उत्कृष्ट पुर्नआगमन जितसँगै काठमाडौं प्ले अफमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

उत्कृष्ट पुर्नआगमन जितसँगै काठमाडौं प्ले अफमा

कान्तिपुर संवाददाता

काठमाडौँ — दुई गोलले पछाडि रहेको स्थिति उल्टाएर काठमाडौं रेजर्सले बिहीबार नेपाल सुपर लिगमा उत्कृष्ट पुर्नआगमन जित रचेको छ । यससँगै प्ले अफमा स्थान बनाउने दोस्रो टिम बनेको छ । काठमाडौंले विराटनगर सिटी एफसीलाई ५–४ ले हरायो र पाँच खेलबाट १० अंकसहित दोस्रो स्थानमा उक्लिन सफल रह्यो ।

प्रतियोगिताको अहिलेसम्मकै सर्वाधिक रोमाञ्चक खेलमा काठमाडौंका लागि क्यामरुनी खेलाडी मेसोके ओलोमोउले ह्याट्रिक गरे र यो नै प्रतियोगिताको पहिलो तीन गोलको प्रदर्शन रह्यो । दशरथ रंगशालामा भएको खेलमा विराटनगरले सुरुमा दुई गोल गरेको थियो र खेल उसको पक्षमा जाने संकेत देखिएको थियो ।

नाइजेरियाका एडेलेजा सोमेडेले छैटौं मिनेटमा पहिलो गोल गरे भने उरुग्वेली स्पेनी खेलाडी पेड्रो मान्जीले १६ औं मिनेटमा दोस्रो गोल थपे । त्यसयता काठमाडौंका लागि ओलोमोउले ३५ र ३६ औं मिनेटमा दुई गोल गरे । लगतै क्यामरुनकै स्टेफन बियोङले ४१ औं मिनेटमा फ्रि किकबाट गोल गरे । फ्रि किकबाट भएको यो प्रतियोगिताको पहिलो गोल रह्यो ।

खेलको ६८ औं मिनेटमा ओलोमोउले ह्याट्रिक पूरा गरे । खेलमा गोलको क्रम यत्तिकैमा रोकिएन । कप्तान विक्रम धिमालले ७९ औं मिनेटमा शक्तिशाली प्रहारबाट विराटनगरका लागि तेस्रो गोल गरे भने छिरिङ गुरुङले ८२ औं मिनेटमा काठमाडौंका लागि पाँचौ गोल थपे । मान्जीले इन्ज्युरी समयको चौथो मिनेटमा आफ्नो दोस्रो गोल गरे । विराटनगर सात अंकमा तेस्रो स्थानमा रह्यो ।

प्रकाशित : वैशाख २३, २०७८ १९:५२
प्रतिक्रिया
पठाउनुहोस्

अनुराग भन्छन्, 'अवस्था ठीक रहे अर्को वर्ष फिल्म सुटिङ गर्न नेपाल आउँछु'

कान्तिपुर संवाददाता

काठमाडौँ — बलिउड निर्देशक अनुराग कश्यपले फिल्म सुटिङका लागि नेपाल आउने चाह व्यक्त गरेका छन् । बिहीबारबाट सुरु भएको नेपाल अन्तराष्ट्रिय चलचित्र महोत्सव (नीफ)को पहिलो दिन 'च्याट विथ अनुराग'मा बोल्दै कश्यपले नेपाल आउने चाह व्यक्त गरेका हुन् । 

'म धेरै वर्षअघि नेपाल आएको थिएँ । अब मलाई नेपालमा फिल्म सुटिङ गर्ने मन छ । एभरेस्ट बेस क्याम्पमा जाने भित्री सपना छ । मसँग हिमालमा खिच्नुपर्ने एउटा फिल्मको स्क्रिप्ट छ । अवस्था सामान्य भयो भने अर्को वर्ष यो फिल्म सुटिङ गर्न म नेपाल आउँछु,' कश्यपले भने।

महोत्सवको भर्चुअल छलफलमा कश्यपले आफूले दुई नेपाली फिल्म हेरेको पनि जानकारी गराए । उनले दीपक रौनियारको 'सेतो सूर्य' र मीन भामको 'कालो पोथी' हेरेको बताए । छलफलको क्रममा उनलाई मनपर्ने स्वतन्त्र फिल्मकर्मी को-को हुन् भनि प्रश्न गर्दा उनले दीपक र मीनको नाम पनि लिए ।

उनले नेपालले नेपालकै कथामा फिल्म निर्माण गर्नुपर्ने पनि सल्लाह दिए । 'कलालाई विश्वले हेर्न सक्छ । स्थानीय कथामा फिल्म बनायो भने त्यो विश्वको लागि नयाँ हुन जान्छ । जब तपाईंले आफ्नो कथामाथि फिल्म बनाउन सुरु गर्नुहुन्छ, त्यसपछि आम्दानीको ढोका खुल्दै जानेछ,' उनले भने, 'यहाँ फिल्म उद्योग नभएको देशहरु खासै छैनन् । तपाईंले बनाउने नेपाली फिल्मले विश्वमा अर्थ राख्छ। त्यस किसिमको फिल्म बनाउने हुटहुटी हुनुपर्‍यो ।'

प्रकाशित : वैशाख २३, २०७८ १९:४०
पूरा पढ्नुहोस्
प्रतिक्रिया
पठाउनुहोस्
×