लिड्ससँग लिभरपुलको बराबरी
लन्डन — डिएगो लोरेन्टले खेलको अन्त्यतिर गोल गरेपछि लिभरपुल इंग्लिस प्रिमियर लिगमा लिड्स युनाइटेडसँग १–१ को बराबरीमा रोकिएको छ । यो नतिजापछि लिभरपुलको शीर्ष चारको सम्भावनामा धक्का पुगेको छ ।
लिभरपुलले साडियो मानेको गोलले पहिलो हाफमा अग्रता लिएको थियो । तर खेल सकिनु तीन मिनेटअगाडि लोरेन्टले बराबरी गोल फर्काए । लिभरपुल ५३ अंकसहित छैटौं स्थानमा रह्यो । लिड्स भने ४६ अंकमा दसौं स्थानमा छ ।
एलान रोडमा भएको खेलका क्रममा लिड्सका समर्थकले हालै प्रस्तावित युरोपेली सुपर लिगको विरोध गरेका थिए । त्यस प्रतियोगितामा लिभरपुलसँगै इंग्लिस प्रिमियर लिगका छ क्लबले खेल्ने जनाइसकेका छन् ।