नेपालगन्ज म्याराथनको तयारी - खेलकुद - कान्तिपुर समाचार
कान्तिपुर वेबसाईट
AdvertisementAdvertisement

नेपालगन्ज म्याराथनको तयारी 

मधु शाही

नेपालगन्ज — खेलको उद्देश्य प्रतियोगिता गर्नु मात्रै नभई स्थानीय क्षेत्रमा पर्यटनमा टेवा दिने, समुदायमा खेलप्रति सक्दो उत्साह जगाउने र खेलकुदको प्रवर्द्धन गराउनु पनि हो ।

नेपालगन्ज म्याराथनले ५ वर्षअघि जतिसक्दो धेरै सहभागी गराएर म्याराथन प्रतियोगिता गराउने गर्थ्यो । परिस्थितिले अहिले ठीक उल्टो छ । यद्यपि यस प्रतियोगीताको महत्त्व विगतभन्दा बढी छ ।

यसै प्रतियोगितामार्फत अर्को वर्ष जापानमा हुने टोकियो ओलम्पिकका लागि खेलाडी छनोट गरिने छ । मंसिर ६ गते शनिबार हुने छैटौं नेपालगन्ज म्याराथनको तयारी पूरा भइसकेको आयोजक क्रिएटिभ ह्यान्ड्सले जनाएको छ । कोभिड–१९ का कारण विगतमा जस्तो धेरैभन्दा धेरै सहभागिता गराएर म्याराथन गर्ने अवस्था छैन । ‘हामी सक्दो भीड कम गरेर प्रतियोगिता गर्दै छौं,’ आयोजक प्रमुख टीएस ठकुरीले भने, ‘यो हाम्रो बाध्यता हो ।’

विगत वर्षका म्याराथनमा सांस्कृतिक कार्यक्रम, व्यापक प्रचारप्रसार र स्थानीय स्तरमा खेलको उत्साह बढाउने उद्देश्य हुन्थ्यो । यो वर्ष भीड कम गर्नकै लागि आयोजकले रचनात्मक कार्यक्रम, छात्रछात्रा दौड, ह्विलचियर दौडजस्ता इभेन्ट हटाएको छ । लामो समयदेखि खेल्न नपाएर निराश बनेका खेलाडीमा उत्साह थप्न र आयोजकले संकटमा पनि कार्यक्रम गर्न सकिन्न भन्ने सन्देश दिन म्याराथनलाई निरन्तरता दिएको ठकुरीले बताए ।

‘महत्त्वपूर्ण खेलाडी नछुटाउने गरी प्रचार गरेका छौं,’ उनले भने, ‘जतिले थाहा पाएर आएका छन्, नपाएकालाई जोड दिएका छैनौं ।’ उनका अनुसार प्रतियोगितामा पूर्वदेखि पश्चिमसम्मका उत्कृष्ट खेलाडीले नाम दर्ता गरिसकेका छन् । यसपालि पुरुष खुला म्याराथन, महिला हाफ म्याराथन र ३ किलोमिटरको कर्पोरेट रन मात्रै समावेश गरिएको छ ।

पुरुष म्याराथनमा १३औं दक्षिण एसियाली खेलकुद (साग) का स्वर्णविजेता किरणसिंह बोगटी, गत वर्षका विजेता नवराज साउद, सागकै ५ हजार मिटर दौडका स्वर्णविजेता गोपीचन्द्र पार्कीलगायत २० भन्दा बढी राष्ट्रिय धावकले प्रतिस्पर्धा गर्दैछन् । महिलातर्फ १० भन्दा बढी खेलाडीले भाग लिने छन् । नेपालगन्जको वीपी चोकदेखि सुरु भएर कोहलपुर चौराहा अगाडि पुगेर पुनः सोही ठाउँमा पुगेर दौड सकिनेछ ।

विजेताले ७५ हजार, दोस्रोले ३० हजार, तेस्रोले २० हजार रुपैयाँ पुरस्कार जित्ने छन् । चौथोले १०, पाँचौंले ८, छैटौंले ७, सातौंले ६ र आठौंले ५ हजार रुपैयाँ पाउने छन् । गत वर्षको तुलनामा विजेताले २० हजार बढी पाउने छन् ।

महिला हाफ म्याराथन विजेताले ३० हजार, दोस्रोले १५ हजार, तेस्रोले १० हजार रुपैयाँ जित्ने छन् । नेपालगन्ज म्याराथनको पहिलो संस्करण नेपाली सेनाका होमलाल श्रेष्ठ, दोस्रो सेनाकै कृष्ण बस्नेत, तेस्रो जुम्लाका दुर्गा बुढा, चौथो संस्करण नेपाल पुलिस क्लबका भूमिराज राई र पाँचौं संस्करण सेनाका नवराज साउदले जितेका थिए । महिला हाफ म्याराथनको उपाधि दुईपल्ट कान्छीमाया कोजु र गत वर्ष सेनाकी पूर्णलक्ष्मी न्यौपानेले उपाधि जितेका थिए ।

