रुकुम पश्चिमा ८ महिनापछि खेलकुद प्रतियोगिता- खेलकुद - कान्तिपुर समाचार

रुकुम पश्चिमा ८ महिनापछि खेलकुद प्रतियोगिता

हरि गौतम

रुकुम पश्चिम — जिल्लामा ८ महिनापछि खेलकुद प्रतियोगिता सुरु भएको छ । दसैंको अवसर पारी सानीभेरी गाउँपालिकामा खुला पुरुष डबल ब्याडमिन्टन प्रतियोगिता सुरु भएको हो ।

सानीभेरी समाज विकास केन्द्रले सुरक्षाका सम्पूर्ण मापदण्ड अपनाएर प्रतियोगिता आयोजना गरेको हो । गाउँपालिका र स्थानीय प्रशासनसँग समन्वय गरेर सुरक्षा सतर्कतालाई ध्यानमा राखी प्रतियोगिता सुरु गरेको केन्द्रका अध्यक्ष चन्द्रप्रकाश ओलीले बताए ।

९ नम्बर वडाको सिम्ली बजारमा भइरहेको प्रतियोगितामा खेल्ने टिम बाहेक अरुलाई बाहिरै राखिएको र दर्शकलाई पनि प्रवेश निषेध गरिएको उनले जानकारी दिए । प्रतियोगितामा १९ टिमले सहभागिता जनाएका छन् ।

प्रतियोगिता जित्ने जोडीले २५ हजार, दोस्रो हुनेले १५ हजार र तेस्रो हुने जोडीले १० हजार रुपैयाँ प्राप्त गर्नेछन् । पछिल्लो समय जिल्लाभर ब्याडमिन्टनप्रतिको आकर्षण बढेको छ ।

गत चैत्र ११ गतेयता जिल्लामा कुनै पनि औपचारिक खेल भएका थिएनन् । कोरोना भाइरसका कारण भएको लकडाउन तथा सरकारले कुनै पनि प्रकारका खेलकुद नगर्नु भन्ने निर्देशन दिएपछि जिल्लामा औपचारिक खेलकुद गतिविधि ठप्प थिए ।

प्रकाशित : कार्तिक ५, २०७७ १८:१४
प्रतिक्रिया
पठाउनुहोस्

रुकुम पश्‍चिममा होम आइसोलेसनमा रहेकी संक्रमितको मृत्यु

हरि गौतम

रुकुम पश्चिम — कोरोना भाइरस संक्रमण भएर होम आइसोलेसनमा बसेकी एक महिलाको मृत्यु भएको छ ।

त्रिवेणी गाउँपालिका–७, की ५३ वर्षीया महिलाको बुधबार बिहान मृत्यु भएको हो । आन्द्राको क्यान्सरको उपचारमा चितवन गएको बेला उनलाई कोरोना संक्रमण पुष्टि भएको थियो । चितवनको भरतपुर क्यान्सर अस्पतालले कोरोना संक्रमणपछि होम आइसोलेसनमा बस्न भनेर घर पठाएको थियो । जिल्ला फर्किसकेपछि पनि उनमा कोरोना परीक्षण गर्दा रिर्पोट पोजिटिभ आएको थियो ।

कोरोना संक्रमित महिलाको मृत्यु भएको र नेपाली सेनाको टोलीले शव व्यवस्थापन गरेको स्वास्थ्य सेवा कार्यालयका कोरोना रोग नियन्त्रण फोकल पर्सन ईश्वर रावलले बताए ।

प्रकाशित : कार्तिक ५, २०७७ १७:५३
पूरा पढ्नुहोस्
प्रतिक्रिया
पठाउनुहोस्
×