एपीएफलाई विराट गोल्डकप- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

एपीएफलाई विराट गोल्डकप

विनोद भण्डारी

विराटनगर — सशस्त्र प्रहरी बलको एपीएफ क्लबले विराट गोल्डकप फुटबल प्रतियोगिताको छैटौं संस्करण जितेको छ । कोरोना संक्रमणको उच्च जोखिममा परेको विराटनगरमा शनिबार करिब ८ हजार दर्शकको उपस्थितिमा एपीएफले भारतको पन्जाब पुलिस क्लबमाथि १–० गोलको कठिन जित निकाल्दै दोस्रो प्रयासमा उपाधि जितेको हो ।

छैटौं विराट गोल्डकप फुटबल विजेता एपीएफ क्लब उपाधिसाथ । तस्बिर : देवनारायण साह/कान्तिपुर

यसअघि एपीएफ २०७० सालको फाइनलमा संकटासँग १–० गोलले पराजित हुँदै उपविजेतामा समेटिएको थियो । एपीएफबाट खेलको ११ औं मिनेटमा प्रदीप लामाले गरेको गोल नै फाइनलको निर्णायक बन्यो । प्रदीपले पन्जाबको अन्तिम डिफेन्स सरजित सिंहलाई बिट गर्दै वान भर्सेस वानमा गरेको प्रहार गोलकिपर सतवीर सिंहको खुट्टामा ठोक्किँदै बल गोलमा परिणत भयो । उनले म्यान अफ द फाइनल हुँदै १० हजार रुपैयाँ जिते ।

एपीएफले १५ लाख १५ हजारसहित ट्रफी उचाल्दा पहिलो पटक नेपाली भूमिमा खेल पस्कन आएको पन्जाबले ७ लाख ५० हजार लिएर घर फर्कन बाध्य भयो । पन्जाबविरुद्ध आक्रामक खेल पस्केको एपीएफका बुद्धिमान लामाले दोस्रो मिनेटमै गोल गर्ने अवसर गुमाएका थिए । उनले बिकु तामाङको पासमा पेनाल्टी क्षेत्रबाट गोलकिपर सतवीरलाई बिट गर्न नसक्दा गोल अवसर गुमाए । एक गोलले पछि परेको पन्जाबले पटक–पटक खेलमा फर्कने अवसर सिर्जना गर्दा एपीएफका गोलकिपर राजु नगरकोटी बाधक बने । खेलको आठौं मिनेटमा मनदीप सिंहको सशक्त प्रहार राजुले बचाउ गरेर संकट टारेका थिए । १४ औं मिनेटमा राजवीर सिंहको पास पेनाल्टीबाट मनदीपले फिनिसिङ गर्न नसक्दा पन्जाबले खेलमा फर्कने अवसर गुमाएको हो । एपीएफका राजु उत्कृष्ट गोलकिपर भए । उनले २५ हजार पाए ।

म्यान अफ द टुर्नामेन्ट एपीएफका आशिष लामालाई पुरस्कृत गरिँदै

दोस्रो हाफमा एपीएफले केही रक्षात्मक खेल खेल्दा पन्जाबले आक्रामक खेल पस्केको थियो । तर पन्जाबका प्रहार एपीएफका गोलकिपर राजुले विफल तुल्याउँदै टिमको अग्रता कायमै गराए । खेलको ७३ औं मिनेटमा राजवीर सिंहले वान भर्सेस वानमा गरेको प्रहार गोलकिपर राजुले विफल पारे । ८४ औं मिनेटमा प्रेमजितको पासमा राजवीरले गरेको हेडिङ सिधै राजुको हातमा पर्दा पन्जाबको खेलमा फर्कने मौका गुमेको थियो । खेलको ८६ औं मिनेटमा एपीएफका प्रदीप लामाले काउन्टर एट्याकमा गोल अन्तर बढाउने अवसर गुमाए ।

