ब्राजिलको जित, अर्जेन्टिना बराबरीमा रोकियो

नेयमारले चौथो मिनेटमा गोलको खाता खोले भने लुकास पाक्वेटाले दोस्रो हाफको इन्जुरी समयमा दोस्रो गोल थपे । यो जितपछि ब्राजिल ६ खेलबाट १८ अंकसहित दस टिम सम्मिलत छनोटको शीर्ष स्थानमा छ ।

दोस्रो स्थानमा रहेको अर्जेन्टिना भने अर्को खेलमा कोलम्बियासँग २–२ को बराबरीमा रोकियो । अहिलेसम्म अपराजित अर्जेन्टिनाले ६ खेलमध्ये तीनवटामा बराबरी खेलिसकेको छ। अर्जेन्टिनाले दुई गोलको अग्रता लिए पनि त्यसलाई कायम राख्न सकेन ।

सुरुआती आठ मिनेटभित्र क्रिस्टियन रोमेरो र लियानड्रो पारेडेसले गोल गरेका थिए । लुइस मोरेलले कोलम्बियाका लागि पहिलो गोल गरेपछि म्यागुएल बोरजाले बराबरी गोल फर्काए । यस्तै भेनेजुएला र उरुग्वेले गोलरहित बराबरी खेले । अन्य खेलमा पेरुले इक्वेडरलाई २–१ ले हरायो भने चिली र बोलिभियाले १–१ को बराबरी खेले ।