इन्टर सिरी ए उपाधि नजिक- खेलकुद - कान्तिपुर समाचार

इन्टर सिरी ए उपाधि नजिक

एजेन्सी

मिलान — इन्टर मिलानले बुधबार इटालीको सिरी ए मा ससुलोलाई २–१ ले हराएर लिग उपाधिको नजिक पुगेको छ । यो जितपछि उसले शीर्ष स्थानमा ११ अंकको ठोस अग्रता लिएको छ ।

एन्टोनियो कोन्टेको टिमका लागि रामेलु लुकाकु र लउटारो मार्टिनेजले गोल गरे । हामेड ट्राओरले ससुलोका लागि एक गोल फर्काए । अर्को खेलमा युभेन्ट्सले नेपोलीलाई समान २–१ ले हरायो र तेस्रो स्थानमा उक्लिन सफल रह्यो ।

युभेन्ट्स तेस्रो स्थानमा छ र दोस्रोमा रहेको एसी मिलान भन्दा एक अंकले मात्र पछाडि छ । तर युभेन्ट्स आफै इन्टर भन्दा १२ अंकको ठूलो अन्तरले पछाडि छ ।

लिगमा नौ चरणका खेल मात्र हुन बाँकी रहेको स्थितिमा अब युभेन्ट्सले लगातार दसौं पल्ट उपाधि जित्ने सम्भावना समाप्त जस्तै भइसकेको छ ।

प्रकाशित : चैत्र २६, २०७७ ०७:०२
प्रतिक्रिया
पठाउनुहोस्

नाइजेरियाको जेलबाट १८०० कैदी फरार

एजेन्सी

अबुजा — नाइजेरियाको एक जेलमा बन्दुकधारीहरूले आक्रमण गरेपछि १ हजार ८ सयभन्दा बढी कैदीहरू भागेका छन् । दक्षिण–पूर्वी सहर ओवेरीस्थित जेलको प्रशासनिक भवनमा विस्फोट गरेपछि आक्रमणकारीहरू जेलभित्र पसेका थिए ।

तस्बिर : रोयटर्स

भागेका कैदीमध्ये ६ जना फर्किएका अधिकारीहरूले जनाएका छन् । ३५ जना भने भाग्न अस्वीकार गरेका थिए । प्रतिबन्धित पृथकतावादी समूह ‘द इन्डिजेनस पिपुल्स अफ बियाफ्रा’ ले जेलमा आक्रमण गरेको प्रहरीको दाबी छ । तर उक्त समूहले भने आक्रमणमा आफ्नो कुनै संलग्नता नरहेको जनाएको छ ।

अधिकारीहरूका अनुसार जेलबाट १ हजार ८ सय ४४ कैदी फरार भएका हुन् । एउटा ट्रक र बस चढेर भारी हतियारसहित आएका आक्रमणकारीहरू सोमबार बिहान ओवेरी जेलमा प्रवेश गरेका थिए ।

प्रकाशित : चैत्र २५, २०७७ ०७:४२
पूरा पढ्नुहोस्
प्रतिक्रिया
पठाउनुहोस्
×