एट्लेटिको हार्दा रियललाई अझ फाइदा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

एट्लेटिको हार्दा रियललाई अझ फाइदा

एजेन्सी

म्याड्रिड — कासेमिरोले गरेको निर्णायक गोलमा रियल म्याड्रिडले शनिबार स्पेनी ला लिगामा रियल भालाडोलिडलाई १–० ले हराएको छ । यससँगै टोलीले शीर्ष स्थानको छिमेकी एट्लेटिको म्याड्रिडसँगको दूरी तीन अंकमा छोट्यायो ।

ब्राजिली खेलाडीले हेडबाट ६५ औं मिनेटमा गोल गरेका थिए । टिमले एट्लेटिकोले यसअघि बेहोरेको हारको पूरा फाइदा लियो । यसअघि एट्लेटिको घरमै लेभान्टेसँग २–० ले पराजित भएको थियो ।

यो नतिजापछि एट्लेटिको २३ खेलबाट ५५ अंकमै सीमित रह्यो भने एक खेल बढी खेलेको रियलको ५२ अंक भएको छ । यो समीकरणले उपाधि–होड रोमाञ्चक हुने भएको छ । बार्सिलोना ४६ अंकसाथ तेस्रो स्थानमा छ । शनिबारका अन्य खेलमा एल्चेले आइबरलाई १–० र भ्यालेन्सियाले सेल्टा भिगोलाई २–० ले हराए ।

प्रकाशित : फाल्गुन ९, २०७७ ०६:५६
प्रतिक्रिया
पठाउनुहोस्

अलैंचीका पाँच जात पहिचान

कान्तिपुर संवाददाता

ताप्लेजुङ — नेपाली अलैंचीका पाँच जात पहिचानपछि दर्ता प्रक्रिया सुरु भएको छ । नेपालमा उत्पादन हुने १४ मध्ये रामसाई, गोलसाई, डम्बरसाई, जिर्मले र भार्लाङ जातका अलैंची पहिचान गरी दर्ता प्रक्रियामा रहेको अलैंची विकास केन्द्र फिक्कल इलामले जनाएको छ ।

कृषि मन्त्रालयले स्वीकृत गरेर राजपत्रमा प्रकाशन भएपछि यसले मान्यता पाउने विकास केन्द्रका बाली संरक्षण अधिकृत देवेन्द्र शाहले बताए । यो मान्यता अन्तर्राष्ट्रिय स्तरको हुन्छ । नेपालमा अहिलेसम्म अलैंचीको जात पहिचान तथा दर्ता नभएकाले यसको सुरुवात गरिएको उनको भनाइ छ । जात पहिचानका लागि कृषि विकास मन्त्रालयका महानिर्देशकको संयोजकत्वमा सिफारिस समिति गठन गरिएको छ ।

यो समितिले विस्तृत अध्ययन गरेर दर्ताका लागि सिफारिस गरेको हो । कृषि मन्त्रालयका सचिवको अध्यक्षतामा रहेको समितिले अनुमोदन गरेपछि यसले मान्यता पाउनेछ । त्यसपछि भने रोगकिरा लागे वा सरकारी अनुदान दिनुपर्दा यी जातले प्राथमिकता पाउँछन् । उस्तै जातको अलैंची उत्पादन हुने नेपालले जात पहिचान नगर्दा छिमेकी देश भारतले गरेको पहिचानका आधारमा चलिरहेको छ । दर्ता भएपछि नेपाली अलैंचीलाई अरू कसैले दाबी गर्न नसक्ने फिक्कलमा लामो समय कार्यालय प्रमुख रहेका पदम अधिकारीले बताए । अधिकारी प्रमुख हुँदै सिफारिस समितिको बैठक बसेको थियो ।

प्रकाशित : फाल्गुन ९, २०७७ ०६:५२
पूरा पढ्नुहोस्
प्रतिक्रिया
पठाउनुहोस्
×