पोग्बाको प्रभाव- खेलकुद - कान्तिपुर समाचार

पोग्बाको प्रभाव

बीबीसी

पेरिस — फ्रान्सले युरो २०२० जितेको खण्डमा यस वर्षको बालोन डी’अर एनगोलो कान्टे वा केलियन एमबाप्पेले जित्ने भविष्यवाणी गर्न कठिन छैन । किनभने यी दुईले क्लब फुटबलमा आफ्नो क्लबलाई उच्च सफलता दिलाएका थिए । मंगलबार राति समूह ‘एफ’ अन्तर्गत फ्रान्सले जर्मनीलाई हराएपछि यो सूचीमा पाउल पोग्बाको नाम किन छैन त ? 

इटालीका महान गोलरक्षक जियानलुइगी बुफोनले युभेन्ट्सका तत्कालीन सहकर्मी पोग्बाले बालोन डी’अर जित्ने भविष्यवाणी सात वर्षअघि नै गरेका थिए । उनले भनेका थिए, ‘उनी त्यस्ता खेलाडीमध्येका सर्वगुण सम्पन्न खेलाडी हुन् ।’ आफू त्यस्तै छु भनेर पोग्बाले एलियान्ज एरिनामा साबित गरेका छन् । तर कसैले यो दाबी गर्न सकेका छैनन् कि पोग्वा यो वर्ष विश्व फुटबलको सर्वश्रेष्ठ खेलाडीको नजिक छन् ।

म्युनिकमा फ्रान्सको १–० को जितमा उनको प्रभावशाली प्रदर्शन अविश्वसनीय थियो । धेरैलाई उनको यो अपवादको प्रदर्शनजस्तो लागेको छ । यो नै उनको करिअरको निराशाजनक सत्य हो ।

म्यानचेस्टर युनाइटेडका समर्थकहरूले यो सोच्न छुट पाउनेछन् । गत महिना भिल्लारियलसँगको युरोपा लिग फाइनलमा यी निपुण पोग्बा कहाँ थिए ? तर २८ वर्षीय यी मिडफिल्डर लामो समयदेखि क्लब र राष्ट्रिय टोलीका लागि फरक खेलाडी रहे । तथ्यहरूले प्रस्ट पार्छ भने उनको खुट्टाले ओल्ड ट्राफोर्डको तुलनामा अन्तर्राष्ट्रिय एरिनामा सहज महसुस गर्दछ ।

‘म्यानचेस्टरमा मलाई बक्सभित्र जाने स्वतन्त्रता त छ तर त्यहाँ मेरो मुख्य जिम्मेवारी डिफेन्सिभ हो,’ पोग्बाले फ्रान्सेली दैनिक पत्रिकासँग भने, ‘फ्रान्सले ४–२–३–१ फर्मेसनबाट खेल्ने गर्छ । म राष्ट्रिय टोलीमा थोरै अगाडि बढेर खेल्न पाउँछु । मलाई बक्समा जान र गोलको प्रयास गर्न म्यानचेस्टरभन्दा बढी स्वतन्त्रता छ ।’

जर्मनीविरुद्ध उनी मैदानभरि छाएका थिए । ट्याकल, पास र समग्र खेल अगाडि बढाउने कला देख्दा मैदानमा उनीमात्र थिए । एनगोलो कान्टेसँग खेल्दै गर्दा अधिक राहत महसुस गर्न सकिने उनको बुझाइ छ । चेल्सीका यी स्टारले पनि सानदार खेल प्रदर्शन गरे । तर त्योभन्दा पोग्बाको आफ्नो उच्चस्तरको प्रदर्शन थियो ।

डिफेन्समा उनले अन्य खेलाडीले भन्दा धेरै १२ पल्ट पोजिसन ग्रहण गरे । जबकि अन्य खेलाडी बढीमा तीनपल्टसम्म बल खोस्न सफल थिए । अग्रपंक्तिमा पनि उनको उत्तिकै प्रभाव रह्यो । लुकास हर्जान्डेजको प्रहार म्याट्स हमल्सको खुट्टामा लागेर गोल हुनुअघिको बल उनैले असिस्ट गरेका थिए । उनी एमबाप्पे र करिम बेन्जेमाले गरेका दुई असफल गोलमा पनि अप्रत्याशित रूपमा सामेल थिए ।

त्यति हुँदाहुँदै खेलभरि धेरै फाउल गर्ने खेलाडी उनै पोग्बा थिए । विपक्षी डिफेन्डर एन्टोनियो रुडिगरले ढाडमा टोक्ने प्रयास गरेको घटनाले पनि चर्चा पायो । जे भए नि उनले आफ्नो सम्पूर्ण कौशलको प्रदर्शन गरेका थिए । निःसन्देह उनी खेलको म्यान अफ द म्याच चुनिए । तर उनले विश्वकै सर्वश्रेष्ठ फुटबलरको उपाधि पाउन कि पाउँदैनन् भन्ने चाहिँ स्पष्ट भएको छैन ।

प्रकाशित : असार ३, २०७८ ०९:२१
प्रतिक्रिया
पठाउनुहोस्

पहिरोले कर्णाली राजमार्ग बन्द

कालीकोट, जुम्ला र मुगुका लागि दैनिक उपभोग्य सामान र निर्माण सामग्री बोकेका गाडी बाटोमै रोकिए
तुलाराम पाण्डे

