महिला क्रिकेटमा नयाँ अध्याय : कप्तान रुबिना- खेलकुद - कान्तिपुर समाचार

महिला क्रिकेटमा नयाँ अध्याय : कप्तान रुबिना

पर्वत पोर्तेल

काँकडभिट्टा — नेपाल क्रिकेट संघ (क्यान) ले पाँच दिनअघि राष्ट्रिय महिला क्रिकेटरलाई ग्रेडिङ गर्दै मासिक तलब दिने निर्णयपछि महिला राष्ट्रिय टिमकी कप्तान रुबिना क्षेत्री बेलबासेले नयाँ अध्याय सुरु भएको टिप्पणी गरेकी छन् । क्यानले ९ महिनाअघि नै तलब उपलब्ध गर्ने प्रतिबद्धता गरेको थियो ।

सोहीअनुसार मंगलबार चितवनमा सम्पन्न क्यानको बोर्ड बैठकले महिला क्रिकेटरलाई तलब दिने निर्णय गरेको थियो । कोरोना महामारीका बाबजुत क्यानले जुन निर्णय लियो यो सम्मानजनक रहेको कप्तान रुबिनाले बताइन् । ‘यो निर्णयले हामी थप उत्साही भएका छौं,’ उनले कान्तिपुरसँग भनिन्, ‘क्यानले जुन सिस्टम सुरु गरेको छ, यसले हामीलाई अब सुरक्षित बनाएको छ ।’

यसअघि क्यानले पुरुष राष्ट्रिय टोलीलाई ग्रेडिङ गरी तलब दिँदै आएको थियो । महिला क्रिकेटरलाई पनि तीन ग्रेडमा विभाजन गरेर तलब दिने प्रकृया सुरु भएको छ । ‘ए’ ग्रेडमा कप्तान रुबिनासहित नेरी थापा, इन्दु बर्मा, सीता रानामगर र करुणा भण्डारी छन् । ज्योति पाण्डे, अप्सरी बेगम, रोमा थापा, बिन्दु रावल, कविता जोशी, रितु कनोजिया, काजल श्रेष्ठ र सरिता मगर ‘बी’ ग्रेडमा परेका छन् । भने ‘सी’ ग्रेडमा कविता कुँवर, डोली भट्ट, अनुराधा चौधरी, सोनु खड्का, अञ्जली चन्द र शोभा आले छन् । क्यानमा ‘ए’ ग्रेडका खेलाडीलाई मासिक १५, ‘बी’ ग्रेडलाई मासिक १२ र ‘सी’ ग्रेडमा परेका खेलाडीलाई मासिक १० हजार तलब उपलव्ध गराउने जनाएको छ ।

पुरुष क्रिकेटरले धेरै पाए महिलालाई किन कम? रुबिना भन्छिन्, ‘पुरुष खेलाडीको योगदान र जिम्मेवारी हाम्रोभन्दा अलि वढी छ । उनीहरू ओडीआई मान्यताप्राप्त खेलाडी पनि हुन् । तलब अलि कम भयो भन्ने हो, १५ को ठाउँमा २० मात्रै भएको भए हुन्थ्यो भन्ने मेरो निजी विचार हो।’

कप्तान रुबिनाले क्यानले राम्रो संस्कारको सुरुआत गरेको र भविष्यप्रति आशावादी र सुरक्षित बन्न सकिने बताइन् । क्षत्रीले १५ हजार तलवका भरमा खेलाडीलाई बाँच्न चाहिँ गाह्रो हुने धारणा राखिन् । क्यानले यसअघि १९ खेलाडीको कोरोना बिमासमेत गरिदिएको थियो । भविष्यमा जीवन बिमाको योजना क्यानको रहेको बताइएको छ ।

स्थानीय सरकारको उपेक्षा

कप्तान रुबिनासहित काजल श्रेष्ठ, अप्सरी बेगम, सबनम राई, संगीता राई र रोमा थापा एउटै वटाका राष्ट्रिय महिला क्रिकेटर हुन् । उनीहरू मेचीनगर–६ का बासिन्दा हुन् । यू–१९ की ललिता राजवंशी, निग्मा तामाङ र ज्योति दनुवार पनि यही नगरका क्रिकेटर हुन् ।

१३ औं सागका पदक विजेता क्रिकेटरलाई सरकारले र प्रदेश सरकार अभिनन्दन गर्यो । तर, आफ्नै नगर सरकारबाट भने उनीहरू उपेक्षाको सिकार भइरहे । ‘क्रिकेटबाट नगरको नाम उच्च पार्न हाम्रो पनि धेरथोर भूमिका त रह्यो होला नि ?,’ कप्तान रुबिनाको दुखेसो थियो, ‘तर, नगरले हामीलाई कहिल्यै आफ्नो ठानेन, सधैं पराई मान्यो । नगरले त उपेक्षा गर्यो ।’

