वडा टेबलटेनिस आजदेखि- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

वडा टेबलटेनिस आजदेखि

कान्तिपुर संवाददाता

काठमाडौँ — अखिल नेपाल टेबलटेनिस संघको कार्यक्रमअनुसार स्पिन इभेन्ट्स प्रालिको आयोजनामा सोमबारदेखि देशव्यापी अन्तरवडा टेबलटेनिस प्रतियोगिता हुँदै छ ।

लैनचौरस्थित राष्ट्रिय टेबलटेनिस प्रशिक्षण केन्द्रको हलमा हुने प्रतियोगितामा देशभरका करिब ५० वडाका ५ सयभन्दा बढी खेलाडीको सहभागिता रहनेछ । पुरुषतर्फ २६ टिमका ४ सय ३३ र महिलातर्फ ८ टिमका ९० जना खेलाडीले सहभागिता जनाउने निश्चित भएको आयोजक स्पिन इभेन्ट्सले जानकारी दिएको छ ।

स्थानीयस्तरबाट खेलाडीको पहिचान गरी टेबलटेनिसमा प्रतिभावान खेलाडी उत्पादनको लक्ष्यसहित आयोजित प्रतियोगितामा राष्ट्रिय वरीयतामा शीर्ष १६ भित्र रहेका खेलाडीलाई सहभागिताको अनुमति दिइएको छैन । चैत ७ गतेसम्म सञ्चालन हुने प्रतियोगितामा पुरुष र महिलाको एकल र टिम स्पर्धा, भेट्रान्स ४० वर्षमाथि र ४५ वर्षमाथि गरी ६ विधा समावेश गरिएको छ । पुरुष र महिला एकलको विजेताले ३० हजार, उपविजेताले १५ हजार र सेमिफाइनलिस्ट २ खेलाडीले ७ हजार ५ सय नगद पाउनेछन् । भेट्रान्सतर्फ विजेताले १० हजार, उपविजेताले ५ हजार र सेमिफाइनलिस्ट २ खेलाडीले जनही २ हजार ५ सय रुपैयाँ पाउनेछन् । स्वर्ण जितेको आधारमा एउटा उत्कृष्ट वडालाई रनिङ सिल्डसहित ५० हजार रुपैयाँ प्रदान गरिनेछ ।

भ्याली कन्स्ट्रक्सनको मुख्य प्रायोजन रहेको प्रतियोगितालाई गंगादेवी वस्त्रालयले सहप्रायोजन सम्झौता गरेको छ । आइतबार आयोजित पत्रकार सम्मेलनमा स्पिन इभेन्ट्सका अध्यक्ष सुमन शाक्य र गंगादेवी वस्त्रालयका प्रबन्ध निर्देशक प्रकाश बर्तौलाले सम्झौतापत्रमा हस्ताक्षर गरे । सम्झौताअनुसार गंगादेवी वस्त्रालयले प्रतियोगिताको कुल बजेट १९ लाख ५० हजारको ३० प्रतिशत अर्थात् ५ लाख ८५ हजार रुपैयाँ उपलब्ध गराउनेछ ।

पत्रकार सम्मेलनमा डीएचएस स्पोर्ट्स नेपालले प्रतियोगिताका लागि अफिसियल बल हस्तान्तरण गरेको थियो । डीएचएसका प्रमुख कार्यकारी अधिकृत राजेन महर्जनले टेबलटेनिसका पूर्वमुख्य प्रशिक्षक एवं प्राविधिक निर्देशक विनोद शाक्यलाई बल हस्तान्तरण गरे । कार्यक्रममा करिब २ लाख लागतमा तयार गरिएको प्रतियोगिताको रनिङ सिल्ड अनावरण गरिएको थियो ।

