स्पेनिस टोली दबाबमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

स्पेनिस टोली दबाबमा

बीबीसी

लन्डन — स्पेन कुनै समय विश्व फुटबलको प्रमुख शक्ति थियो । तर युरो २०२० मा एक अर्को अपूर्ण प्रदर्शनपछि स्पेनिस टोली समूहको अन्तिम खेलका लागि गम्भीर दबाबमा पर्दा टोलीका पूर्व उपलब्धिहरू फिक्का हुन थालेको छ । 

लुइस इनरिकेको टिम शनिबार राति पोल्यान्डसँग १–१ को बराबरीमा रोकियो । समूह ‘ई’ को पहिलो खेलमा स्पेनले स्विडेनसँग गोलरहित खेलेको थियो । यसको अर्थ तीनपल्टको युरोपियन च्याम्पियन स्पेन नकआउट चरणमा पुग्न समूहको अन्तिम खेलमा स्लोभाकियालाई हराउनैपर्ने अवस्थामा पुगेको छ ।

‘हामीलाई भाग्यको थोरै अभाव देखियो । हामीले आफ्नो जिम्मेवारी राम्रोसँग निभाएका हौं । हामीले प्रयास गरिरहेका छौं र सफल हुनेछौं,’ स्पेनिस डिफेन्डर जोर्डी अल्बाले भने, ‘हाम्रो प्रयासबारेमा कसैले पनि प्रश्न उठाउने ठाउँ छैन । हाम्रो टिमको सकारात्मक परिणाम चाहनेले प्रदर्शनमा दोष दिनु स्वाभाविक हो ।’

एकातिर स्पेनको प्रदर्शन लड्खडाइरह्यो भने पोल्यान्डका लागि त्यो ठूलो सफलता थियो । सुपरस्टार स्ट्राइकर रोबर्ट लेवान्डोस्कीले प्रतियोगितामा पहिलो गोल गरेपछि स्पेनको जित रोकेर अर्को चरणको सम्भावना कायमै राख्न पोल्यान्डले धेरै मिहिनेत गरेको छ ।

सन् २००० को दशक र २०१० को सुरुआततिर स्पेन विश्व फुटबलमा डरलाग्दो शक्तिका रूपमा उदाएको थियो । स्पेनले आफ्नो मौलिक ‘टिकीटाका’ शैलीले विश्वभरका विपक्षीलाई हायलकायल पारेको थियो । त्यसैले त २००८ र २०१२ मा लगातार युरो जित्ने कीर्तिमानसहित २०१० को विश्वकप उपाधिसमेत भित्र्याएको थियो ।

पास र बल पोसेसनमा अहिले पनि उनीहरूको प्रभाव उस्तै छ । स्विडेन र पोल्यान्डविरुद्ध क्रमशः ८५ र ७६ प्रतिशत बल पोसेसनको तथ्यांक आफैमा उत्साहजनक हो । तर, बल पोसेसन नियन्त्रणमा राखेर उपयुक्त समयमा आक्रमण गर्ने खेलाडी पनि चाहिन्छ, जसले मुस्किललाई पार लगाउन सकोस् । उनीहरूले अहिले भोगिरहेको समस्या यही हो ।

‘फुटबल अहिले पनि एक शारीरिक खेल हो,’ जर्मनीका पूर्व प्रशिक्षक योर्गेन क्लिन्सम्यानले स्पेनी फुटबलबारे टिप्पणी गरेका छन्, ‘कार्लोस पुयोल, सर्जियो रामोस, सर्जियो बुस्केटहरूले विपक्षीलाई एउटा डर देखाउँथे । त्यो युद्धमैदान जस्तै हुन्थ्यो । अहिलेको स्पेनिस टोली प्राविधिक रूपमा सशक्त छ, उनीहरूलाई मैदानमा कसरी उपयुक्त क्षेत्र निर्माण गर्ने भन्ने थाहा छ । तर, उनीहरूप्रतिको डर बाँकी रहेन ।’

