन्तरको जित निकालेको हो ।

तस्बिर : क्रिकेट अस्ट्रेलिया

यससँगै उसले वान डे सिरिजमा १–० को अग्रता पनि लिएको छ । पहिले ब्याटिङ गरेको अस्ट्रेलियाले कप्तान एलेक्स क्यारीको ६७ रनको मद्दतले ४९ ओभरमा नौ विकेट गुमाएर २ सय ५२ रन बनाएको थियो ।

वर्षाले प्रभावित खेलमा घरेलु टिमले २६.२ ओभरमा सबै विकेट गुमाएर १ सय २३ रन मात्र बनाउन सक्यो । अस्ट्रेलियाका लागि माइकल स्टार्कले घातक बलिङ गरे र ४८ रन दिएर पाँच विकेट लिए ।

प्रकाशित : श्रावण ६, २०७८ ०८:३३
प्रतिक्रिया
पठाउनुहोस्

भेटिए युगान्डाका खेलाडी

एएफपी

टोकियो — जापानको ओलम्पिक प्रशिक्षण क्याम्पबाट हराएका युगान्डाका भारोत्तोलन खेलाडी जुलियस सेकिटोलेको चार दिनपछि भेटिएको प्रहरीले मंगलबार जनाएको छ । प्रहरीका अनुसार कामको खोजीमा आफू क्याम्प छाडेर हिँडेको जुलियसले बताएका छन् ।

तस्बिर : एपी

उनी क्याम्प छाडेर भागेपछि कोभिड–१९ को जोखिमका कारण ओलम्पिकमा ठूलो चासोको विषय बनेको थियो । शुक्रबार औपचारिक उद्घाटन हुने टोकियो ओलम्पिकका लागि हजारौंको संख्यामा विदेशी खेलाडी जापान आइसकेका छन् ।

‘माई प्रान्तमा उनलाई भेटिएको छ, उनमा कुनै चोट छैन । कुनै अपराधमा पनि समावेश भएका छैनन्,’ ओसाकाका एक प्रहरी अधिकारीले नाम नबताउने सर्तमा एएफपीलाई भने, ‘उनले आफ्नो परिचयपत्र बोकका थिए र उनलाई चिन्न सजिलो भयो । उनलाई टिमसँगै पठाउने हो या दूतावासमा पठाउने हो केही निश्चित भएको छैन ।’

कोभिड–१९ परीक्षणका लागि उनी शुक्रबार उपलब्ध भएका थिएनन् । होटलमा पनि उनलाई नभेटिएपछि हराएको पत्ता लागेको थियो । कोटा प्रणालीका कारण २० वर्षे यी खेलाडीले टोकियो ओलम्पिकमा खेल्न नपाउने तथ्य हालैमात्र खुलेको थियो । ओसाका प्रान्तको इजुमिसानो सहरका अधिकारीका अनुसार युगान्डामा उनको परिवारलाई पठाउन अनुरोध गरिएको एउटा चिठी उनी बसेको होटल कोठामा भेटिएको थियो ।

सेकिटोलेको मध्य जापानको नागोया, त्यसको नजिकको प्रान्त गिफु हुँदै दक्षिण माई पुगेको प्रहरीले जनाएको छ । ‘उनी आफूसँग सम्बन्ध रहेका एक व्यक्तिको घरमा भेटिएका थिए । उनले कुनै प्रतिरोध गरेनन्, खुलस्त रूपमा कुरा गरिरहेका थिए । उनको उद्देश्य के थियो भन्नेमा हामी अझै प्रश्न गरिरहेका छौं,’ ती प्रहरी अधिकारीले भने ।

गत महिना युगान्डाको प्रतिनिधिमण्डल जापान आइपुगेपछि एक प्रशिक्षकमा कोभिड– १९ संक्रमण रहेको पाइएको थियो । पछि टोलीका अर्का सदस्य पनि संक्रमित हुन पुगे । युगान्डाका विदेश मन्त्रालयका ओकेलो ओरिइमले युगान्डाका ओलम्पिक प्रतिनिधिमण्डललाई सेकिटोलेको भेट्टाइएको बारे जानकारी गराइसकेको बताए ।

‘जापान सरकारसँग उनी बेपत्ता हुनु र उनको एक्रिडिएसन कार्डले मान्यता पाएको तथ्य पाउन हामी काम गरिरहेका छौं,’ ओरिइमले भने, ‘सरकारको तर्फबाट हामीले यस घटनाका लागि जापान सरकारसँग माफी मागिसेकेका छौं । यो आचरण अस्वीकार्य र धोखा थियो ।’

जापानमा आपत्कालीन स्थितिका बाबजुद टोकियोमा कोभिड–१९ को दर बढिरहेको छ । यसले ओलम्पिकलाई चुनौती दिइरहेको छ । ओलम्पिकमा आएकाहरूले कडा अनुशासनबीच मात्र चहलपहल गर्न पाउनेछन् ।

प्रकाशित : श्रावण ६, २०७८ ०८:३१
पूरा पढ्नुहोस्
प्रतिक्रिया
पठाउनुहोस्
×