सन्दीप लामिछानेले होबर्ट हरिकेन्सबाट बिग बास लिग खेल्ने- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

सन्दीप लामिछानेले होबर्ट हरिकेन्सबाट बिग बास लिग खेल्ने

इकान्तिपुर डेस्क

काठमाडौँ — नेपाली लेग स्पिनर सन्दीप लामिछाने यस पटक बिग बास लिग(बीबीएल) मा होबर्ट हरिकेन्सबाट खेल्ने भएका छन् ।

होबर्ट हरिकेन्सले विदेशी खेलाडीको कोटामा सन्दीपलाई क्लबमा आबद्ध गरेको बताएको छ । होबर्टले सन्दीपलाई कति रकममा अनुबन्ध गरेको हो भन्नेबारे भने केही खुलाएको छैन ।

यस वर्षको बीबीएल डिसेम्बर १० देखि सुरु हुने भए पनि सन्दीप भने जनवरीबाट टिममा सहभागी हुने क्लबले जानकारी दिएको छ । सन्दीपले होबर्ट हरिकेन्समा आबद्ध हुनु अत्यन्तै खुसीको कुरा भएको बताएका छन् । सन्दीपको भनाइ उद्धृत गर्दै क्लबले लेखेको छ, ‘बीबीएलको दसौं संस्करणमा होबर्ट हरिकेन्स टिममा आबद्ध हुन पाउँदा म अत्यन्तै आभारी छु । मलाई अस्ट्रेलियाले सधैँ माया र सहयोग गरेको छ । बिग बासमा गुणात्मक प्रतिस्पर्धा हुन्छ । म ब्लन्डस्टोन एरिनामा खेल्नका लागि निकै आतुर छु ।’

हरिकेन्सका मुख्य प्रशिक्षक एडम ग्रिफिथले पनि सन्दीपका कारण टिमको बलिङ आक्रामक हुने बताएका छन् । ‘सन्दीपले आफ्नो रहस्यमयी स्पिनमार्फत खेललाई कसरी परिवर्तन गर्छन् भन्ने हामीले देखेका छौं । उनले इनिङ्सको जुनसुकै स्टेजमा पनि बलिङ गर्न सक्छन् । उनी प्रमाणित ‘विकेटटेकर’ हुन् जसले हाम्रो बलिङ समूहमा अर्कै आयाम थप्नेछन्,’ मुख्य प्रशिक्षक ग्रिफिथले भने ।

सन्दीपले यसअघि बीबीएलको दुई संस्करण मेलबर्न स्टार्सबाट खेलेका थिए । उनले सन् २०१८–१९ को सिजनबाट बीबीएलमा डेब्यु गरेका थिए । उनले दुई वटा सिजनमा गरेर बीबीएलमा २० खेलबाट २६ विकेट लिएका छन् ।

हरिकेन्समा आबद्ध हुने विदेशी खेलाडीमा सन्दीपसँगै किमो पल, डेविड मलान, विल ज्याक्स र कोलिन इन्ग्राम रहेका छन् । हरिकेन्समा स्कट बोल्यान्ड, जेक डोरान, नथान एलिस, जेम्स फकनर, पिटर ह्यान्ड्सकम्ब, डेभिड मुडी, टिम पेन, डार्सी शर्टलगायतका चर्चित अस्ट्रेलियाली क्रिकेटर रहेका छन् ।


प्रकाशित : मंसिर ४, २०७७ ०९:५२
प्रतिक्रिया
पठाउनुहोस्

पार्टी फुटाएर देश र जनतालाई धोका दिने कुकर्ममा कोही नलागौं : नेता रावल

इकान्तिपुर डेस्क

काठमाडौँ — नेकपा स्थायी कमिटी सदस्य भीम रावलले पार्टी फुटाएर देश र जनतालाई धोका दिने र पार्टीप्रति गद्दारी नगर्न आग्रह गरेका छन् ।

नेकपाभित्रको आन्तरिक विवाद उत्कर्षमा पुगेका बेला पूर्वगृहमन्त्रीसमेत रहेका नेता रावलले पार्टीभित्रको विवाद नेकपा एकीकरणको घोषणा, राजनीतिक प्रतिवेदन,केन्द्रीय कमिटी र कार्यदलको प्रतिवेदनमा आधारित स्थायी कमिटीको निर्णय, विधान र पद्धतिको पालनाबाट मात्रै हुने बताएका हुन् । नेता रावलले बैठकबाटै समस्याको समाधान खोज्नुपर्ने बताएका छन् ।

नेकपामा विवाद बढिरहेका बेला संस्कृति, पर्यटन तथा नागरिक उड्डयन मन्त्रीसमेत रहेका नेकपाका अर्का स्थायी कमिटी सदस्य योगेश भट्टराईले भने सामाजिक सञ्‍जालमा 'सर्वाधिक कठिन समय' भनेर लेखेका छन् ।

यसैबीच बुधबार दिउँसो एक बजेका लागि तय भएको सचिवालय बैठककै समय पारेर प्रधानमन्त्री केपी शर्मा ओलीले मन्त्रिपरिषद् बैठक बोलाएका छन् बालुवाटार स्रोतका अनुसार मंगलबार राति मन्त्रीहरुलाई बैठकबारे जानकारी दिइएको थियो । तर, बैठकका एजेण्डाबारे मन्त्रीहरु पनि जानकार छैनन् । मन्त्रिपरिषद् बैठक प्राय: सातामा सोमबार र बिहीबार बस्ने गरेको थियो।

बुधबार नै यही समयमा नेकपाको सचिवालय बैठक पनि बस्दैछ । प्रवक्ता नारायणकाजी श्रेष्ठले दिउँसो १ बजे सचिवालय बैठक बस्ने जानकारी दिए । उनका अनुसार बैठक बालुवाटार वा पार्टी मुख्यालय धुम्बाराहीमा बस्ने भन्नेचाहिँ अझै तय भने भएको छैन ।

प्रकाशित : मंसिर ३, २०७७ १०:१२
पूरा पढ्नुहोस्
प्रतिक्रिया
पठाउनुहोस्
×