‘जब विपक्षी मैदानमा आउँछन् । त्यहाँ उनीहरूले वार्मअपमा रहेको स्पेनी टिममा पुयोल र रामोस देख्दैनन् भने मनमनै खुसी व्यक्त गर्छन्, हामीलाई अब अवसर भन्ने हुन्छ,’ क्लिन्सम्यानले थपे । स्पेनले २ खेलमा २९ पल्ट पोस्ट आक्रमण गरेको छ तर एक गोलमात्र गरेको छ । पोल्यान्डविरुद्ध अल्भारो मोराटाको क्लोज रेन्ज गोल सुरुमा अफसाइड भएको भन्दै खारेज गरिए पनि भिडियो असिस्टेन्ट रेफ्री (भार) ले मान्यता दिएको थियो ।

पहिलो खेलमा स्विडेनविरुद्ध दुई सानदार अवसर खेर फालेपछि मोराटाले आलोचना खेप्नुपरेको थियो । तर कमजोर आक्रमणका लागि स्पेनको अग्रपंक्तिमा उनीमात्र एक्ला खेलाडी होइनन् । पोल्यान्डसँग जेरार्ड मोरेनोले पेनाल्टी प्रहार पोस्टमा लागेर गोल हुन सकेन । ड्यानी ओल्मोले परिवर्तित हुनुअघि एकमात्र पोस्ट आक्रमण गर्न सके ।

‘स्पेनिस टिममा अहिले धेरै राम्रा खेलाडीको उपस्थिति छ,’ इंग्ल्यान्डका पूर्व डिफेन्डर मिका रिचर्डसले भने, ‘मानिसहरूले हल्ला गरेजस्तो स्पेनमा नाम चलेका सुपर स्टारको कमी भएजस्तो मलाई लाग्दैन । उनीहरूले मात्र एकजना स्ट्राइकरको अभाव महसुस गरिरहेका छन्, जसले अवसरलाई गोलमा परिणत गर्न सकोस् ।’ स्पेनिस फुटबल लेखक गुइलेम बालाग भने स्ट्राइकरको अभावमात्र स्पेनको कमजोरी भएको स्विकार्न तयार छैनन् । ‘योभन्दा खराब मिडफिल्ड स्पेनिस टोलीमा मैले अहिलेसम्म देखेको छैन,’ उनको विश्लेषण छ ।

स्पेनसँग परिस्थिति परिवर्तन गर्ने अझै समय छ । समूह ‘ई’ मा सबै टोलीको सम्भावना खुला छ । स्पेनसँग पहिलो हाफमा पोल्यान्डको अवस्था निरीह देखिएको थियो । तर लेवान्डोस्कीले गोलको खाता खोल्दा आशा जीवित भएको छ । बायर्न म्युनिकका यी सुपरस्टार पछिल्ला वर्षहरूमा क्लब र अन्तर्राष्ट्रिय फुटबलमा उच्च लयमा छन् । सन् २०१९/२० को सिजन ४७ खेलमा ५५ गोल गरेपछि उनी फिफा अवार्डबाट सम्मानित भएका थिए । तर उनी आफ्नो देशका लागि प्रमुख प्रतियोगितामा संघर्षरत छन् । युरोका १३ खेलमा उनको यो तेस्रो गोल हो ।

प्रकाशित : असार ७, २०७८ ०७:५५
प्रतिक्रिया
पठाउनुहोस्

पोग्बाको प्रभाव

बीबीसी

पेरिस — फ्रान्सले युरो २०२० जितेको खण्डमा यस वर्षको बालोन डी’अर एनगोलो कान्टे वा केलियन एमबाप्पेले जित्ने भविष्यवाणी गर्न कठिन छैन । किनभने यी दुईले क्लब फुटबलमा आफ्नो क्लबलाई उच्च सफलता दिलाएका थिए । मंगलबार राति समूह ‘एफ’ अन्तर्गत फ्रान्सले जर्मनीलाई हराएपछि यो सूचीमा पाउल पोग्बाको नाम किन छैन त ? 

