आईपीएल : राजस्थानको आक्रामक सुरुआत- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

आईपीएल : राजस्थानको आक्रामक सुरुआत

एजेन्सी

शारजहाँ — राजस्थान रोयल्सले इन्डियन प्रिमियर लिग (आईपीएल) मा मंगलबार चेन्नई सुपर किंग्सलाई १६ रनले पराजित गरेको छ । सन् २००८ मा आयोजित पहिलो संस्करणको विजेता राजस्थानले यस संस्करणको आफ्नो पहिलो खेलमा २ सय १६ रनको विशाल स्कोर बनाउँदै खेल जितेको हो ।

चेन्नईले ६ विकेट गुमाई २ सय रनमात्र बनाउन सक्यो । कप्तान महेन्द्रसिंह धोनीले अन्तिम ओभरमा टम कुरानलाई लगातार तीन छक्का प्रहार गरे पनि चेन्नईलाई दोस्रो खेलमा भने जित दिलाउन सकेनन् । फाफ डु प्लेसिसले लगातार दोस्रो अर्धशतक बनाउनेक्रममा ३७ बलमा ७२ रन जोडे पनि चेन्नईलाई राजस्थानको स्कोर निकै ठूलो भएको थियो ।

डु प्लेसिसले १ चौका र ७ छक्का प्रहार गरे । मुरली विजय २१, शेन वाटसन ३३, साम कुरान १७ र केदार जादब २२ रनमा आउट भए । धोनी १७ बलमा २९ रन बनाई अविजित रहे । राजस्थानका स्पिनर राहुल टेवाटिआले ४ ओभरमा ३७ रन खर्चेर ३ विकेट लिए । त्यस्तै जोफ्रा आर्चर, श्रेयस गोपाल र टम कुरानले १–१ विकेट लिए ।

यसअघि शारजहाँ क्रिकेट रंगशालामा सन्जु सामसन र कप्तान स्टिभ स्मिथको सानदार अर्धशतकमा राजस्थान रोयल्सले ७ विकेट गुमाई २ सय १६ रनको विशाल स्कोर बनाएको थियो । टस हारेपछि ब्याटिङमा बोलाइएको राजस्थानबाट ओपनर स्मिथले ६९ र सामसनले ७४ रन बनाए ।

यी दुईले दोस्रो विकेटमा १० ओभरभित्र १ सय २१ रन जोडेका थिए । सामसनले ३२ बल खेल्दै १ चौका र ९ छक्कासहित ७४ रन बनाए । १९ औं ओभरमा आउट भएका स्मिथले ४७ बलको इनिङ्समा समान ४ चौका र छक्का प्रहार गरे । जोफ्रा आर्चर ८ बलमा २७ रन बनाई अविजित रहे । उनले लुङ्गी एनगिडीलाई इनिङ्सको अन्तिम ओभरमा लगातार चार छक्का प्रहार गरेका थिए, त्यसमा लगातार दुई नो–बल पनि रहेको थियो ।

चेन्नईका साम कुरानले ४ ओभरमा ३३ रन खर्चेर ३ विकेट लिए । उनका दाइ टम कुरानले राजस्थानबाट ९ बलमा अविजित १० रन बनाएका थिए । पीयूष चावला र दीपक चाहरले समान एक विकेट लिए ।

चेन्नईले पहिलो खेलमा मुम्बई इन्डियन्सलाई ५ विकेटले पराजित गरेको थियो ।

प्रकाशित : आश्विन ७, २०७७ ०७:१३
प्रतिक्रिया
पठाउनुहोस्

जफत गरिएको प्याज सर्वसाधारणलाई बेचिने

राजु चौधरी

काठमाडौँ — कृत्रिम अभाव गराई कालोबजारी गरिरहेका व्यापारीबाट जफत गरेको प्याज सरकारले सर्वसाधारणलाई बेच्ने भएको छ । मंगलबार बसेको जिल्ला प्रशासन कार्यालय काठमाडौं, वाणिज्य आपूर्ति तथा उपभोक्ता हित संरक्षण विभाग, खाद्य व्यवस्था तथा व्यापार कम्पनीलगायतको संयुक्त बैठकले जफत गरिएको प्याज बिक्री गर्ने निर्णय गरेको हो ।