प्रकाशित : मंसिर ५, २०७७ ११:१०
प्रतिक्रिया
पठाउनुहोस्

खोप परीक्षणको नतिजाले जगायो आशा

नवीन पोखरेल

लन्डन — कोभिड–१९ विरुद्ध खोप विकास गरिरहेका वैज्ञानिकहरू सफलताको नजिक पुगेका खबर आउने क्रम जारी छ । खोपको प्रभावकारिताबारे गरिएको तेस्रो तथा अन्तिम चरणको मानव परीक्षणको नतिजा सकारात्मक देखिएसँगै विश्वभर आशा जागेको छ ।

बेलायतको अक्सफोर्ड विश्वविद्यालयले विकसित गरेको कोभिड—१९ विरुद्धको खोपले ६० देखि ७९ वर्ष उमेर समूहका मानिसमा बलियो रोगप्रतिरोधी प्रतिक्रिया देखाएको बिहीबार अनुसन्धानकर्ताले जनाएका छन् । उक्त उमेरसमूह भाइरस संक्रमणबाट सबैभन्दा बढी जोखिममा रहेको समूह हो ।

बीबीसीका अनुसार खोप परीक्षण क्रममा सहभागीलाई १८ देखि ५५ वर्ष, ५६ देखि ६९ वर्ष र ७० वर्षमाथि उमेर समूहमा विभाजन गरिएको थियो तर ७० वर्षमाथिका वृद्धवृद्धामा पनि १८ देखि ५५ वर्ष उमेर समूहका जस्तै भाइरस प्रतिरोधी क्षमताको विकास भएको पाइएको छ । परीक्षणमा सहभागी ९९ प्रतिशतमा खोपको दोस्रो डोज लगाएको दुई सातामा एन्टीबडी विकास भएको थियो । अनुसन्धानकर्ताले ५ सय ६० जना स्वस्थ वयस्कमा गरिएको खोप परीक्षणको नतिजा ‘उत्साहजनक’ भएको पनि जनाएका छन् ।

उक्त खोपको तेस्रो चरणको परीक्षण अझै जारी छ । तेस्रो चरणको खोप परीक्षण गरिसकेका कम्पनीहरू फाइजर र बायोएनटेक, स्पुतनिक, सिनोभ्याक बायोटेक र मोडेर्नाले राम्रो प्रारम्भिक नतिजा देखाएको बताएका छन् । अमेरिकी फाइजर र यसको साझेदार जर्मन कम्पनी बायोएनटेकले विकसित गरेको कोभिड–१९ विरुद्धको खोपले ६५ वर्षमाथिका ९४ प्रतिशत बिरामीलाई जोगाउने बताइएको छ । अन्तिम चरणमा रहेको उक्त खोप परीक्षणमा विश्वभर ४१ हजार जना सहभागी थिए । तीमध्ये आधालाई खोप र आधालाई ‘प्लेसबो’ दिइएको थियो ।

तेस्रो चरणमा जारी परीक्षणले सबै उमेरसमूह र जातीय पृष्ठभूमिका मानिसमा बराबर काम गरेको पनि ती कम्पनीको दाबी छ । उनीहरूले आपत्कालीन प्रयोगका लागि अमेरिकामा छिट्टै अनुमति लिइने जनाएका छन् ।

कोभिडविरुद्धको खोप उत्पादनमा अग्रमोर्चामा रहेको अमेरिकी कम्पनी मोडेर्नाले विकसित गरेको खोपले ९५ प्रतिशत बिरामी निको हुने जनाइएको छ । सो खोप भण्डारण र ओसारपसार गर्न फाइजरभन्दा सजिलोसमेत देखिएको छ । मोडेर्नाको खोप घरायसी वा क्लिनिकको फ्रिजमा माइनस २० डिग्री सेन्टिग्रेड तापक्रममा ६ महिनासम्म राख्न सकिनेछ । बेलायतले अक्सफोर्ड र एस्ट्राजेनेकाको खोप १० करोड डोज, फाइजर र बायोएनटेकको ४ करोड डोज र मोडेर्नाको ५० लाख डोज अग्रिम अर्डर गरिसकेको छ ।

उता चीनको सिनोभ्याक बायोटेकले विकसित गरेको ‘कोरोनाभ्याक’ खोपले तीव्र रूपमा रोगप्रतिरोधी क्षमता विकसित गरेको अनुसन्धानकर्ताले जनाएका छन् । उक्त परीक्षण ७ सय ४४ जनामा गरिएको थियो । उक्त खोप मध्य–चरणको परीक्षणमा सफल भएको अनुसन्धानकर्ताको दाबी छ । चीनले कोभिड–१९ विरुद्ध विभिन्न खोप तयार गरिरहेको छ ।

बेलायतको बर्नमाउथ विश्वविद्यालयमा आबद्ध जनस्वास्थ्यविद् डा. निर्मल अर्याल पछिल्ला समाचारमा विश्वास गर्न सकिने प्रशस्त आधार देख्छन् । ’अन्तरिम समीक्षाको नतिजामा शुभ संकेत छ तर सबै उमेर समूह, लिंग वा जाति विशेषलाई काम गर्छ, गर्दैन हेर्नुपर्ने हुन्छ,’ अर्यालले कान्तिपुरसँग भने ।

प्रकाशित : मंसिर ५, २०७७ १०:५३
पूरा पढ्नुहोस्
प्रतिक्रिया
पठाउनुहोस्
×