खर्चालु चेल्सीको विजयी सुरुवात- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

खर्चालु चेल्सीको विजयी सुरुवात

एजेन्सी

लन्डन, — फ्रायन्क लाम्पार्डको खर्चालु चेल्सीले सोमबार इंग्लिस प्रिमियर लिगमा विजयी सुरुवात गरेको छ । उसले ब्राइटनको घरमा ३–१ को जित निकाल्यो र त्यसमा टिमो वार्नरले आत्मविश्वासले भरिएको डेब्यु गरे । 

चेल्सीले नयाँ खेलाडी अनुबन्ध गर्नका लागि भनेर २५ करोड ७० लाख डलर खर्चेको छ । वार्नरले जितेको पेनाल्टीमै जोरजिन्होले पहिलो गोल गरे । लगतै लियोनार्डो टोसार्डले ब्राइटनका तर्फबाट एक गोल फर्काए । त्यसयता चेल्सीका तर्फबाट रेसे जेम्स र कर्ट जुमाले गोल गरे । लाम्पार्डका लागि यो अपेक्षित सुरुवात पनि रह्यो ।

उनले लिग अगाडि क्लबले नयाँ खेलाडीमा धेरै खर्च गरेको हुनाले आफू दबाबमा रहेको पनि स्विकारेका थिए । गत सिजन लिगमा विजेता लिभरपुलभन्दा ३३ अंकले पछाडि रहेको चेल्सी एफएकप फाइनलमा पनि आर्सनलसँग पराजित रहेको थियो । तर यसपल्ट टिम सुदृढ बनाएपछि चेल्सीले उपाधिका लागि बलियो दाबेदारी पेस गर्ने छ ।

यस्तै अर्को खेलमा उल्भ्सले सेफिल्ड युनाइटेडमाथि २–० को जित रच्न सफल रह्यो ।उल्भ्सले भने छ मिनेटको अन्तरमा दुई गोल गरेको थियो । राउल जिमिनेज र रोमेन साइस उसका लागि गोलकर्ता रहे । गत सिजन ५९ खेल खेलेको उल्भ्सले यसपल्टको लिगको क्रममा थाकेको कुनै लक्षण देखाएन । ब्रामल लेनमा उल्भ्सले तेस्रो र छैटौं मिनेटमा गोल गरेको थियो र त्यसपछि बाँकी खेल आरामले खेल्यो ।

प्रकाशित : भाद्र ३०, २०७७ ०६:३६
प्रतिक्रिया
पठाउनुहोस्

योशिहिडे सुगा जापानको नयाँ प्रधानमन्त्री बन्‍ने निश्‍चित

एजेन्सी

टोक्यो — जापानी मन्त्रिपरिषद्मा प्रमुख सचिव योशिहिडे सुगा जापानको नयाँ प्रधानमन्त्री बन्ने भएका छन् । सोमबार सत्तारुढ दल लिबरल डेमोक्रेटिक पार्टी(एलडीपी) ले सुगालाई संसदीय दलको नेतामा चयन गरेसँगै उनी जापानको नयाँ प्रधानमन्त्री बन्ने निश्चित भएको जापानी समाचार संस्था क्योदोले जनाएको छ ।

सत्तारुढ दलका सांसदहरुबीच भएको मतदानमा सुगा स्पष्ट मतसहित संसदीय दलको नेतामा निर्वाचित भएका हुन् । उनका प्रतिद्वन्द्वीमा पूर्वरक्षामन्त्री शिगेरु इशिबा र पूर्वविदेशमन्त्री फुमियो किशिदा रहेका थिए । सुगाले ३७७ मत प्राप्त गर्दा किशिदाले ८९ र इशिबाले ६८ मत प्राप्त गरे । संसदीय दलको नेता छान्नका लागि एलडीपीका ३९४ सांसद, स्थानीय च्याप्टरका १४१ डेलिगेट्स र पार्टीका वरिष्ठ नेताहरुले मतदान गरेका थिए ।

गत अगस्ट २८ मा शिन्जो आबेले स्वास्थ्य अवस्थाका कारण राजीनामा दिएपछि जापानका नयाँ प्रधानमन्त्री चुन्नका लागि सत्तारुढ दलमा निर्वाचन भएको हो । आबेको राजीनामापछि उनीनिकट नेता मानिने सुगा नै संसदीय दलको नेतामा निर्वाचित हुने अपेक्षा गरिएको थियो । बुधबार प्रधानमन्त्रीका लागि संसदमा चुनाव हुनेछ । तर जापानी संसद्मा एलडीपीको बहुमत भएकाले त्यो चुनाव औपचाकिता मात्रै हुनेछ ।

आबेको कार्यकाल सन् २०२१ को सेप्टेम्बरमा सकिँदै थियो । सन् २०२१ को अक्टोबर २१ भन्दा अघि नै जापानमा आम चुनाव सम्पन्न गरिसक्नुपर्छ । त्यसैले सुगा कम्तीमा पनि आउँदो चुनावसम्म जापानको प्रधानमन्त्री बन्ने लगभग निश्चित भएको अन्तर्राष्ट्रिय सञ्चारमाध्यमले जनाएका छन् ।

सम्बन्धित समाचार

प्रकाशित : भाद्र २९, २०७७ १३:०२
पूरा पढ्नुहोस्
प्रतिक्रिया
पठाउनुहोस्
×