काठमाडौंको कालिमाटी फलफूल तथा तरकारी बजारमा बोरामा प्याज राख्दै मजदुर ।


सर्वसाधारणलाई प्रतिकिलो ६० रुपैयाँ नबढ्ने गरी बिक्री गर्न आदेश दिइएको जिल्ला प्रशासन कार्यालय काठमाडौंका प्रमुख जिल्ला अधिकारी जनकराज दाहालले जानकारी दिए । ‘कर्मचारीले प्याज सिल गरेका छन्, कालोबजारी ऐनअनुसार मुद्दा दर्ता हुने प्रक्रियामै छ । तर प्याज बिग्रने/नासिएर जाने अवस्था भयो,’ उनले भने, ‘पैसा धरौटी रकम खातामा जाने गरी प्याज बेच्ने निर्णय गरेका छौं ।’ सिल गरिएको प्याज खाद्य व्यवस्था तथा व्यापार कम्पनीलाई प्रतिकिलो ५२ रुपैयाँमा बिक्री गर्ने निर्णय भएको उनले जनाए ।

कम्पनीले भने प्याज ढुवानी, प्याकेजिङ, कर्मचारी खर्चसहित जोडेर प्रतिकिलो ६० रुपैयाँ नबढ्ने गरी बिक्री गर्ने दाहालले बताए । ‘भन्सार बिन्दुको परल मूल्य प्रतिकिलो ४० रुपैयाँ तोकिएको छ । कृषि सुधार शुल्क, ढुवानी, लोडअनलोडसहित प्रतिकिलो ५२ रुपैयाँ तोकेका छौं,’ उनले भने, ‘त्यसमा ७/८ रुपैयाँ जोडेर खाद्यले सर्वसाधारणलाई बेच्छ ।

वाणिज्य विभाग, काठमाडौं महानगरपालिका, प्रहरी र उपभोक्ता अधिकारकर्मीसहितको टोलीले भदौ ३१ मा गरेको अनुगमनमा २ सय १९ बोरा प्याज जफत गरेको थियो । ५०/५५ रुपैयाँमा खरिद गरिएको प्याज ११०/१२० रुपैयाँसम्ममा बिक्री गरेको, खरिद बिल र मूल्यसूची नराखेको कसुरमा अनुगमन टोलीले चुली सगरमाथा इन्टरप्राइजेज र एसके सप्लायर्सबाट उक्त प्याज जफत गरेको थियो । थापाथलीमा बिक्री काउन्टर राखेर प्रतिकिलो ६० रुपैयाँमा बिक्री गरिने खाद्य व्यवस्था तथा व्यापार कम्पनीका महाप्रबन्धक नेत्र सुवेदीले जनाए ।

भारतले भदौ २९ देखि निर्यात रोकेपछि नेपालमा कृत्रिम अभाव गराई प्याजको कालोबजारी भइरहेको छ । भारतले निर्यात बन्द गरेको दुई/तीन दिनमै मूल्य दोब्बर भएको छ । भदौ ३१ सम्म होलसेलमै प्रतिकिलो १ सय २० रुपैयाँसम्ममा बिक्री भइरहेको थियो ।

अनुगमनकै क्रममा चुली इन्टरप्राइजेजमा २ सय र एसकेमा १९ बोरा लुकाएको भेटिएको थियो । करिब १२ हजार किलो प्याज जफत गरिएको वाणिज्य विभागका प्रवक्ता रवीन्द्र आचार्यले बताए । व्यवसायीले मुद्दा जितेर सफाइ पाए बिक्री गरिएको प्याजको रकम फिर्ता पाउने उनले जनाए ।

प्रकाशित : आश्विन ७, २०७७ ०७:०६
पूरा पढ्नुहोस्
प्रतिक्रिया
पठाउनुहोस्
×