हंगेरीले फ्रान्सलाई बराबरीमा रोक्यो
बुडापेस्ट — हंगेरीले विश्व च्याम्पिन फ्रान्सलाई शनिबार युरो २०२० मा १–१ को बराबरीमा रोकेको छ । समूह ‘एफ’ को खेलमा हंगेरीले सुरुआती अग्रता लिए पनि त्यसलाई कायम राख्न सकेन । तर एक अंक बटुल्न भने सफल रह्यो र ‘ग्रुप अफ डेथ’ समूहबाट नकआउट पुग्ने सम्भावना कायम राख्यो ।
फ्रेन्क पुस्कास रंगशालामा ६७ हजार दर्शक अगाडि भएको खेलमा हंगेरीले पहिलो हाफको इन्ज्युरी समयमा अग्रता लिएको थियो । एटिला फिओलाले सुन्दर गोल गरेका हुन् । फ्रान्सले ६६ औं मिनेटमा बराबरी गोल फर्काएको थियो । एन्टोन ग्रिजमनले नजिकको दूरीबाट शक्तिशाली प्रहारमा गोल गरे ।
यो नतिजापछि फ्रान्सको दुई खेलबाट चार अंक भएको छ । फ्रान्सले आफ्नो पहिलो खेलमा जर्मनीलाई हराएको थियो । हंगेरी भने डिफेन्डिङ च्याम्पियन पोर्चुगलको हातबाट पराजित भएको थियो । पोर्चुगलको ३ अंक रहेको छ भने जर्मनी बिना कुनै अंक अन्तिम स्थानमा रहेको छ ।
प्रकाशित : असार ५, २०७८ २०:५६