दुर्गम गाउँमा फुटबल मैदान- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

दुर्गम गाउँमा फुटबल मैदान

प्रताप विष्ट

मकवानपुर — मकवानपुरको उत्तरी क्षेत्रमा पर्ने थाहा नगरपालिकाको दुर्गम क्षेत्रका बासिन्दाले फुटबल मैदान बनाएका छन् । खोला बगेको स्थानलाई पुरेर फुटबल मैदान बनाइएको हो । 

थाहा नगरपालिका–११ टिस्टुङस्थित तारा खोलालाई साँघुर्‍याएर फुटबल मैदान बनाएको छ । त्रिभुवन राजपथको टिस्टुङ देउरालीवाट साढे तीन किलोमिटरभित्र गज्जबको फुटबल मैदान बनेको छ । मैदान बनाउन करिब ३० लाख रुपैयाँ लागत खर्च भएको जनाइएको छ ।

मैदान बनाउन थाहा नगरपालिका र वडा कार्यालयले २५ लाख रुपैयाँ उपलब्ध गराएको थियो । स्थानीयवासीले ५ लाखबराबरको श्रमदान गरेका थिए । ‘करिब ३० लाखको लागतमा फुटबल मैदान बनाइयो,’ वडाध्यक्ष किरणवल लामाले भने, ‘खेर गएको जमिन उपयोगमा पनि ल्याइयो, युवालाई फुटबल खेलतर्फ आकर्षित गर्ने काम हुने भयो ।’

गाउँमा मैदान बनेकाले युवाहरूले फुर्सदको समयमा फुटबल खेल्ने गरेका छन् । उक्त मैदानमा फुटबल प्रतियोगिता भइसकेको छ। अहिले उक्त मैदानमा प्रथम अष्टमान बल स्मृति फुटबल प्रतियोगिता भइरहेको छ । प्रतियोगितामा थाहा नगरपालिकाका टिममात्र होइन, छिमेकी धादिङ जिल्लाको टिमहरू पनि सहभागी रहेका छन् । प्रतियोगितामा १७ टिमले भाग लिएका छन् ।

खुकुरी फुटबल मैदान नाम राखिएकाले बनाइएको खुकुरीको प्रतीक चिह्न । तस्बिर : प्रताप/कान्तिपुर

उक्त मैदानको नाम ‘खुकुरी फुटबल ग्राउन्ड’ राखिएको छ । मैदानको प्रवेशद्वारमै ढुंगाको करिब ५ फिट उचाइको खुकुरीको प्रतीक चिह्न राखिएको छ । त्यसलाई स्थानीय कालिगडले बनाएका हुन् । स्थानीय खोलाको लाम्चो आकारको ढुंगालाई कालिगडले ताछेर र खोपेर सानदारको खुकुरी बनाएका छन् । खुकुरीको आकृति निर्माण गर्न ५ लाख रुपैयाँ खर्च भएको वडाध्यक्ष लामाले बताए । ‘यही खुकुरीको नामबाट मैदानको नाम राखिएको हो,’ उनले भने ।

मैदानको चारैतिर भिरालो सा–साना सुर्का भएको जमिन रहेको छ । त्यही सुर्कामा बसेर दर्शकले फुटबल प्रतियोगिता हेर्ने गरेका छन् । ‘यहाँ फुटबल मैदान बनाएपछि यस क्षेत्रका युवाहरू फुटबल खेलतर्फ आकर्षित भएका छन्,’ स्थानीय समाजसेवी अशोक लामाले सुनाए, ‘यो मैदानले युवालाई राम्रै भएको छ ।’

यस क्षेत्रमा खासै कोरोना भाइरसको संक्रमण देखिएको छैन । लकडाउनको समयमा पनि स्थानीय युवाहरूले यस मैदानमा फुटबल खेलेर समय बिताएको लामाले सुनाए । फुटबल मैदानलाई व्यवस्थित गर्न थाहा नगरपालिकाले आर्थिक सहयोग गर्ने मेयर लवसेयर विष्टले बताए । दर्शकका लागि व्यवस्थितसँग बस्न प्यारापिट बनाउनुपर्ने आवश्यकता रहेको उनले बताए ।

प्रकाशित : मंसिर ४, २०७७ ११:३२
प्रतिक्रिया
पठाउनुहोस्

ढिलो अस्पताल पुग्दा मृत्यु

होम आइसोलेसनमा बस्ने र स्वास्थ्य अवस्था जटिल बनेपछि मात्रै संक्रमितहरु अस्पताल पुग्ने गरेका छन् ।
ठाकुरसिंह थारु

