एसपीएलको उपाधि वारियर्सलाई
राजविराज — बजाज खडक वारियर्सले तेस्रो संस्करणको सप्तरी प्रिमियर लिग (एसपीएल) को उपाधि जितेको छ । वारियर्सले राजविराज रंगशालामा शनिबार सम्पन्न फाइनलमा रूपनी राइडर्सलाई एक रनले पराजित गर्दै च्याम्पियन बनेको हो ।
वारियर्सले दिएको १ सय ४७ रनको लक्ष्य पछ्याउने क्रममा राइडर्सले निर्धारित २० ओभरमा ९ विकेट गुमाएर १ सय ४५ रनमात्र बनाउन सक्यो । नीरज मुखियाले अविजित ५२, सुनिल धमलाले २३, अमित यादवले १९ र कुशल भुर्तेलले १५ रन बनाए ।
वारियर्सबाट अनिल खरेल र गोमानन्द अमात्यले ३–३ विकेट लिए । अनिलले ४ ओभरमा १ मेडन राख्दै १० र गोमानन्दले ४ ओभरमा १८ रन खर्चिए । भुलावन सहानीले २ विकेट तथा पवन सर्राफले १ विकेट लिए ।
यसअघि टस जितेको बजाज खडक वारियर्सले ६ विकेट गुमाउँदै १ सय ४६ रनको योगफल तयार गरेको थियो । वारियर्सका ओपनरद्वय नीरज यादवले ५१ र अनिल शाहले २९, कप्तान विवेक यादवले २२ र भुलावनले अविजित १३ रन बनाए ।
राइडर्सबाट अनिल यादवले ३ तथा सुनील र कुशल भुर्तेलले १–१ विकेट लिए । विजेता वारियर्सले ३ लाख रुपैयाँ हात पार्यो भने उपविजेता राइडर्सले १ लाख ५० हजार रुपैयाँ प्राप्त गरे । प्रतियोगिताकै उत्कृष्ट खेलाडी बजाज खडक वारियर्सका अनिलकुमार शाह चुनिए । उनले २५ हजार रुपैयाँ प्राप्त गरे । प्रतियोगितामा अनिलले २ वटा शतक र एउटा अर्धशतक प्रहार गर्दै ५ खेलमा कुल ३ सय ३४ रन बनाए ।
उत्कृष्ट बलर विशाल सुस्लिङ र उत्कृस्ट ब्याट्सम्यान अनिल शाह चुनिए जसले १५ हजार प्राप्त गरे । विशालले प्रतियोगितामा ४ खेलमा ९ विकेट लिए ।
विजेता खेलाडीहरूलाई राजविराज नगरपालिकाका मेयर शम्भुप्रसाद यादव, तिलाठी कोइलाडी गाउँपालिकाका अध्यक्ष सतिशकुमार सिंह, रूपनी गाउँपालिकाका वडाध्यक्ष पीताम्बर यादव, राजविराज नगरपालिकाका वडाध्यक्ष जयनारायण मण्डल, सप्तरी क्रिकेट संघका अध्यक्ष आयुष श्रेष्ठ, क्रिकेट विकास प्रतिष्ठानका अध्यक्ष इन्द्रनारायण देवलगायत अतिथिहरूले पुरस्कार प्रदान गरे।
प्रकाशित : चैत्र १५, २०७७ ०८:५१