क्यान बोर्ड बैठक बस्दै

नेपालले पाएको एकदिवसीय अन्तर्राष्ट्रिय मान्यताबारे बृहत् छलफल बोर्डले गर्नेछ । त्यसमा सहभागी हुन कप्तान मल्ल र प्रशिक्षक टमाटालाई क्यानले आमन्त्रण गरेको छ । बैठकको एक सत्रमा ज्ञानेन्द्र र कार्यबाहक प्रशिक्षक टमाटाले नेपालको एकदिवसीय अन्तर्राष्ट्रिय मान्यताबारे आफ्नो भनाइ राख्ने छन् ।

नेपालले सन् २०१८ मा जिम्बावेमा भएको विश्वकप छनोटबाट एकदिवसीय मान्यता पाएको थियो । चार वर्षे त्यो मान्यता २०२२ मा सकिने छ । एकदिवसीय अन्तर्राष्ट्रियमा नेपाल टिकिरहन कप्तान र प्रशिक्षक सुझावलाई क्यान कार्यसमिति बैठकमा राख्न लागिएको हो । नेपालले २०२१ मा विश्वकप लिग २ मा २८ एकदिवसीय अन्तर्राष्ट्रिय खेल्नुपर्ने हुनसक्छ ।

क्यानको आगामी साधारणसभा मिति तय गर्न, २०७१/७२ देखिको क्षेत्रसम्मको अडिट पास गर्न, आर्थिक तथा प्रशासनिक नियमावली, कर्मचारी समायोजनबारे बोर्ड बैठक बस्न लागिएको बताइएको छ । चार वर्षदेखि कर्मचारीले नपाएको तलबबारे पनि छलफल हुनेछ ।

क्यानलाई अन्तर्राष्ट्रिय क्रिकेट परिषद् (आईसीसी) ले सन् २०१६ देखि झन्डै चार वर्ष निलम्बन गरेको थियो, त्यो अवधिमा कर्मचारीले अधिकांश समयको तलब पाएका छैनन् । क्यान निलम्बनको अवधिमा कार्यालयमा गई काम गरे नगरेको आधारमा तलब निर्धारण हुनसक्ने क्यान स्रोतले जनाएको छ ।