त्रिकोणात्मक ट्वान्टी–२० अन्तर्राष्ट्रिय : नेपालको ब्याटिङ र डचको हारमा कीर्तिमान

ट्वान्टी–२० अन्तर्राष्ट्रियमा डेब्यु गरिरहेका कुशल र आसिफले पहिलो विकेटमा १ सय १६ रनको साझेदारी गरेपछि नेपालले त्रिवि क्रिकेट मैदान कीर्तिपुरमा १ सय ३७ रनको लक्ष्य १५ ओभरमै १ सय ४१ रन बनाएर पूरा गर्‍यो । विजयी छक्का प्रहार गरेका कप्तान ज्ञानेन्द्र मल्ल ७ बलमा १३ रन बनाई अविजित रहे ।

कुशल र आसिफले ट्वान्टी–२० मा नेपालको सबैभन्दा ठूलो ओपनिङ साझेदारी गरे । सन् २०१९ को डिसेम्बरमा दक्षिण एसियाली खेलकुद (साग) मा पारस खड्का र ज्ञानेन्द्र मल्लले भुटानविरुद्व यसअघि १ सय ८ रनको साझेदारी गरेका थिए । कुशलले ४६ बल खेल्दै ५ चौका र ५ छक्का प्रहार गरी ६२ रन बनाए । आसिफ ५४ रनमा अविजित रहे । उनले ३८ बल खेलेर ४ चौका र ४ छक्का प्रहार गरे । कुशल निकै भाग्यमानी रहे । इनिङ्सको तेस्रो ओभरमा उनले क्याच दिन पुगेका थिए । तर भिभियन किङमाले फालेको बल नो–बल रहेका कारण जोगिएका कुशलले त्यसको अर्को बलमै चौका प्रहार गरी व्यक्तिगतसँगै टिमको खाता खोलेका थिए । त्यसपछि उनले आक्रामक भएर खेल्दा नेपालले पावर प्लेमै ६६ रन जोडेको थियो ।

त्यही नो–बलका कारण खेलको कहानी अर्कै बनेको स्विकार नगरे पनि नेदरल्यान्ड्सका कप्तान पिटर सिलार आफ्नो टोली सबै क्षेत्रमा नेपालसामु कमजोर देखिएको सुनाए । ‘त्यो विकेट भएको भए नेपाललाई हामी दबाबमा राख्न सक्थ्यौं होला, तर आजको खेल त्यतिमात्र होइन,’ सिलारले भने, ‘हामीले नेपालबाट क्रिकेटको शिक्षा पायौं । उनीहरूको विगतमा खेल्ने शैलीभन्दा फरक थियो आज । निष्पक्ष भएर भन्नुपर्दा हामीभन्दा नेपाली खेलाडी सय गुणा बढी राम्रा थिए । राम्रो पक्ष यो प्रतियोगिता भएकाले हामीसँग अझ ३ खेल बाँकी नै छ ।’

_{कीर्तिपुरस्थित त्रिवि क्रिकेट मैदानमा शनिबार नेदरल्यान्ड्सविरुद्ध ब्याटिङ गर्दै नेपालका आसिफ शेख । उनले अविजित ५४ रन बनाए ।}

कुशलले ३० बलमा अर्धशतक पूरा गरे । उनी १३ औं ओभरमा आउट हुँदा ४२ रनमा खेलिरहेका आसिफले अर्धशतक बनाउन ३५ बल खेले । १४ औं ओभरमा फिलिप बोइसेभेनको बलमा छक्का प्रहार गर्दै उनले अर्धशतक पूरा गरे । नेदरल्यान्ड्सले विकेटको हिसाबमा सबैभन्दा ठूलो हार सामना गरेको हो । २०१४ को ट्वान्टी–२० विश्वकपमा श्रीलंकासँग ३९ रनमा अलआउट हुँदा पनि टोलीले ९ विकेटकै हार बेहोरेको थियो ।

यसअघि सन्दीप लामिछानेले २ विकेट लिएपछि नेपालले नेदरल्यान्ड्सलाई कम स्कोरमै रोकेको थियो । उनले ४ ओभरमा २२ रनमात्र खर्चेका थिए । खेलको दोस्रो ओभरमा म्याक ओडोवडलाई १० रनमा एलबीडब्लू आउट गरी उनले विकेट लिन सुरु गरे । अर्को ओभरमा सोमपाल कामीले बेन कुपरलाई शून्यमा एलबीडब्लू नै आउट गरे । नेदरल्यान्ड्सले पहिलो ६ ओभरमा २ विकेट गुमाई २३ रनमात्र बनाउन सकेको थियो ।

नेदरल्यान्ड्सबाट बास डी लिडले सर्वाधिक ४१ रन बनाए । उनले ४९ बल खेल्दै ३ चौका र २ छक्का प्रहार गरे । ओपनर स्कट इडवार्डसले ३२ बलमा २ चौका र १ छक्का प्रहार गर्दै ३० रन बनाए । कप्तान पिटर सिलार २२ र एन्टोनिउस स्टलले अविजित २० रन बनाएपछि नेदरल्यान्ड्सले अन्तिम ५ ओभरमा ५८ रन जोडेको थियो ।

