ईएसएलको विरोधमा फिफा

इन्फान्टिनोले युरोपेली फुटबल महासंघको समर्थन गर्दै युरोपेली च्याम्पियन्स लिग र घरेलु लिगलाई कमजोर पार्ने कुनै पनि कदम स्विकार्य नहुने पनि बताए । उनले फिफा कंग्रेसमा भने, ‘हाम्रो काम भनेको युरोपेली खेल ढाँचालाई जोगाउनु हो । यहीं कोही कसैले आफ्नै शैलीले काम गर्न खोज्छ भने त्यसबाट उत्पन्न हुने परिणामको जिम्मेवारी उसकै हुनेछ ।’

इंग्ल्यान्डका ६ र स्पेन तथा इटालीका ३–३ गरेर १२ शक्तिशाली क्लबले भर्खरै पृथक ईएसएल गर्ने घोषणा गरेका हुन् । त्यसमा सहभागी हुने संस्थापक सदस्यले करोडौं डलर पाउने निश्चित हुनेछ । त्यस लिगमा सहभागी हुने टिममा इंग्ल्यान्डका लिभरपुल, आर्सनल, चेल्सी, म्यानचेस्टर सिटी, म्यानचेस्टर युनाइटेड र टोटेनहम छन् ।

यस्तै स्पेनबाट रियल म्याड्रिड, एट्लेटिको म्याड्रिड र बार्सिलोना तथा इटालीबाट इन्टर मिलान, एसी मिलान र युभेन्ट्स छन् । अहिलेको च्याम्पियन्स लिगमा छनोट हुन सबैभन्दा पहिले आफ्नो घरेलु लिगमा नै राम्रो प्रदर्शन गर्नुपर्ने हुन्छ । छनोट भइसकेपछि पनि नकआउट चरण पुग्न कठिन समूह चरण पार गर्नैपर्ने हुन्छ । तर ईएसएलमा यसका संस्थापक सदस्यले प्रत्येक वर्ष प्रवेश पाउने निश्चत हुनेछ । यसकारण उनीहरूलाई छनोटको कठिन प्रक्रिया सामना गर्नुपर्ने छैन । यसले उनीहरूको आम्दानीमा कुनै फरक पार्ने छैन ।