एपीएफले घरेलु टोली विराटनगर र पन्जाबले संकटालाई हराएर फाइनल यात्रा तय गरेका थिए । प्रतियोगितामा एपीएफका आशिष लामा म्यान अफ द टुर्नामेन्ट हुँदै मोटरसाइकल जित्न सफल भए । उत्कृट डिफेन्डर एपीएफका सनिश श्रेष्ठ, उत्कृष्ट मिडफिल्डर एपीएफकै मणि लामा, उत्कृष्ट फरवार्ड संकटाका फोफना, सर्वाधिक गोलकर्ता विराटनगरका प्रकाश बुढाथोकी (चार गोल) भए । फेयर टिम विराटनगर र उत्कृष्ट प्रशिक्षक एपीएफका सुदीप श्रेष्ठ भए । उनीहरू सबैले २५ हजार पुरस्कार पाए ।विजेता खेलाडीलाई प्रदेश १ प्रमुख सोमनाथ अधिकारी, विराटनगरका मेयर भीम पराजुली, एन्फा अध्यक्ष कर्माछिरिङ शेर्पाले पुरस्कृत गरेका थिए ।

प्रकाशित : वैशाख ५, २०७८ ०८:४६
प्रतिक्रिया
पठाउनुहोस्

धमाधम सुक्दै लेकाली वन

कुम्भराज राई

ओखलढुंगा — मानेभन्ज्याङ गाउँपालिका–४ केत्तुकेका अडिलमान तामाङ ‘सडक रेखालु’ हुन् । सिद्धिचरण राजमार्गको केत्तुकेदेखि लगलगे खण्डमा उनी सडकको रेखदेख, सरसफाइको काम गर्छन् । उनले काम गर्ने सडक खण्ड पर्ने क्षेत्र पूरै जंगलले ढाकिएको छ ।

ओखलढुंगाको मानेभन्ज्याङ गापा र सिद्धिचरण नपाको सीमा क्षेत्रमा पर्ने लेकाली वनमा सुकेका रूख । तस्बिर : कुम्भराज /कान्तिपुर

दशकौंदेखि यस खण्डमा काम गर्दै आएका उनी यसपालि जंगलका रूखहरू धमाधम सुक्न थालेपछि दुःखित छन् । वनभरि गुराँस फुलेर ढकमक्क हुने बेलामा पालुवासमेत लागेको छैन । ‘धेरैजसो पात्लेका रूखहरू सुकेका छन् ।’ अडिलमानले भने, ‘कटुस, गुराँसका रूख पनि सुकेका छन् । मैले जीवनमै यसरी जंगल सुकेको देखेको थिइनँ ।’

समुद्री सतहदेखि १ हजार ५ सय मिटर उचाइमा रहेको उक्त वन क्षेत्र हिउँदमा समेत प्रायः हरियाली नै रहने गर्थ्यो । २०७२ को भूकम्पपछि हिउँदमा रूख सुक्ने क्रम सुरु भएको सिद्धेश्वरी सामुदायिक वन सल्लेरीका उपभोक्ता समिति सचिव गोपाल धमलाले बताए । ‘भूकम्पपछि एक दुई रूखहरू सुकेको थियो । यस वर्ष त वनका ६० प्रतिशत रूख सुकेका छन्’ धमलाले भने ।

सिद्धेश्वरी, भुसुने, चैते, पम्पालुलगायतका दर्जनौं सामुदायिक वन सुकेका छन् । औसतमा ३० देखि ४० प्रतिशत रूखहरू सुकेको स्थानीय बताउँछन् । उद्योग पर्यटन, वन तथा वातावरण मन्त्रालय प्रदेश १ का सचिव मेघनाथ काफ्लेले पनि स्थलगत रूपमै वन अवलोकन गरेका छन् । सामान्य रूपमा अवलोकन गर्दा खडेरीकै कारण रूख सुकेको हुन सक्ने उनले बताए ।

लामो समय खडेरी परेको कारण चिसोको अभावले सुकेको हुन सक्ने उनले बताए । दुई दिनदेखि केही मात्रामा वर्षा भएकाले अब रूख पलाउँछ वा पलाउँदैन, हेरेपछि मात्रै अन्य कारणले मरेको हो वा होइन भन्ने अध्ययन गर्न सकिने वन विज्ञसमेत रहेका काफ्लेको भनाइ छ । लामो समयको खडेरीले गर्दा मानेभन्ज्याङ गाउँपालिकाको तटीय क्षेत्रमा बाँसका रूखसमेत सुकेर मर्न थालेका छन् । त्यसै पनि, सुक्खा क्षेत्र भएकाले पिउने पानी अभाव भएका बस्तीहरू काकाकुल बन्न थालेका छन् ।

प्रकाशित : वैशाख ५, २०७८ ०८:४५
पूरा पढ्नुहोस्
प्रतिक्रिया
पठाउनुहोस्
×