पन्जाबसामु हैदराबाद धराशायी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

पन्जाबसामु हैदराबाद धराशायी

एजेन्सी

दुबई — इन्डियन प्रिमियर लिग (आईपीएल) मा किंग्स इलेभेन पन्जाबले शनिबार सनराइजर्स हैदराबादलाई १२ रनले हराएको छ । ‘लो स्कोरिङ’ खेलमा हैदराबाद नाटकीय पतनको सिकार भएको थियो ।

यो जितपछि १० अंकसहित पाँचौं स्थानमा रहेको पन्जाबले प्लेअफका लागि मिहिनेत गर्न सक्नेछ । हैदराबाद भने आठ अंकमा सीमित रहेर छैटौं स्थानमा रह्यो ।

जितका लागि १ सय २७ रन पछ्याएको हैदराबाद एक समय चार विकेट गुमाएर सय रनको स्थितिमा थियो । त्यसयता १४ रनमा बाँकी ६ विकेट गुमाई १९.५ ओभरमा १ सय १४ रन बनाएर अलआउट भयो ।

हैदराबादका लागि कप्तान डेविड वार्नर र जोनी बियरस्टोले ५६ रनको साझेदारी गरेका थिए । पछि पन्जाबका लागि अश्रदीप सिंह र क्रिस जोर्डनले तीन–तीन विकेट लिए । यसअघि पन्जाबले २० ओभरमा सात विकेट गुमाएर १ सय २६ रन बनाएको थियो ।

प्रकाशित : कार्तिक ९, २०७७ ०७:१०
प्रतिक्रिया
पठाउनुहोस्

आज महानवमी, सिद्धिदात्रीको पूजा गरिँदै

यस वर्ष तलेजु मन्दिर नखुल्ने
रासस

काठमाडौँ — आश्विन शुक्ल नवमीका दिनमा मनाइने महानवमी पर्व आज दुर्गाभवानीको पूजा–आराधना गरी मनाइँदै छ । यस दिन नवदुर्गामध्ये विशेष गरी सिद्धिदात्रीको आह्वान गरिन्छ । महानवमीमा गरिने दुर्गापूजालगायत कार्य गरी घटस्थापनाका दिनमा राखिएको जमरा विभिन्न शक्तिपीठमा लगी चढाइन्छ ।

दसैंघर र कोत लगायत राज्यका विभिन्न देवी मन्दिर र शक्तिपीठमा बोका, हाँस, कुखुरा र राँगाको बलिसहित दुर्गा भवानीको विशेष पूजा आराधना, दुर्गा सप्तशती, श्रीमद्देवीभागवत एवं देवी स्तोत्र पाठ गरिन्छ ।

पशुबलि नदिनेहरुले भने आज आ–आफ्नो कुल परम्परा अनुसार कुभिण्डो, घिरौंला, मूला, काँक्रो र जटा नरिवल समेत बलि दिई पायस पनि चढाउने गर्दछन् । अधिकांश स्थानमा महाअष्टमीको दिनमा बलि दिने र महानवमीका दिनमा मार हान्ने चलन छ । मार्कण्डेय पुराणमा उल्लेख भएअनुसार महानवमी तिथिकै दिन चामुण्डा देवीले रक्तबीज राक्षसको वध गरेकाले महानवमी पर्वलाई विशेष महत्त्वका साथ लिइन्छ । कतिपय शक्तिपीठमा भने आज हाँस, कुखुरा, बोका, भेडा र राँगाको पञ्चबलि दिने गरिन्छ ।

महानवमीका अवसरमा कोतहरुमा हर्षबढाइँका साथ कोतपूजा र निसानपूजा पनि गरिन्छ । यस अवसरमा हनुमानढोका दरबारका साथै नेपाली सेनाका ब्यारेक र गुल्महरुमा बाजागाजासहित जङ्गी निसाना पूजा र कोतपूजा गर्ने प्रचलन छ । प्रत्येक वर्ष महानवमीका दिन बिहान हनुमानढोकामा राज्यका तर्फबाट ५४ बोका र ५४ राँगाको बलि दिइने गरेकामा यो वर्ष कोरोना भाइरस सङ्क्रमणका कारण नदिइने निर्णय सरोकारवाला निकायको बैठकले गरेको छ ।

घटस्थापनादेखिको नित्य पूजा र बलिको कार्यक्रम भने भइरहेको दरबार हेरचाह अड्डाका कार्यालय प्रमुख सन्दीप खनालले बताए ।

तलेजु मन्दिर नखुल्ने

हनुमानढोका दरबारमा रहेको वर्षमा एकपटक महानवमीका दिन मात्र खुल्ने तलेजु भवानीको मन्दिर पनि यो वर्ष कोरोनाकै कारण नखोलिने खनालले जानकारी दिए । तुलजा भवानीको यात्रा भने नेपाल पञ्चाङ्ग निर्णायक समितिले दिएको साइतमा गरिनेछ । तलेजु भवानीको मन्दिर प्रत्येक वर्ष आश्विन शुक्ल नवमी अर्थात् महानवमीका दिनमात्र खुल्ने परम्परा छ । वर्षमा एक दिन मात्र खुल्ने भएकाले यहाँ दर्शनार्थी एवं पूजा गर्ने भक्तजनको भीड लाग्ने गरेको थियो । तलेजु भवानीको दर्शन गर्न चाहने भक्तजन महानवमीका दिन बिहानै लाममा बस्ने गरेका थिए । लाम बसेका सबै भक्तजनलाई देवीको दर्शन गर्न दिने गरिन्छ । महानवमीका अवसरमा आज नेवारी समुदायले भने भीमसेनलाई बलिसहित पूजा गर्ने परम्परा छ ।

प्रकाशित : कार्तिक ९, २०७७ ०६:५५
पूरा पढ्नुहोस्
प्रतिक्रिया
पठाउनुहोस्
×