थ्री नेसन्स कप : ‘बंगलादेशलाई सुधार आवश्यक’

दशरथ रंगशालामा तीन अंक जोडेपछि पत्रकार सम्मेलनमा प्रशिक्षक डेले भने, ‘जितप्रति खुसी छौं । यो जित महत्त्वपूर्ण थियो क्लिन–सिट कायम राख्न । नेपाल र किर्गिस्तानबीच हुने खेलपछि हाम्रो रणानीति बन्नेछ तर आयोजक टिमविरुद्ध हामीले सुधारिएको खेल प्रदर्शन गर्न आवश्यक छ ।’ इंग्ल्यान्डका ४१ वर्षीय उनले थपे, ‘बल पोजेसनमा पनि हाम्रो राम्रो थियो । विश्वकप छनोटमा राम्रो गर्ने प्रयासमै केही नयाँ खेलाडीलाई खेलाएका थियौं । स्कोरिङमा भने बंगलादेशी टिममै समस्या छ ।’

डेले किर्गिस्तानको युवा टिमविरुद्ध तीन नयाँ खेलाडीलाई अवसर दिएका थिए । खासै रोमाञ्चक नरहेको खेलमा गोल भने पहिलो हाफमै निस्किएको थियो । साद उद्दिनको क्रसमा बल क्लियर गर्ने प्रयासमा किर्गिज डिफेन्डर उलु बाइमनले आफ्नै पोस्टमा गोल गरेपछि बंगलादेशले ३० औं मिनेटमा अग्रता लिएको थियो । अन्तिम समयमा किर्गिस्तानी टिमले बराबरी गर्ने राम्रो मौका पाएको थियो । तर, एमिर जापारोभको कर्नरमा सब्स्टिच्युट कामोलिदिन तासिएभले पोस्ट नजिकबाट गरेको ‘फ्रि–हेडर’मा बल पोस्टमाथिबाट बाहिरियो । अग्रता लिएपछि बंगलादेशी टिमले ‘बल होल्ड’ गर्दै ढुक्कसँग खेलेको थियो ।

त्यसलाई लिएर सोधिएको प्रश्नमा प्रशिक्षक डेले जवाफ दिए, ‘खेलमा मौका कुनै पनि बेला पाउन सक्छ । त्यसैले किर्गिस्तानले अन्तिम समयमा गोल नगर्दा हामीलाई भाग्यले साथ दिएको नभनौं होला ।’ पहिलोपल्ट बंगलादेशको कप्तानी गरेका सोहेल रानाले भने, ‘प्रतियोगिताको लागि यो जित महत्त्वपूर्ण थियो । हामीले राम्रो खेल्यौं र अर्को खेलमा अझै राम्रो गर्नुपर्छ ।’ किर्गिस्तान यू–२३ का प्रशिक्षक नुर्बेक जोल्दोसोभले आफ्नो टिमले राम्रो खेल्न नसकेको बताए । ‘अनुभवी बंगलादेशी टिमलाई बधाई,’ उनले भने, ‘हामीले राम्रो प्रदर्शन गरेनौं । पाएका गोलका अवसर उपयोग गर्न सकेनौं । आफ्नै क्षमता र शक्तिमा विश्वास गर्न सकेनौं । राष्ट्रिय टमविरुद्धको खेल हाम्रा युवा खेलाडीका लागि एउटा राम्रो पाठका रूपमा रह्यो ।’

किर्गिस्तानी युवा टिमले बिहीबार नेपाली राष्ट्रिय टिमविरुद्ध प्रतिस्पर्धा गर्दैछ । त्यसमा पराजित भएमा मध्यएसियाको पहुना टिम त्रि–देशीय प्रतियोगिताको समूह चरणबाटै बाहिरिने छ । नेपाली टिमविरुद्ध हुने निर्णायक खेलबारे प्रशिक्षक जोल्दोसोभले भने, ‘नेपालविरुद्धको खेल कठिन हुनेछ । किनभने नेपाल घरेलु टिम हो । तर, हामी राम्रो गर्ने प्रयास गर्नेछौं ।’