प्रकाशित : चैत्र २, २०७७ ०८:१६
प्रतिक्रिया
पठाउनुहोस्

अनुमाया र प्रिन्सलाई उपाधि

कान्तिपुर संवाददाता

काठमाडौँ — सिल्क ग्रुपका प्रिन्स दाहाल र त्रिभुवन आर्मी क्लबकी अनुमाया राईले प्रथम खुला साइनो मेयर कप ब्याडमिन्टन प्रतियोगिता जितेका छन् । पुरुष एकलतर्फको फाइनलमा आइतबार प्रिन्सले एपीएफका दीपेश धामीलाई पराजित गरे । 


प्रिन्सले दीपेशविरुद्ध २३–२१ र २१–१८ को प्रतिस्पर्धात्मक फाइनल जित्दै अघिल्लो महिना चितवनमा भएको प्रधानमन्त्री कप ब्याडमिन्टनको फाइनलको बदलासमेत लिए । उपाधिसँगै प्रिन्सले ५० हजार र उपविजेता दीपेशले ३० हजार पुरस्कार पाए । सेमिफाइनलिस्ट खेलाडीहरू नेपाल पुलिसका विष्णु कटुवाल र त्रिभुवन आर्मीका रुकेश महर्जनले जनही १० हजार रुपैयाँ पुरस्कार पाए । साइनो स्पोर्ट्स हलको आयोजना तथा तारकेश्वर नगरपालिकाको प्रायोजनमा भएको प्रतियोगिताको क्वाटरफाइनलमा पुगेका आर्मीका पविन लिनथेप, पुलिसका जीवन आचार्य, भूपू सैनिकका सहरोज अन्सारी र आर्मीकै भोजबहादुर गुरुङले जनही ५ हजार रुपैयाँ पाए ।

साङ्लास्थित साइनोको कभर्डहलमा महिला एकलतर्फको फाइनलमा आफ्नै क्लबकी अमिता गिरीलाई २१–१०, २१–१७ को सोझो सेटमा पराजित गर्दै अनुमायाले उपाधि जितिन् । अनुमायाले ३० र उपविजेता अमिताले १५ हजार रुपैयाँ पाए । सेमिफाइनलिस्ट एपीएफकी शोभा गौचन र धादिङकी तारा आलेले जनही ७ हजार ५ सय पुरस्कार पाए । पुरुष युगलतर्फ हिमालयन क्लबका विशाल बस्नेत र झापाका प्रनिश सिंह ठकुरीको जोडीले आयोजक अभिषेक बोस र सुजन थापाको जोडीमाथि २१–१७, १६–२१, २१–१७ को प्रतिस्पर्धात्मक जितसहित उपाधि उचाले । विजेताले ५० हजार र उपविजेताले ३० हजार रुपैयाँ पुरस्कार पाए । सेमिफाइनलमा पुगेका सुर्खेतका नरेन्द्र बम र चण्डोलका शिव थापाको जोडी तथा गण्डकी ब्याडमिन्टन क्लबका सनम खपांगी र हीरा राईको जोडीले १०–१० हजार रुपैयाँ पुरस्कार पाए ।

पुरुष भेट्रान ४५ वर्षतर्फ ज्येष्ठ ब्याडमिन्टन एकेडेमीका श्याम पराजुली र नवीनबाबु श्रेष्ठको जोडी विजयी भयो । उक्त जोडीले परफेक्ट फिटनेस क्लबका पूर्ण हरि होना र सञ्जय कपालीको जोडीलाई १२–२१, २२–२०, २१–१६ ले पराजित गर्‍यो । विजयी खेलाडीहरूले ४० हजार र उपविजेताले २५ हजार रुपैयाँ हात पारे । सेमिफाइनलमा पुग्ने युनिक स्पोर्ट्सका अनिलकुमार लाखे र पाल्पाका महेश वज्राचार्यको जोडी तथा ललितपुरका सुमन महर्जन र सुनीलमान शाक्यको जोडीले १०–१० हजार रुपैयाँ हासिल गरे ।

प्रकाशित : चैत्र २, २०७७ ०८:१५
पूरा पढ्नुहोस्
प्रतिक्रिया
पठाउनुहोस्
×