कालीकोट — तीन दिनदेखिको अविरल वर्षापछिको पहिरोले कर्णाली राजमार्ग सुर्खेत–जुम्ला सडकको ठाउँठाउँमा पहिरो खस्दा अवरुद्ध भएको छ । दैलेखको किटु, कालीकोटको गगनेखोला, हुल्म, सुनार खोला, पिली सेराबाड, खल्लागाड, भिग्मलगायत ठाउँमा पहिरो खसेको छ ।

पहिरोले अवरुद्ध बनाएको कर्णाली राजमार्गको दैलेख–किटु सडकखण्ड । तस्बिर : कान्तिपुर

राजमार्ग अवरुद्ध हुँदा कालीकोट, जुम्ला र मुगुका लागि दैनिक उपभोग्य सामान र निर्माण सामग्री बोकेका गाडी बाटोमै रोकिएका छन् । केही ठाउँमा मंगलबार पहिरो पन्छाए पनि वर्षा नरोकिएकाले राजमार्ग पुनः अवरुद्ध भएको प्रमुख जिल्ला अधिकारी कृष्णप्रसाद आचार्यले बताए ।

पहिरोले सडक अवरुद्ध हुँदा बाटोमा सास्ती भएको सुर्खेतबाट जुम्ला जान सोमबार बिहान ५ बजे हिँडेका समाज कल्याण परिषद्का सदस्य गोविन्दबहादुर शाहीले बताए । उनका अनुसार ६/७ ठाउँमा ठूला पहिरो गए पनि ४०/५० ठाउँमा साना पहिरो खसेका छन् । ‘अत्यावश्यक कामका लागि लकडाउनको समयमा हिँडे पनि गन्तव्यमा पुग्न सकिएको छैन,’ उनले भने, ‘पानी नरोकिएकाले अझै कति दिन बाटोमा बस्नुपर्ने हो निश्चित छैन ।’

एक सातायता दैनिकजसो वर्षा हुन थालेपछि कालीकोटको जनजीवन प्रभावित भएको छ । वर्षाले ठाउँठाउँमा पहिरो खसेपछि जिल्लाका अधिकांश ग्रामीण सडक अवरुद्ध बनेका छन् । अविरल वर्षाका कारण ताडी–तिलाकर्णाली बहुमुखी क्याम्पस, थामकोट–बल्लेकाध हुँदै सालडाँडा, शुभकालिकाको सेरिघाट–भर्ता र सेरीघाट–सुकाटिया सडक बन्द हुन् । त्यस्तै लालीघाट– कोटवाडा, सान्नीगाड– मेहेलमुडीलगायतका सडकका ठाउँठाउँमा पहिरो खसेको प्रहरीले जनाएको छ । वर्षाले रोपाइँ गर्ने कृषकलाई राहत भए पनि स्थानीयको जग्गासमेत भत्काएको छ ।अविरल वर्षाले विकासका काम पनि बन्द छन् । हतारमा सम्झौता गरेर सुरु गरिएका विभिन्न योजनाका काम पनि प्रभावित भएको नागरिक अगुवा विक्रमबहादुर शाहीले बताए । उनका अनुसार वर्षाकै कारण गत वर्षको संसद् विकास कोषका योजनाका काम पनि अधुरै बनेका छन् ।

वर्षासँगै गत वर्षको पहिरोले घर क्षतिग्रस्त भएका पीडित परिवारलाई पनि बासको समस्या थपिएको छ । वर्षा हुन थालेपछि रास्कोट–१ चोक्टेबगरका २५ परिवार विस्थापित भएका स्थानीय धनगिरी शाहीले बताए । ‘गत वर्षको पहिरोमा ज्यान जोगाउन त सफल भइयो,’ उनले भने, ‘यसपालि कसरी जोगिने भन्ने चिन्ता छ ।’ उनले पुनःस्थापनाका लागि कर्णाली प्रदेश सरकारले बजेट दिए पनि काम हुन बाँकी रहेको गुनासो गरे ।

वर्षाबाट हुन सक्ने क्षति कम गर्न पूर्वतयारीमा जुटेको जिल्ला विपद् व्यवस्थापन समितिका संयोजक एवं प्रजिअ आचार्यले बताए । ‘पानी परेपछि पहिरो झरिहाल्ने समस्या बढी छ,’ उनले भने, ‘पूर्वतयारी गर्न सकिएन भने फेरि विपद्ले सताउनेछ ।’ उनले बाढी पहिरोबाट स्थानीयलाई सुरक्षित गर्न उद्धार, राहत र पुनःस्थापनाको योजना अघि सारिएको बताए । दुई साताअघि कर्णाली प्रदेशका मुख्यमन्त्री महेन्द्रबहादुर शाहीको सहभागितामा बसेको जिल्ला विपद् व्यवस्थापन समितिको बैठकले गत वर्ष जिल्लाभर भत्किएका १ हजार १ सय घर निर्माणका लागि सहयोग गर्ने निर्णय गरेको छ । जसका लागि प्रदेश सरकारले ५ करोड रुपैयाँ विनियोजन गरेको छ । बैठकले स्थानीय तहमा सडक अवरुद्ध नहुँदै आवश्यक खाद्यान्न र उद्धार सामग्री भण्डारण गर्ने, प्रत्येक वडामा उद्धारमा सहयोग गर्न खोज तथा उद्धार टोली गठन गर्नेलगायतका निर्णयसमेत गरेको थियो ।

प्रकाशित : असार ३, २०७८ ०९:२१
पूरा पढ्नुहोस्
प्रतिक्रिया
पठाउनुहोस्
×