मनकामना युवाको पहिलो जित
नेपालगन्ज — मनकामना युवा क्लब रौतहटले मंगलबार एन्फा प्रेसिडेन्ट लिग फुटबलमा कर्णाली प्रदेश च्याम्पियन लेकाली युवा क्लब जुम्लालाई १–० ले पराजित गरेको छ ।
प्रदेश २ को च्याम्पियन मनकामनाको यो पहिलो जित हो । मनकामनाका भुवन बस्नेतले ३७ औं मिनेटमा गरेको गोल नै निर्णायक बन्यो । उनले पेनाल्टीलाई गोलमा परिणत गर्दै टोलीलाई अग्रता दिलाएका थिए । लेकालीले पनि अहिलेसम्म जित हासिल गर्न सकेको छैन । खेलमा लेकालीका कप्तान युद्ध शाही म्यान अफ द म्याचबाट पुरस्कृत भए ।
यसअघि लगातार हार सामना गरेको मनकामनाले मंगलबार लेकालीविरुद्ध सम्हालिएर खेलेको थियो । मनकामना युवाले स्टार सिटी, धम्बोझी क्लब र धादिङ समाजसँगका खेलमा समान ३–० ले गुमाएको थियो । लेकाली युवाले भने झापाको सैनिक युथ क्लबसँग १–१ को बराबरी खेल्दै १ अंक बटुलेको थियो । लेकालीले धादिङ समाजसँग ९–१ ले र त्रिवेणी युवा क्लब लमजुङसँग २–१ ले खेल गुमाएको हो ।