रुसमाथि बेल्जियम हाबी, फिनल्यान्डको पनि जित
सेन्ट पिटर्सबर्ग — विश्व वरीयताको शीर्ष स्थानमा रहेको बेल्जियमले शनिबार युरो २०२० मा विजयी सुरुआत लिएको छ । बेल्जियमले रुसलाई ३–० ले हरायो । बेल्जियमको यो जितमा रोमेलु लुकाकुले दुई गोल गरे ।
समूह ‘बी’ को खेलमा उनले खेलको १० र ८८औं मिनेटमा गोल गरे । त्यसबीच थोमस मेउनियरले ३४औं मिनेटमा दोस्रो गोल थपे । लयमा रहेका लुकाकुले आफ्नो गोलपछि त्यसलाई क्रिस्टियन एरिक्सनप्रति समर्पित गरे ।
दुवै खेलाडी इन्टर मिलानबाट खेल्ने गर्छन् । एरिक्सन यसअघि डेनमार्क र फिनल्यान्डबीचको खेलको पहिलो हाफ समाप्त हुन लाग्दा अचेत भएर मैदानमै ढलेका थिए । मैदानमै उपचार गरेपछि उनलाई अस्पताल लगिएको थियो ।
त्यस स्थितिमा स्थगित गरिएको खेल एरिक्सनको स्वास्थ्यमा सुधार आएपछि फेरि सुरु गरिएको थियो । त्यसमा भने फिनल्यान्ड १–० ले विजयी रह्यो । जोएल पोजानपालोले ६०औं मिनेटमा निर्णायक गोल गरे ।