इटालीका महान गोलरक्षक जियानलुइगी बुफोनले युभेन्ट्सका तत्कालीन सहकर्मी पोग्बाले बालोन डी’अर जित्ने भविष्यवाणी सात वर्षअघि नै गरेका थिए । उनले भनेका थिए, ‘उनी त्यस्ता खेलाडीमध्येका सर्वगुण सम्पन्न खेलाडी हुन् ।’ आफू त्यस्तै छु भनेर पोग्बाले एलियान्ज एरिनामा साबित गरेका छन् । तर कसैले यो दाबी गर्न सकेका छैनन् कि पोग्वा यो वर्ष विश्व फुटबलको सर्वश्रेष्ठ खेलाडीको नजिक छन् ।

म्युनिकमा फ्रान्सको १–० को जितमा उनको प्रभावशाली प्रदर्शन अविश्वसनीय थियो । धेरैलाई उनको यो अपवादको प्रदर्शनजस्तो लागेको छ । यो नै उनको करिअरको निराशाजनक सत्य हो ।

म्यानचेस्टर युनाइटेडका समर्थकहरूले यो सोच्न छुट पाउनेछन् । गत महिना भिल्लारियलसँगको युरोपा लिग फाइनलमा यी निपुण पोग्बा कहाँ थिए ? तर २८ वर्षीय यी मिडफिल्डर लामो समयदेखि क्लब र राष्ट्रिय टोलीका लागि फरक खेलाडी रहे । तथ्यहरूले प्रस्ट पार्छ भने उनको खुट्टाले ओल्ड ट्राफोर्डको तुलनामा अन्तर्राष्ट्रिय एरिनामा सहज महसुस गर्दछ ।

‘म्यानचेस्टरमा मलाई बक्सभित्र जाने स्वतन्त्रता त छ तर त्यहाँ मेरो मुख्य जिम्मेवारी डिफेन्सिभ हो,’ पोग्बाले फ्रान्सेली दैनिक पत्रिकासँग भने, ‘फ्रान्सले ४–२–३–१ फर्मेसनबाट खेल्ने गर्छ । म राष्ट्रिय टोलीमा थोरै अगाडि बढेर खेल्न पाउँछु । मलाई बक्समा जान र गोलको प्रयास गर्न म्यानचेस्टरभन्दा बढी स्वतन्त्रता छ ।’

जर्मनीविरुद्ध उनी मैदानभरि छाएका थिए । ट्याकल, पास र समग्र खेल अगाडि बढाउने कला देख्दा मैदानमा उनीमात्र थिए । एनगोलो कान्टेसँग खेल्दै गर्दा अधिक राहत महसुस गर्न सकिने उनको बुझाइ छ । चेल्सीका यी स्टारले पनि सानदार खेल प्रदर्शन गरे । तर त्योभन्दा पोग्बाको आफ्नो उच्चस्तरको प्रदर्शन थियो ।

डिफेन्समा उनले अन्य खेलाडीले भन्दा धेरै १२ पल्ट पोजिसन ग्रहण गरे । जबकि अन्य खेलाडी बढीमा तीनपल्टसम्म बल खोस्न सफल थिए । अग्रपंक्तिमा पनि उनको उत्तिकै प्रभाव रह्यो । लुकास हर्जान्डेजको प्रहार म्याट्स हमल्सको खुट्टामा लागेर गोल हुनुअघिको बल उनैले असिस्ट गरेका थिए । उनी एमबाप्पे र करिम बेन्जेमाले गरेका दुई असफल गोलमा पनि अप्रत्याशित रूपमा सामेल थिए ।

त्यति हुँदाहुँदै खेलभरि धेरै फाउल गर्ने खेलाडी उनै पोग्बा थिए । विपक्षी डिफेन्डर एन्टोनियो रुडिगरले ढाडमा टोक्ने प्रयास गरेको घटनाले पनि चर्चा पायो । जे भए नि उनले आफ्नो सम्पूर्ण कौशलको प्रदर्शन गरेका थिए । निःसन्देह उनी खेलको म्यान अफ द म्याच चुनिए । तर उनले विश्वकै सर्वश्रेष्ठ फुटबलरको उपाधि पाउन कि पाउँदैनन् भन्ने चाहिँ स्पष्ट भएको छैन ।

प्रकाशित : असार ३, २०७८ ०९:२१
पूरा पढ्नुहोस्
प्रतिक्रिया
पठाउनुहोस्
×