१४ ओभरमा ७३ रनको अवस्थामा डच टोलीले उक्त स्कोर बनाएको थियो । १६ औं ओभरमा लिडले डेब्युटेन्ट शाहब आलमलाई लगातार दुई छक्का प्रहार गर्दै हाबी हुन खोजेका थिए । शाहबले १ विकेट लिए । नेदरल्यान्ड्सका कप्तान सिलारले भने, ‘पिचमा के थियो भन्नुभन्दा पनि नेपाली बलरले राम्रो गरेका कारण हाम्रो ब्याटिङ खुल्न सकेन । उनीहरूले चाहेको स्थानमा बल फालिरहेका थिए । सोमपालले सुरुआतमा राम्रो बलिङ गरे, सन्दीपले सधैंझै राम्रो गरे र करणको पनि बलिङ राम्रो थियो । त्यसै कारण हामीलाई रन बनाउन गाह्रो भएको थियो । नेपाली ब्याट्सम्यानले सिधा खेलिरहेका थिए ।’्

कोभिड–१९ महामारीका कारण सीमित दर्शकमात्र प्रवेश दिइने भनिए पनि कीर्तिपुर मैदान भरिभराउ थियो । दर्शकको भीडमा नेदरल्यान्ड्सका खेलाडीहरू रमाएको सिलार बताउँछन् । ‘हामीले यस्तो दर्शकको माहोल नेदरल्यान्ड्समा पाउँदैनौं । राम्रो खेलेर यी दर्शकलाई चुप लगाउन पाएको भए मज्जा हुन्थ्यो, तर उनीहरूले आज धेरै हौस्याइरहे,’ उनले भने, ‘हामीले नेपाली दर्शकबारे धेरै सुन्दै आएका थियौं, आज त्यसको अनुभव गर्न पायौं । तर हामीले उनीहरूले चाहेजस्तो प्रदर्शन देखाउन सकेनौं । उनीहरूले नेपालको खेल हेर्न चाहेका थिए, हामी त्यो खेलमा थियौं मात्र ।’

अहिलेसम्मकै उत्कृष्ट : कप्तान ज्ञानेन्द्र

हामीले खेलेको खेलहरूमा यो उत्कृष्ट खेल हो जस्तो लाग्छ । सुरुआततिर फिल्डिङमा केही नमिलेकाले कमजोर भएको थियो, मिसफिल्डहरू भइरहेका थिए । तर बलरहरूको राम्रो प्रदर्शनमा उनीहरूलाई १ सय ४० रनभित्र रोक्न सक्यौं । विकेट पनि राम्रै थियो । त्यो लक्ष्य पूरा गर्न दुईजना जतिले प्रदर्शन गर्नैपर्ने थियो । त्यो पनि आफ्नो पहिलो खेल खेलिरहेका खेलाडीले यसरी प्रदर्शन गर्नुले पनि यो उत्कृष्टमध्येको एक भएको हो । हामीले चाहेको पनि त्यही नै थियो । युवा खेलाडीहरू टिममा आएर एक्सपोजमात्र हुने होइन, राम्रो प्रदर्शन गरेर जिताउन पनि सक्छन् भनेर देखाएका छन् ।

पारस खड्का खेल्ने नै भएको भए यही ओपनिङ जोडी हुन्छ भन्ने निश्चित थिएन । तर उनीहरू दुवैजना सुरुदेखि नै योग्य छ जस्तो लागिरहेको थियो । अभ्यासमा पनि उनीहरूले राम्रो गरेका थिए । पारस घाइते भइसकेपछि भूमिका परिवर्तन गर्दै ओपनिङ गर्ने मौका दियौं, जुन राम्रो साबित भयो । यी दुईको इनिङ्सपछि अब हामी विपक्षीमाथि हाबी हुन सक्छौं जस्तो लागेको छ । उनीहरूको उद्देश्य पनि सकारात्मक थियो । उनीहरूका लागि क्लब क्रिकेटदेखि ओपनिङको भूमिका बनाइएको थियो । नयाँ खेलाडीलाई धेरै भूमिका फेर्दा गाह्रो पर्छ । तर पछिल्लो एक–डेढ वर्ष हेर्ने हो भने उनीहरूले आफ्नो स्थानमा राम्रो खेल्दै आएका छन् । त्यो पनि आफ्नो स्थान योग्य साबित गर्न खेलिरहेका थिए ।

नेदरल्यान्ड्सको टोलीमा धेरै खेलाडी परिवर्तन छन् । पूर्ण टोली नभए पनि योभन्दा राम्रो गर्न सकिन्थ्यो होला । नेदरल्यान्ड्सको क्रिकेट भनेको लामो समयदेखि एउटा पद्धतिमा बसेर चलेको क्रिकेट हो । विश्वकप खेलिरहेको अनुभव छ उनीहरूसँग । तर कोभिड–१९ का कारण लामो समयपछि मैदानमा उत्रिनु, युवा खेलाडी हुनु, फरक कन्डिसन हुनु र यति धेरै दर्शकसामु खेल्नुपरेकाले उनीहरूलाई गाह्रो भएको हुनसक्छ । यसको मतलब उनीहरू कमजोर भने होइनन् ।