रक एक्स आई वालिङ (बी) लाई इस्लामपुर क्रिकेट कपको उपाधि- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

रक एक्स आई वालिङ (बी) लाई इस्लामपुर क्रिकेट कपको उपाधि

माधव अर्याल

पाल्पा — चौथो इस्लामपुर कप क्रिकेट प्रतियोगिताको उपाधि रक एक्स आई वालिङ (बी) ले हात पारेको छ ।

इस्लामिक सक्रिय युवा समाज रामपुर नगरपालिका–४, ले आयोजना गरेको प्रतियोगिताको बुधबार सम्पन्न फाइनलमा न्यु क्रियटिभ युथ क्लब वालिङलाई ९ विकेटले पराजित गर्दै रक एक्स आई वालिङ (बी) ले उपाधि जितेको हो ।

टस जितेर ब्याटिङमा उत्रेको न्यु क्रियटिभ युथ क्लबले १४ ओभरमा ७ विकेट गुमाएर १ सय ३७ रन जोड्यो । उसका लागि विशाल कोइरालाले ४३ रनको योगदान दिए । विवेक भण्डारीले २६ रन, अश्विनी राना १४, विमल भण्डारी २०, केशव पौडेलले २४ रन जोडे । बलिङतर्फ रक एक्स आईका याम क्षेत्रीले तीन, धीरज शाहीले दुई विकेट लिए ।

१ सय ३८ रनको लक्ष्य लिएर मैदान उत्रेको रक एक्स आईले १२ ओभर २ बलमा एक विकेट गुमाएर जित हात पार्‍यो । रक एक्स आईका लागि विष्णु पौडेलले ७०, सन्दीप क्षेत्रीले ३६ र अमृत थापाले १५ रनको योगदान गरे । बलिङतर्फ क्रियटिभका अश्विनी रानाले एक विकेट लिए । प्रतियोगिताअन्तर्गत रामपुर नगरपालिका–८, ले अनुशासित टिमको पुरस्कार पायो ।

प्रतियोगितामा उत्कृष्ट बलर न्यु क्रियटिभ युथ क्लब वालिङका खगेन्द्र थापा, उत्कृष्ट ब्याट्सम्यान एवं म्यान अफ द सिरिज न्यु क्रियटिभ युथ क्लबका अश्विनी राना र इमर्जिङ प्लयेरको अवार्ड रामपुर–८, का पूर्ण घर्तीले पाए ।

प्रतियोगिताको विजेताले नगद १ लाख, उपविजेताले ५० हजार र अनुशासित टिमले ३० हजारसहित ट्रफी, मेडल र प्रमाणपत्र पाए । प्रतियोगितामा पाल्पा, स्याङ्जा, तनहुँ, नवलपरासी, कास्की, रुपन्देही, अर्घाखाँची, गुल्मी जिल्लाका १३ समूहले भाग लिएका थिए ।

प्रकाशित : चैत्र १९, २०७७ ०९:१६
प्रतिक्रिया
पठाउनुहोस्

घिउमा  ठगी

माधव अर्याल

पाल्पा — तानसेन बजारभित्र सञ्चालित ठूला डेरी उद्योगले एक किलो घिउ किन्दा उपभोक्ताबाट कम्तीमा १ सय रुपैयाँ ठगी गर्ने गरेको पाइएको छ । उनीहरूले उपभोक्तालाई तौलमा कमी गर्ने गरेका छन् । साथै घिउको डब्बासहित नै तौल गरेर ठगी गर्दै आएको भेटिएको छ ।

‘हामीले घिउ किन्दा अहिलेसम्म यस्ता कुरामा ख्याल नै गरेका थिएनौं,’ उपभोक्ता सुनिता खनालले भनिन्, ‘हामी एक किलो घिउ किन्दा नै कम्तीमा सय रुपैयाँ ठगिएका रहेछौं ।’ वर्षमा कम्तीमा आठ किलो घिउ किन्ने गरेको उनले बताइन् । उपभोक्ताले दुग्धपदार्थ किन्दा ठगिएको गुनासो स्थानीय प्रशासनमा गर्दै आएका थिए ।

गुनासाका आधारमा तानसेन नगरपालिकाले सरोकारवालाको सहभागितामा दूध डेरी र मिठाई पसल अनुगमन गर्दा उपभोक्ताको गुनासो पुष्टि भएको हो । ‘उपभोक्ताको गुनासाका आधारमा बजारमा अनुगमन गरेका थियौं,’ तानसेन नगरपालिकाका आन्तरिक लेखा परीक्षक कोशलराज घिमिरेले भने, ‘उपभोक्ताले गरेका गुनासा जस्तै ठगी गरेको भेटिएको छ ।’

घिउमा मात्र होइन, तानसेन बजारभित्र सञ्चालित डेरी उद्योगले उपभोक्तालाई दुग्धजन्य हरेक वस्तुमा ठगी गर्दै आएका छन् । उनीहरूले मापदण्डविपरीतका सामग्री बिक्री गर्दै आएको अनुगमनका क्रममा भेटिएको छ । अनुगमनमा सहभागी घिमिरेका अनुसार डेरी उद्योगले उपभोक्तालाई दूधको मूल्यमा समेत ठगी गर्दै आएका छन् ।

पछिल्ला केही दिनयता भैंसीको दूधमा मनोमानी ढंगले मूल्य बढाएका छन् । ‘मूल्य बढाएको विषयमा पनि छलफल भएको छ,’ तानसेन नगरपालिकाका शिक्षा शाखा प्रमुख तथा अनुगमनमा सहभागी रेशमलाल न्यौपानेले भने, ‘किसानलाई मूल्य थपेर दिएको भन्ने जवाफ डेरी उद्योगबाट आएको छ ।’

अनुगमनकारी निकायले डेरी सञ्चालकलाई कारबाही गर्न सक्दैन । हरेक पटक अनुगमन गर्दा गल्ती भेटिए पनि पहिलो पटक सम्झाइबुझाइ छाडेको भन्ने गर्छ । समयमा अनुगमन हुँदैन । भए पनि सही ढंगले अनुगमन नगर्दा आफूहरू ठगिँदै आएको उपभोक्ता रमेश अधिकारीले बताए । उनका अनुसार पछिल्लो समयमा तानसेनका प्रायः डेरी उद्योगमा मापदण्डविपरीतको दुग्धपदार्थको बिक्री हुँदै आएको छ ।

प्रकाशित : चैत्र १६, २०७७ १३:३१
पूरा पढ्नुहोस्
प्रतिक्रिया
पठाउनुहोस्
×