वाइल्ड कार्डले खजुरावासी खुसी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

वाइल्ड कार्डले खजुरावासी खुसी

रुपा गहतराज

नेपालगन्ज — नेपाली जुडो खेलाडी सोनिया भट्टले टोकियो ओलम्पिक २०२० का लागि वाइल्ड कार्ड प्राप्त गरेपछि गृहनगर खजुरावासीमा खुसी छाएको छ । बाँकेको खजुरा गाउँपालिका–३ सिर्जना टोलकी स्थायी बासिन्दा १९ वर्षीया सोनियाको सफलताले आफूलाई मात्र होइन, खजुराकै पहिचान थप उचाइमा पुर्‍याएको स्थानीयले बताए ।

सन् २०१९ मा बंगलादेशमा भएको जुडो च्याम्पियनसिपमा क्याडेटतर्फ ४४ केजी तौल समूहमा सोनियाले स्वर्ण पदक जितेकी थिइन् । सोही वर्ष मोरक्कोमा भएको वर्ल्ड जुनियर च्याम्पियनसिपमा उनी एक बाउट जित निकाल्दै २०० अंक बटुल्न सफल भएकी थिइन् । उनले अन्य प्रतिस्पर्धाको प्रदर्शन आधार मानेर वाइल्ड कार्ड पाएकी हुन् । सोनिया ओलम्पिकमा सहभागिता जनाउने जुडोकी पाँचौं खेलाडी हुनेछिन् ।

सोनियाले वाइल्ड कार्ड पाएको खबरपछि गृहनगरका प्रशिक्षक विजय गुरुङ निकै भावुक बने । आफैंले हात समाएर मैदानमा पुर्‍याएको खेलाडीको सफलतालाई उनले आफ्नै मिहिनेत ठानेका छन् । ‘आफूले जन्माएको खेलाडीले यति ठूलो सफलता हासिल गर्दा म कति खुसी छु, शब्दमा व्यक्त गर्नै सक्दिनँ,’ उनले भने, ‘सोनियाको सफलताले मलाई अझ निखार्ने हौसला बढायो ।’ तीन बहिनी र एक भाइको परिवारकी कान्छी छोरी सोफिया ८ वर्षकै उमेरदेखि म्याटमा रमाउँथिन् । सोनियाका गुरु गुरुङ उनलाई हात समाएर खेल्न लैजाँदाको समय सम्झिन्छन् ।

प्रशिक्षक गुरुङ सोफियाको यो सफलतालाई संघर्ष र मिहिनेतको फल भएको मान्छन् । ‘प्रशिक्षकमा खेल खेलाउने गुणमात्र होइन, प्रतिभा चिन्ने क्षमता पनि हुन्छ । त्यसैले मैले उनलाई परिवारको गाली सहेर पनि मैदानमा उतारें,’ निकै भावुक हुँदै उनले भने, ‘सोनियाले मलाई अहिले गुरु मान्छिन् कि मान्दिनन् थाहा छैन । तर, उनको सफलतालाई मैले आफ्नो मिहिनेतको प्रतिफल ठानेको छु ।’

गुरुङ अहिले पनि खजुरा गाउँपालिकाका युवा र बालबालिकालाई निःशुल्क जुडो अभ्यास गराइरहेका छन् । एउटा स्कुलले दिएको सानो कोठामा खेल सामग्री राखेर उनी खजुरालाई प्रतिभावान् खेलाडी दिन तत्पर छन् । खजुरा घर भए पनि उनी नेपालगन्जमै बस्छन् । तर, अभ्यासका लागि साँझ खजुरा पुग्छन् । दुई सिफ्टमा उनी अहिले अभ्यास गराइरहेका छन् । ‘म आफ्नै लगानीमा राम्रा खेलाडी उत्पादन गर्ने अभियानमा छु,’ उनले भने, ‘स्थानीय तहले पार्टी र जातिका आधारमा मात्र सहयोग दिन्छ । त्यसैले साथीभाइसँग हात फैलाएर भए पनि खेलाडीलाई डाइट खुवाउँछु ।’

‘खजुराले खेल संस्कार बुझेको छ, खेलको इज्जत जोगाएको छ । हिजो पनि साग मेडलिस्ट जन्मिएकै हुन्, अहिले ओलम्पिक जाने खेलाडी जन्मायो । लगानीअनुसार प्रतिफल आउँछ भन्ने खजुराले पुष्टि गरेको छ,’ खेलपत्रकार टीएस ठकुरीले भने, ‘तर अझै खेलाडीअनुसार लगानी भने पुगेको छैन ।’

