जुनियरलाई निखार्न टेनिस क्याम्प

रूपन्देहीको बुटवलमा आयोजित साताव्यापी १८औं मन जयकर मेमोरियल टेनिस डेभलमेन्ट क्याम्प सकिएको छ । जुनियर टेनिस इनिसिएटिभ (जेटीआई नेपाल) र रूपन्देही जिल्ला लनटेनिस संघको संयुक्त सहकार्यमा बुटवलस्थित रूपन्देही लनटेनिस कोर्टमा भएको क्याम्पमा ५ देखि १४ वर्षसम्म २४ किशोर सहभागी भएका थिए । क्याम्पका प्रशिक्षार्थीलाई जेटीआई नेपालका संयोजक कृष्णराज घले र सहसंयोजक जितेन्द्र परियारले प्रशिक्षण दिएका थिए ।

छोरा जयकर राणाको स्मृतिमा हरक वर्ष जयकर मेमोरियल टेनिस गर्ने गरकामा यसपालि कोरोनाकाकारण बुटवलमा आएर प्रशिक्षण चलाएको नेपाल टेनिस संघका अध्यक्ष ज्योति राणाले बताइन् । ‘काठमाडौं केन्द्रित टेनिस खेल देशव्यापी बनाउने अभियान पनि हो,’ नेपाल ओलम्पिक कमिटीका उपाध्यक्षसमेत रहेकी उनले भनिन्, ‘बुटवलका बालबालिकामा टेनिसप्रतिको लगाव रहेको पाएँ ।’

बालबालिकाको प्रतिभा प्रस्फुटन गर्न र थप आवश्यक शिक्षा दिन क्याम्प सञ्चालन गरिएको उनले बताइन्। उनका अनुसार बुटवलमा रहेको अन्तर्राष्ट्रिय स्तरको कोर्टमा तालिम लिन पाउनु बालबालिकाका लागि राम्रो अवसर हो ।

समय–समयमा आयोजना हुने यस्ता प्रशिक्षणले खेलाडीलाई निखार्ने र मोफसलको टेनिस विकासमा आफूहरूले सक्दो सहयोग गर्ने उनको प्रतिबद्धता थियो। अन्तर्राष्ट्रिय प्रशिक्षकलाई ल्याएर यहाँका बालबालिकालाई निःशुल्क प्रशिक्षण दिन पाउनु गर्वको पक्ष भएको रूपन्देही लनटेनिस संघका सचिव गोपाल ज्ञवालीले बताए । जिल्लामा अहिले दुई सयभन्दा बढी बालबालिकाले टेनिसको प्रशिक्षण लिइरहेको भन्दै उनले आगामी दिनमा गरिने यस्ता प्रशिक्षण र प्रतियोगिताले युवा खेलाडीलाई अघि बढ्न सघाउने बताए ।

प्रशिक्षणमा सहभागी भएका खेलाडीलाई प्रशंसापत्र प्रदान गरिएको थियो। क्याम्पमा लनटेनिसका राष्ट्रिय तथा अन्तर्राष्ट्रिय खेलाडी दिदीबहिनी मायांका र माहिका राणाले प्रदर्शनी म्याच खेलेका थिए ।