नेपाल सुपर लिग : काठमाडौं तेस्रोमा, बुटवल लुम्बिनीको पहिलो हार- खेलकुद - कान्तिपुर समाचार

नेपाल सुपर लिग : काठमाडौं तेस्रोमा, बुटवल लुम्बिनीको पहिलो हार

कान्तिपुर संवाददाता

काठमाडौँ — नेपाल सुपर लिगमा बुटवल लुम्बिनी एफसीले मंगलबार एक्लो अपराजित टिमको परिचय गुमाएको छ । उसलाई काठमाडौं रेजर्सले १–० ले हरायो । यो जितपछि काठमाडौं तेस्रो स्थानमा उक्लिन सफल रह्यो । उसको सात अंक भयो । बुटवल लुम्बिनी भने पाँच अंकमै सीमित रहेर चौथो स्थानमा झर्‍यो ।

आक्रामक ढंगले सुरु भएको खेलको पाँचौं मिनेटमा काठमाडौंका स्टेफेन बिलोङले निर्णायक गोल गरे । सुदिल राईको लामो पासमा बिलोङले विपक्षी गोलरक्षक विशाल श्रेष्ठविरुद्ध वान भर्सेस वानमा गोल गरे । लगत्तै छैटौं मिनेटमा बुटवल लुम्बिनीले पेनाल्टीको अवसर पाएको थियो, तर त्यसमा विलियम ओपोकु गोल गर्न चुके ।

विश्वास श्रेष्ठले सुमन लामालाई लडाएपछि प्राप्त पेनाल्टीमा ओपोकुको प्रहार काठमाडौंका गोलरक्षक विकेश कुथुले सजिलै जोगाए । पहिलो हाफ जति आक्रामक र तीव्र गतिले खेल भएको थियो, दोस्रो हाफ भने त्यस्तो रहेन । दोस्रो हाफ धेरै हदसम्म सुस्त रह्यो र दुवै टिमका खेलाडी थाकेका पनि देखिए ।

यो खेलसँगै प्रतियोगिताको चौथो चरणको खेल समाप्त भएको छ । विराटगनर सिटी एफसी सात अंकसहित शीर्ष स्थानमा छ भने समान सात अंकमा धनगढी एफसी दोस्रो स्थानमा छ । अब अन्तिम दुई चरणका खेल हुनेछन् र यसले शीर्ष चारमा रहने टिमको निर्णय गर्नेछ । लिग चरणको समाप्तीमा शीर्ष चारबीच प्ले अफ र इलिमिनेटरका खेल हुनेछन् ।

अंक तालिका

टिम खेल जित बराबरी हार गोल अंक

विराटनगर ४ २ १ १ ७–३ ७

धनगढी ४ २ १ १ ७

प्रकाशित : वैशाख २१, २०७८ १९:३५
प्रतिक्रिया
पठाउनुहोस्

अमेरिकामा कार्यरत नेपाली अनुसन्धानकर्तालाई २ लाख ९७ हजार डलरको अवार्ड

इकान्तिपुर डेस्क

काठमाडौँ — एक नेपाली अनुसन्धानकर्ताले अमेरिकाको प्रतिष्ठित नेशनल साइन्स फाउण्डेशन (एनएसएफ)अवार्ड पाएका छन् ।

अमेरिकाको केन्टकी राज्यस्थित क्याम्बेल्सविल विश्वविद्यालयमा उपप्राध्यापकको रुपमा कार्यरत भौतिकशास्त्री डा. इन्द्रदेव साहुले २ लाख ९७ हजार डलर (करिब ३ करोड ५० लाख रुपैयाँ) राशिको अवार्ड पाएका हुन् । अमेरिकाको संघीय सरकार मातहतको अमेरिकी राष्ट्रिय विज्ञान प्रतिष्ठान ले यो अवार्ड साहुलाई अनुसन्धातवृत्तिका लागि दिएको हो ।

पोटासियम च्यानल एसेसरी प्रोटिन(केसीएनई३) को संरचना र गतिशिलताको अध्ययनका लागि साहुले यो अनुदान पाएका हुन् । केसीएनई३ स्वास्थ्यसँग सम्बन्धित प्रोटिन रहेको साहुले कान्तिपुरलाई बताए । ‘यो प्रोटिन स्वास्थ्य रोगसँग सम्बन्धित छ । विशेष गरी मुटुसँग सम्बन्धित प्रोटिन पनि हो,’ उनले कान्तिपुरसित फोन कुराकानीमा भने,‘यो प्रोटिनको अध्ययनले मुटु सम्बन्धीको गतिशिलता अध्ययनमा थप जानकारी पाइन्छ ।’

यो अनुसन्धानवृत्ति उनले मार्चमा पाएका हुन् । एनएसएफ अमेरिकाको संघीय सरकार मातहतको निकाय हो ।एनएसएफले दिने यो अनुदान(अवार्ड ) पाउनका लागि निकै प्रतिस्पर्धा हुने गर्छ । आफूले पाएको अनुदान रकम विश्वविद्यालयभित्रै खर्च हुने उनले सुनाए ।

सप्तरीको महदेवा गाउँपालिका–२ अकवरपुर घर भएका ४३ वर्षीय साहु क्याम्बेल्सविल विश्वविद्यालयमा बायोमेडिकल फिजिक्स सम्बन्धीको विषयमा अध्ययन, अनुसन्धान र अध्यायपन गराउँछन् । उनको यो रकम तीन वर्षभित्रमा अनुसन्धानमा खर्च गर्नुपर्नेछ । उनले भने,‘नेपाली अनुसन्धानकर्ताहरुका लागि पनि यो अवसर र हौसला हुन सक्छ ।’ निरन्तरको लगनशिलता र लगावका कारणले यो उपलब्धि हासिल गरेको उनले बताए ।

सन् २००९ मा स्टेट युनिर्भसिटी अफ न्यूयोर्कबाट विद्यावारिधि गरेपछि साहुले वाहायो राज्यको मायामी विश्वविद्यालयमा पोस्ट डक्टरल र रिसर्च साइन्टिस्टको रुपमा काम गरेका थिए ।

प्रकाशित : वैशाख २१, २०७८ १९:२७
पूरा पढ्नुहोस्
प्रतिक्रिया
पठाउनुहोस्
×