भारोत्तोलनका सुरेन्द्र हमाल (लस एन्जल्स, १९८४), सुटिङका पार्वती थापा (सोल, १९८८) र अनिता श्रेष्ठ (बार्सिलोना १९९२) पछि जुडोकी सोनिया भट्टले (टोकियो, २०२०) गर्दा २८ वर्षपछि खेलाडीको सहर नेपालगन्जले ओलम्पिक रिङ चुम्दैछ । ‘यो सानो सफलता होइन । एउटा विद्यार्थीले पीएचडीको उपाधि हात पार्दाको अनुभूति जस्तै हो यो,’ ठकुरीले भने, ‘लगानीको सही सदुपयोग भएमा प्रतिफल अवश्य आउँछ भन्ने यो एउटा उदाहरण पनि हो ।’ नेपाल पुलिस क्लबमा आबद्ध सोनिया १३ औं दक्षिण एसियाली खेलकुदकी कांस्य पदक विजेता खेलाडी हुन् ।

प्रकाशित : असार २२, २०७८ १२:२२
प्रतिक्रिया
पठाउनुहोस्

संक्रमितको मृत्युपछि भेरी अस्पतालका स्वास्थ्यकर्मीमाथि हातपात

रुपा गहतराज

नेपालगन्ज — कोरोना संक्रमितको मृत्यु भएपछि उपचारमा लापरबाही गरेको भन्दै नेपालगन्जस्थित भेरी अस्पतालमा आफन्तले स्वास्थ्यकर्मीमाथि हातपात गरेका छन् ।

जेठ ४ देखि उपचाररत दाङका ५३ वर्षीय डिल्लीबहादुर रावतको उपचारका क्रममा बिहीबार राति ८ बजेतिर मृत्यु भएको थियो । उनको मृत्युपछि आक्रोशित आफन्तले स्वास्थ्यकर्मीमाथि आक्रमण गर्नुका साथै अस्पतालको आईसीयू कक्षमा तोडफोड गरेको प्रहरीले जनाएको छ ।

घटनामा चार नर्सिङ स्टाफ र एक जना चिकित्सक घाइते भएका छन् । ड्युटीमा खटिएका बेला आफूमाथि हातपात सुरु भएपछि अस्पतालभित्र स्वास्थ्यकर्मीको भागाभाग भएको नर्सिङ अधिकृत शिला शर्माले बताइन् । ‘बिरामीलाई बचाउन हरसम्भव प्रयास गरेका हौं । आफ्नै ज्यान बचाउन शौचालयमा लुकेर बस्नुपर्ने घटना भयो,’ उनले भनिन् ।

परिवारलाई जानकारीबिना भेन्टिलेटरमा राखेर उपचार गराउँदा मृत्यु भएको भन्दै रावतका आफन्तले स्वास्थ्यकर्मीमाथि आक्रमण गरेको बाँकेका कोरोना फोकल पर्सन तेज वलीले बताए । स्वास्थ्यकर्मीहरूलाई लखेट्दै हातपात गर्न थालेपछि अस्पतालमा हल्लीखल्ली भएको थियो । आईसीयूमै छिरेर जाइलागेपछि चिकित्सकहरूले केहीबेर काम बन्द गरेका थिए । स्थिति तनावपूर्ण भएपछि अस्पतालमा प्रहरीले सुरक्षा दिएको थियो ।

घटनामा संलग्न तीन जनालाई नियन्त्रणमा लिइएको बाँकेका एसपी ओमबहादुर रानाले बताए । घटनालगत्तै अस्पताल पुगेका प्रमुख जिल्ला अधिकारी, प्रहरी प्रमुख, अस्पताल प्रशासन, अस्पताल विकास समिति प्रतिनिधिले छलफल गरेर दोषीलाई कारबाही गर्ने र अस्पतालमा भयरहित वातावरण बनाउने विषयमा परामर्श गरेका थिए ।

प्रकाशित : जेष्ठ १४, २०७८ ०६:४९
पूरा पढ्नुहोस्
प्रतिक्रिया
पठाउनुहोस्
×