विराट गोल्डकप : पन्जाब फाइनलमा, दुईलाई रातो कार्ड

पन्जाबले बिहीबार उपाधि यात्रा तय गरे पनि टोलीका लागि उत्साह रहेन । पन्जाबका कप्तान जगदीप सिंह खेल सकिएलगत्तै रातो कार्ड पाएर फाइनललाई वञ्चित बने । संकटाका साहिद स्मार्ट र पन्जाबका कप्तानबीचको घम्साघम्सीको वातावरण सिर्जना भएपछि रेफ्री श्याम दनुवारले दुवैलाई रातो कार्ड दिएका थिए ।

एक गोलले पछि परेसँगै संकटाका विदेशी खेलाडी स्मार्ट पन्जाबका खेलाडीप्रति निकै आक्रामक देखिएका थिए । रेफ्रीले सिठी फुकेलगत्तै उनी पन्जाबका खेलाडीमाथि जाइलागे । त्यसमा मुछिएका पन्जाबका कप्तान टिमका साथीको सुरक्षा गर्न खोज्दा रातो कार्डको सिकार भए । दुई टिमका खेलाडीको घम्साघम्सीलाई रेफ्री, अफिसियल र आयोजक समितिका सदस्यले साम्य पारेका थिए ।

अग्लो कद र शारीरिक तन्दुरुस्तीमा रहेका पन्जाबका खेलाडीले बिहीबार संकटालाई दबाबमा राखेर खेले पनि गोललाई ७५ औं मिनेटसम्म कुर्नुपरेको थियो । पहिलो हाफ गोलविहीन रहँदा पन्जाबका परमिद सिंहले गरेको गोल नै निर्णायक बन्यो । उनले हरजिन्दर सिंहको पासलाई बक्सभित्र सदुपयोग गर्दा संकटाका गोलकिपर राजुबाबु थापा पहिला बिट भइसकेका थिए । परमिद म्यान आफ द म्याच भए । उनले १० हजार रुपैयाँ पाए । बिहीबार पन्जाबका लागि अर्को संयोग थियो । प्लेइङसेटका एघारै खेलाडी सिंह थिए । पन्जाब टिमका १८ खेलाडीमध्ये चार खेलाडीमात्र अन्य गोत्रका छन् ।

दबाबमा खेले पनि संकटाले १४ औं मिनेटमा पहिलो पोस्ट आक्रमण गरेको थियो । तीर्थ बस्नेतको पासमा विदेशी खेलाडी ग्लोरीको हेड पन्जाबका गोलकिपर सतवीर सिंहको हातमै पर्दा संकटा अग्रता लिनबाट चुक्यो । संकटाले पहिलो हाफको ४३ औं मिनेटमा दोस्रो पोस्ट आक्रमण गर्दा सुमन बिकको प्रहार बाहिरियो ।

पन्जाबका राजवीर सिंहले ३० औं मिनेटमा तीन डिफेन्सलाई बिट गर्दै गरेको प्रहार संकटाका गोलकिपर राजुबाबुले उत्कृष्ट बचाउ गरे । खेलको ३४ औं मिनेटमा पन्जाबका राजवीरले संकटाका गोलकिपर बिट गर्न नसक्दा अग्रता दिलाउन असफल भए ।