ब्लाटरमाथिको फिफा प्रतिबन्ध ६ वर्ष बढ्यो
पेरिस — अन्तर्राष्ट्रिय फुटबल महासंघ फिफाले आफ्ना पूर्व अध्यक्ष सेप ब्लाटर तथा पूर्व महासचिव जेरोमी भाल्केमाथिको प्रतिबन्ध बुधबार ६ वर्ष र आठ महिनाले बढाएको छ । ठूलो मात्राको रकम बोनसको रूपमा लिएको आरोपमा उनीहरू माथिको प्रतिबन्ध बढाइएको हो ।
अहिले ८५ वर्ष पुगिसकेका ब्लाटरले सन् २०१० र २०१४ को विश्वकप आयोजना गर्ने क्रममा दुई करोड ४६ लाख डलर बोनसका रूपमा लिएका थिए । फिफाको आचारसंहिता कमिटीले त्यसलाई गलत भनेको छ ।
सन् २०१० को विश्वकप दक्षिण अफ्रिका र सन् २०१४ को विश्वकप ब्राजिलमा भएको थियो । ब्लाटरले १७ वर्ष फिफा चलाउँदा उनका दायाँ हात रहेका ६० वर्षीय भाल्केले भने तीन करोड डलबरको हाराहारीमा बोनस बुझेका थिए ।
फिफाको आचारसंहिता अनुसार आफ्नो पदको दुरुपयोग हुने गरेर उपहार र सुविधा लिनु हुन्न । फिफाले ब्लाटर र भाल्केलाई प्रतिबन्धसँगै जरिवाना पनि तोकेको छ ।
प्रकाशित : चैत्र ११, २०७७ २०:३६