वडा ६ ले पनि सधैं बेवास्ता मात्रै गरेको रुविना बताउँछिन् । कोरोना कहरका कारण ६ महिनादेखि खेलाडीहरू सबै घरमै छन् । ‘तिमेरको अवस्था के छ, के भनेर हाल खबरसम्म सोध्ने फुर्सद जनप्रतिनिधिलाई भएन,’ रुबिनाको आक्रोश थियो, ‘ढुंगागिटी, बालुवा थुपारेर मात्रै नगर समृद्ध बन्दैन, समृद्ध बनाउन खेलाडीको भूमिका पनि कम हुन्न भन्ने हेक्का कसैलाई भएन ।’

प्रकाशित : आश्विन १२, २०७७ ०९:१२
प्रतिक्रिया
पठाउनुहोस्

सीप्यानको ध्यानाकर्षण

कान्तिपुर संवाददाता

काठमाडौँ — क्रिकेट खेलाडी संघ नेपाल (सीप्यान) ले चितवनमा बसेको क्यान बोर्ड बैठकबाट गरिएका केही निर्णयमा ध्यानाकर्षण जनाएको छ । नेपाल क्रिकेट संघ (क्यान) को अघिल्लो साता बोर्ड बैठक बसेको थियो ।

सीप्यानले आइतबार राष्ट्रिय खेलकुद परिषद्मा ध्यानाकर्षण पत्र बुझाएको छ । असोज ६ गते भरतपुरमा सम्पन्न क्यान बोर्ड बैठकले पुरुष तथा महिला क्रिकेट खेलाडीको ग्रेडिङ गर्दै सेन्ट्रल कन्ट्रयाक्ट दिइएको थियो ।

त्यसअनुसार ग्रेड ‘ए’ मा परेका ५ महिला खेलाडीलाई १५, ग्रेड ‘बी’ मा परेका ८ खेलाडीलाई १२ र ग्रेड ‘सी’ मा परेका ६ खेलाडीलाई १० हजार मासिक तलब दिने निर्णय पारित गरेको थियो । पुरुषतर्फ ग्रेड ‘ए’ का ८ खेलाडीलाई ५० हजार, ग्रेड ‘बी’ मा परेकालाई ४० र ग्रेड ‘सी’ मा परेका खेलाडीलाई ३० हजार मासिक तलब प्रदान गर्ने भएको थियो । क्यानले पुरुष खेलाडीको मासिक तलबमा १० हजारसमेत वृद्धि गरेको थियो ।

लामो समयदेखि अवरुद्ध नेपाली क्रिकेट व्यवस्थापनसँग सम्बन्धित गतिविधिलाई गति प्रदान गर्ने लक्ष्यसाथ गरिएका केही निर्णयले सुधारात्मक र सकारात्मक सन्देश दिएको सीप्यानले जनाएको छ । तर खेलाडीसँग प्रत्यक्ष सरोकार राख्ने केही निर्णयबारे क्रिकेट खेलाडीबाट प्राप्त अनुरोधका आधारमा पुनर्विचार गर्नुपर्ने आवश्यकता महसुस भएकाले त्यसलाई सम्बोधन गरिदिन सीप्यानले परिषदसँग अनुरोध गरेको छ ।

सीप्यानका अध्यक्ष मनीषराज पाण्डेद्वारा हस्ताक्षरित विज्ञप्तिमा पुरुष र महिला खेलाडीको वर्गीकरणबारे थप प्रस्टता आवश्यक देखिएको, वर्गीकरणजस्तो महत्त्वपूर्ण विषयवस्तु पारदर्शी रूपमा निश्चित मापदण्ड तोकेर अवलम्बन गर्नुपर्ने, तर्कसम्म र त्रुटिरहित बनाउन तथ्यपरक, वस्तुपरक र वैज्ञानिक बनाउनुपर्ने तथा खेलाडीको मनोबल उच्च राख्न न्यायसंगत ढंगले समयसापेक्ष कुनै विभेद अनुभूति हुने वातावरणलाई निरुत्साहित गर्दै जानुपर्ने जनाइएको छ । क्यानले गर्ने भनिएको पुरुष तथा महिला क्रिकेट खेलाडीको जीवन बिमा/दुर्घटना बिमाका लागि समावेश गरिने खेलाडीको दायरालाई फराकिलो बनाउनु पर्ने सीप्यानले विज्ञप्तीमा जनाएको छ ।

प्रकाशित : आश्विन १२, २०७७ ०९:१०
पूरा पढ्नुहोस्
प्रतिक्रिया
पठाउनुहोस्
×