नेपाल सुपर लिग : विराटनगरको जितमा मेन्जी र सन्तोषको उत्कृष्ट गोल- खेलकुद - कान्तिपुर समाचार

नेपाल सुपर लिग : विराटनगरको जितमा मेन्जी र सन्तोषको उत्कृष्ट गोल

कान्तिपुर संवाददाता

काठमाडौँ — उरुग्वेली स्पेनी खेलाडी पेड्रो नेपाल सुपर लिग खेलिरहेका सबैभन्दा प्रतिष्ठित खेलाडी हुन् । उनले आफ्नो यही परिचय अनुसार सोमबार दशरथ रंगशालामा उत्कृष्ट गोल पनि गरे । नेपाली खेलाडीमध्ये सन्तोष तामाङ राम्रो देखिएका छन् । उनले पनि उत्तिकै उत्कृष्ट गोल गरे ।

यही प्रदर्शनको मदतले विराटनगर सिटी एफसीले एफसी चितवनलाई २–० ले हरायो र शीर्ष स्थानमा उक्लिन सफल रह्यो । यो जितपछि विराटनगरको चार खेलबाट सात अंक भएको छ । धनगढी एफसी समान सात अंक रहेको छ । विराटनगर गोल अन्तरले धनगढी भन्दा अगाडि रहेको हो ।

सुनिल बलले ७३ औं मिनेटमा फ्रि किकबाट दिएको पासलाई मेन्जीले नियन्त्रणमा लिए र पेनाल्टी एरियाको ठीक बाहिरबाट हाफ भलीमा शक्तिशाली प्रहार गरेर गोल गरे । आर्मीका सन्तोषले पनि ८८ औं मिनेटमा पेनाल्टी एरियाको ठीक बाहिरबाट शक्तिशाली प्रहार गर्दै बललाई पोस्टको दिशा दिएका हुन् ।


सन्तोषको यो तेस्रो गोल हो । मेन्जीको भने व्यक्तिगत गोल संख्या दुई पुगेको छ । पराजित चितवन भने अन्तिम स्थानमा रहेको छ र उसको चार खेलबाट दुई अंक मात्र छ । दोस्रो हारपछि चितवनको शीर्ष चारको सम्भावना अझ कमजोर भएको छ । यसको ठीक विपरिच विराटनगर र धनगढीको शीर्ष चारको सम्भावना भने बलियो बनेको छ ।

प्रकाशित : वैशाख २०, २०७८ १९:३४
प्रतिक्रिया
पठाउनुहोस्

गण्डकी र सुदूरपश्चिमका नवनियुक्त प्रदेश प्रमुखले लिए शपथ

कान्तिपुर संवाददाता

काठमाडौँ — गण्डकी र सुदूरपश्चिमका नवनवियुक्त प्रदेश प्रमुखले पद तथा गोपनियताको शपथ लिएका छन् । राष्ट्रपति विद्यादेवी भण्डारीले गण्डकी प्रदेश प्रमुख सीताकुमारी पौडेल र सुदूरपश्चिम प्रदेश प्रमुख गंगाप्रसाद यादवलाई पद तथा गोपनियताको शपथ ग्रहण गराएकी हुन् ।

गण्डकी र सुदूरपश्चिम प्रदेशका लागि नवनियुक्त प्रमुखहरूले सोमबार राष्ट्रपतिको कार्यालय शितल निवासमा शपथ लिएको राष्ट्रपति कार्यालयका प्रवक्ता रूपनारायण भट्टराईले जानकारी दिए ।

पौडेल र यादवले संविधानको धारा १६७ बमोजिम प्रदेश प्रमुख पदको पद तथा गोपनियताको शपथ लिएका भट्टराईले विज्ञप्ति जारी गरेर जानकारी दिएका हुन् ।

सोमबार बसेको मन्त्रिपरिषद्को बैठकले गण्डकी प्रदेशका प्रदेश प्रमुख अमिक शेरचन र सुदूरपश्चिमकी प्रदेश प्रमुख शर्मिला पन्तलाई पदमुक्त सिफारिस गरेको थियो । उक्त सिफारिस बमोजिम राष्ट्रपति भण्डारीले दुवैलाई पदमुक्त गरेकी थिइन् ।

मन्त्रिपरिषद्को सोही बैठकले प्रदेश प्रमुखमा पौडेल र यादवलाई सिफारिस गरेको थियो । उक्त सिफारिसअनुसार नै राष्ट्रपतिले नियुक्त गरी पद तथा गोपनियताको शपथ गराएकी हुन् ।

शपथ ग्रहण कार्यक्रममा प्रधानमन्त्री केपी शर्मा ओली, राष्ट्रिय सभाका अध्यक्ष गणेशप्रसाद तिमिल्सिना लगायतको उपस्थिति थियो ।

प्रकाशित : वैशाख २०, २०७८ १९:१४
पूरा पढ्नुहोस्
प्रतिक्रिया
पठाउनुहोस्
×