युरो-२०२० को नकआउट चरण पुग्ने चेकको बलियो सम्भावना- खेलकुद - कान्तिपुर समाचार

युरो-२०२० को नकआउट चरण पुग्ने चेकको बलियो सम्भावना

एजेन्सी

ग्लास्गो — चेक गणतन्त्रले युरो २०२० को नकआउट चरणमा पुग्ने बलियो सम्भावना देखाएको छ । क्रोएसियासँग शुक्रबार ह्याम्पडेन पार्कमा भएको रोमाञ्चक खेलमा १–१ को नतिजा निकालेपछि चेक अन्तिम १६ को नजिक पुगेको हो ।

तस्बिर : रोयटर्स

चेकले पहिलो खेलमा स्कटल्यान्डलाई २–० ले पराजित गरी सनसनी सुरुआत गरेको थियो ।

क्रोएसियासँगको चार खेलमा चेकले कहिल्यै विजय हात पारेको छैन् । तर पछिल्लो नतिजाले चेकलाई समूह ‘डी’ को शीर्ष स्थानमा उभ्याएको छ । चेकले अव अन्तिम खेलमा इंग्ल्यान्डसँग वेम्बलीमा खेल्ने छ । पहिलो खेलमा इंग्ल्यान्डसँग पराजित क्रोएसियाले अन्तिम १६ मा पुग्न स्कटल्यान्डलाई पराजित गर्न पर्नेछ । क्रोएसियालाई स्कटल्यान्डसँगको विजय पनि अघिल्लो चरणमा पुग्न पर्याप्त नहुन सक्छ ।

चेकले प्याट्रिक सिकको पेनाल्टी गोलमा ३७ औं मिनेटमा अग्रता लिएको थियो । क्रोएसियाका रक्ष डेजान लोभरेनले एयर बल क्लियर गर्नेक्रममा सिकलाई कुहिनोल हानेपछि रेफ्री कार्लोस डेल सेरो ग्रान्डेले भीएआरसँग परामर्श गरी मैदानको छेउमा रहेको मोनिटर हेरेर पेनाल्टीको निर्णय दिएका थिए । घुडाको चोटका कारण अघिल्लो खेल गुमाएका लोभरेनको प्रहार सिकको नाक फुटेको थियो ।

उनै सिकले गोल गरी चेकको अग्रता खोलेका थिए । प्रतियोगितामा बायर लेभरकुसेनका फरवार्डको यो तेस्रो गोल हो । इन्टर मिलानका फरवार्ड इभान पेरिसिजले मध्यान्तर लगत्तै व्यक्तिगत प्रयासमा उत्कृष्ट गोल गरी क्रोएसियालाई बराबरीमा ल्याए । उनी चार प्रमुख प्रतियोगितामा गोल गर्ने क्रोएसियाका पहिलो खेलाडी बने । उनले २०१४ को विश्वकप, युरो २०१६, विश्वकप २०१८ र यस पटक गोल गरेका हुन्

प्रमुख प्रतियोगितामा भने चेक र क्रोएसियाको यो केवल दोस्रो खेल हो । युरो २०१६ मा यी दुई बीचको खेलमा २–२ को बराबरीमा टुंगिएको थियो ।

प्रकाशित : असार ५, २०७८ ००:३२
प्रतिक्रिया
पठाउनुहोस्

'चीनतर्फ पहिरोले तामाकोसीको प्रवाह रोकिएको सूचना आयो, सतर्क रहनू'

कान्तिपुर संवाददाता

काठमाडौँ — जिल्ला प्रशासन कार्यालय दोलखाले पहिरोका कारण चीनतर्फ तामाकोसी नदीको प्रवाह रोकिएकाले तटीय क्षेत्रमा सतर्कता अपनाउन आग्रह गरेको छ ।

फाइल तस्बिर

शुक्रबार राति ९ बजेर ४५ मिनेट जाँदा जिल्ला प्रशासन कार्यालयले सूचना जारी गर्दै नेपाल–चीन सीमा क्षेत्रमा रहेको तिङग्री काउन्टीको रोङ्जिया सहरमा पहिरोका कारण नदीको प्रवाह रोकिएको सूचना प्राप्त भएको बताएको हो । रोङ्जिया सहर र आसपासमा भारी वर्षासँगै आएको पहिरोले नदीको प्रवाह रोकिएको सूचना प्राप्त भएको कार्यालयले जनाएको छ ।

कार्यालयले तामाकोसी नदीमा जुनसुकै बेला पानीको मात्रा बढेर बाढी आउन सक्ने भएकाले सतर्क रहन आग्रह गरेको छ ।

जिल्ला प्रशासन कार्यालयद्वारा जारी सूचनामा भनिएको छ, 'नेपाल चीन सीमा क्षेत्रमा रहेको तिङ्ग्री काउन्टीको रोङ्जी सहर र सोको आसपासमा भारी वर्षा आएसँगै पहिरो आउँदा नदीको प्रवाह रोकिन गएको सूचना प्राप्त हुन आएकोले सोको कारणले कुनै पनि समयमा तामाकोसी नदीमा पानीको मात्रा बढेर बाढी आउन सक्ने हुँदा नेपाल चीन सीमा नजिकको बस्तीलगायत तामाकोसी नदीको तटीय क्षेत्रमा जोखिम सिर्जना हुन सक्ने सम्भावना देखिएकोले सो क्षेत्रमा बसोबास गर्नुहुने सम्पुर्ण दिदीबहिनी तथा दाजुभाइहरु सतर्क र सजक रहन एवं कुनै खतराको संकेत प्राप्त हुँदा साथ सुरक्षित स्थानतर्फ जान हुन र स्थानीय तहका पदाधिकारी र नजिकको सुरक्षा निकायमा तुरुन्त जानकारी समेत गराउनु हुन अनुरोध गरिन्छ ।'


प्रकाशित : असार ५, २०७८ ००:२८
पूरा पढ्नुहोस्
प्रतिक्रिया
पठाउनुहोस्
×