नेपालगन्ज — पीसीआर परीक्षण गर्दा दाङ घोराही नगरपालिका–१७ का ७९ वर्षीय पुरुषलाई गत कात्तिक २१ मा कोरोना संक्रमण पुष्टि भयो । त्यसपछि घरमै आइसोलेसनमा बसे । स्वास्थ्य अवस्था जटिल बनेपछि मंगलबार राति साढे १२ बजे कोहलपुरस्थित शिक्षण अस्पतालमा भर्ना गरियो ।

उनको त्यसै दिन राति २ बजे मृत्यु भयो । चिकित्सकहरूका अनुसार उनलाई उच्च रक्तचाप र दमको समस्या थियो ।

त्यसैगरी, मंगलबार बिहान १० बजे भेरी अस्पताल नेपालगन्जमा उपचारकै क्रममा घोराही–१५ का ७५ वर्षीय पुरुषको मृत्यु भयो । स्वास्थ्य अवस्था बिग्रिएपछि उनी अस्पताल पुगेका थिए । शंका लागेर परीक्षण गर्दा कात्तिक २६ मा मात्रै उनमा संक्रमण पुष्टि भएको हो । समयमै परीक्षण नगराई अवस्था जटिल बनेपछि मात्रै अस्पताल आएकाले उनको उपचार सम्भव नभएको चिकित्सकले बताए ।

होम आइसोलेसनमा बस्ने र स्वास्थ्य अवस्था जटिल बनेपछि मात्रै अस्पताल आउने गरेका कारण संक्रमित मृत्युको घटना बढेको हो । कतिपय संक्रमित भएको थाहा नपाएर घरमै बस्दासमेत मानवीय क्षतिको दर बढेको छ । भेरी अस्पताल र नेपालगन्ज शिक्षण अस्पतालमा लुम्बिनी, कर्णाली र सुदूरपश्चिम प्रदेशका जटिल अवस्थाका संक्रमितलाई रेफर गर्ने गरिएको छ । ‘हामीकहाँ धेरैजसो रेफर गरिएका बिरामी आउने गरेका छन्,’ कोभिड विशेष भेरी अस्पतालका कोरोना फोकल पर्सन एवं फिजिसियन डा. संकेतकुमार रिसालले भने, ‘जटिल अवस्थाका र धेरै जिल्लाबाट संक्रमित आउने गरेकाले मृतकको संख्या बढेको हो ।’

पछिल्लो समय संक्रमित भएका व्यक्तिको पनि परीक्षण हुन छोडेको छ । स्वास्थ्य मन्त्रालयले लक्षण देखिएका व्यक्तिको मात्रै पीसीआर परीक्षण गर्ने निर्देशिका ल्याएपछि परीक्षण हुन नसकेको हो । परीक्षणको दायरा साँघुरो हुने र स्वास्थ्य सतर्कता नअपनाउँदा संक्रमण समुदायमा विस्तार भइरहेको छ ।

‘परीक्षण नै नगर्ने हो भने कसलाई संक्रमण छ, त्यो थाहा हुँदैन । ढिलो गरी जानकारी पाए उपचार समयमै गर्न सकिँदैन,’ डा. रिसालले भने । पीसीआर परीक्षणलाई साँघुरो गर्दै लगिएपछि संक्रमण पुष्टि ढिलो हुने र समयमै उपचार नपाउँदा बिरामी मृत्युको घटना बढ्न थालेको चिकित्सकहरू बताउँछन् । संक्रमितको सम्पर्कमा रहेका व्यक्तिमा पनि लक्षण नदेखिएको भन्दै पीसीआर परीक्षण गराइएको छैन । अझ स्वास्थ्य मन्त्रालयले लक्षण नदेखिएका सामान्य अवस्थाका संक्रमितलाई घरमै आइसोलेसनमा बस्न सक्ने गरी निर्देशिका ल्याएको छ । होम आइसोलेसनमा बस्दा सम्बन्धित पालिकाको स्वास्थ्य प्रमुखले अनिवार्य समन्वय र अनुगमन गर्नुपर्ने नियम बनाइएको छ तर त्यसको प्रभावकारी कार्यान्वयन हुन सकेको छैन ।

स्वास्थ्य कार्यालयका कोरोना फोकल पर्सन नरेश श्रेष्ठले संक्रमित व्यक्तिको मृत्युदर बढिरहेको बताए । बाहिरी जिल्लाबाट उपचारका लागि बाँके ल्याइएकामध्ये ४० जनाको मृत्यु भएको छ । बाँकेका मात्रै ३७ जनाको मृत्यु भएको छ । जिल्लामा अहिले २ सय १९ जना होम आइसोलेसनमा छन् ।

प्रकाशित : मंसिर ४, २०७७ १०:५९
पूरा पढ्नुहोस्
प्रतिक्रिया
पठाउनुहोस्
×